FESILI MAI TINO FAI‵TAU

E mata, ne fakasala ne tino Isalaelu mua a pagota mai te fakatau‵tau o latou i luga i lakau?

E uke a atufenua i aso mua ne fakasala ne latou a pagota mai te ‵tuki ki luga i se lakau io me se pou. Ne ‵sai kae ‵tuki ne tino Loma se tokotasi penā ki te lakau, telā ne tumau eiloa a ia i te ola i nāi aso a koi tuai o sē ‵kafi ne ia o fa‵ki i te ‵mae, fia inu, fia kai, mo te tuku faka‵sau atu ki te la mo te vaiua. Ne ‵kilo atu a te kau Loma ki te fakatautauga i te lakau e pelā me se fakasalaga fakamasiasi telā e fakaaoga fua ki toe pagota ma‵sei.

Kae e a te fenua mua o Isalaelu? E mata, ne fakasala ne te kau Isalaelu a pagota mai te fakatautau o latou i luga i lakau? Ne fakaasi manino mai i te Tulafono a Mose: “Kafai se tino ne tamate i se agasala a ia ne fai, kae ne fakatautau tena foitino i se pou, e se ‵tau o tuku i konā i te po tenā. E tau eiloa o tanu i te aso foki eiloa tenā.” (Teu. 21:22, 23) E manino ‵lei, me i taimi o Tusitusiga faka-Epelu, e ‵tau o tamate muamua a te tino telā e ‵tau o mate ko fakatautau ei ki luga i se lakau.

E uiga ki te mea tenei, e fai mai te Levitiko 20:2: “So se tino i a koutou, io me se tino fakaalofa e ‵nofo tasi koutou e tuku atu sena tamaliki ke fai mo taulaga ki te atua ko Moloka, e ‵tau o peipei ki fatu ke mate ne te fenua kātoa.” A latou foki kolā e “talo ki agaga o tino ‵mate,” e ‵tau o tamate. E pefea la? E auala i te ‘peipei ki fatu.’​—Levi. 20:27.

E fai‵tau tatou ki te Teutelonome 22:23, 24, penei: “Kafai se tagata e maua atu i loto i te fa‵kai e ‵moe mo se tamāfine telā e fai feagaiga mo te suā tagata; e ‵tau o ave lāua ki tua o te fa‵kai o peipei ki fatu ke ‵mate. A te tamāfine e ‵tau o tamate me ne seki kalaga ki se fesoasoani i a lāua e nofo fua i loto i te fa‵kai, kae e mafai fua o lagona mai tena leo ne tino. A te tagata e ‵tau o tamate me ne ‵moe mo te tamāfine telā e isi sena feagaiga. I te faiga tenā, e ave kea‵tea ei ne koutou te amioga masei i te otou fenua.” I taimi o te kau Isalaelu, a te peipei ki fatu ko te fakasalaga telā ne fakaaoga ki tino kolā ne fai ne latou se agasala matagā.a

E fai mai te Teutelonome 21:23 me i “te foitino mate e tautau i luga i se pou e aumai ne ia te fakamalaiaga a te Atua.” E mautinoa me ka pokotia a te kau Isalaelu i te fakaasi faka‵sau atu o te foitino mate o se tino masei telā ne ‘fakamalaia ne te Atua’ i mua o tino. E tonu, a te fakatautau o te foitino o se tino e tokotasi i luga i se lakau e fai pelā me se faka‵pulaga ki nisi tino.