E Masaua ne Koe?

Se a te bibliomancy, kae ‵tau o ‵kilo atu pefea a Kelisiano ki ei?

A te bibliomancy ko te ‵suke ki te Tusi Tapu ki so se itulau mo te talitonu me i te fuaiupu muamua telā e onoono ki ei te tino e maua i ei te fesoasoani telā e manakogina ne te tino. E se ‵sala a Kelisiano ‵tonu ki fakailoga. I lō te fai penā, e suke‵suke latou ki te Tusi Tapu ke maua te iloaga tonu mo te takitakiga a te Atua.—15/12-E, itulau e 3.

Se a “te lalolagi” telā ka fakaseai atu?

A “te lalolagi” telā ka fakaseai atu ko tino katoa i te lalolagi kolā e se fai ne latou te loto o te Atua. (1 Ioa. 2:17) A te lalolagi mo tino fakamaoni ka ‵sao.—1/1, itulau e 5-7.

E ui eiloa ko oti ne mate Apelu, e faipati mai pefea a ia ki a tatou? (Epe. 11:4)

E faipati mai a ia e auala i te fakatuanaki. E mafai ne tatou o tauloto kae fakaakoako ki tena fakatuanaki. Koi malosi ‵ki a tena fakaakoakoga.—1/1, itulau e 12.

Ko feitu fea o te olaga e ‵tau o onoono faka‵lei tatou ke mo a e gasolo o ‵mao tatou mai te Atua?

Konei la a nisi mea konā: ‵tou galuega ‵togi io me ko galuega, malōlōga mo fakafiafiaga kolā e filifili ne tatou, ‵tou fesokotakiga ki se kāiga fakatea, te fakaaogaga ne tatou a poto ‵fou, te manavase ki te ola ‵lei o tatou, te kilokiloga ‵se e uiga ki tupe, mo te fakamatamata o fakatāua malosi a ‵tou kilokiloga io me ko ‵tou tulaga.—15/1, itulau e 12-21.

Se a te mea e mafai o tauloto ne tatou mai te loto maulalo o Mose?

I lō te fakamatamata i tena tulaga pule, ne fakalagolago a Mose ki te Atua, kae e se ki a ia eiloa. E se ma‵nako lele tatou o talia a ‵tou malosi, pulega, io me ko mea e mafai ne tatou o fai ke fakamata‵mata tatou i ei; e ma‵nako tatou o tali‵tonu fakamaoni ki a Ieova. (Faata. 3:5, 6)—1/2, itulau e 5.

Ka ola i fea a tino kolā e toe faka‵tu aka?

Se aofaki foliki fua—144,000—ka ola i te lagi. Kae ko te tokoukega kolā ka toe faka‵tu aka, ka toe‵tu aka mo te fakamoemoega ke ola i te lalolagi nei ki te se-gata-mai.—1/3, itulau e 6.

Se a te uiga me i tino Isalaelu ne “seki pilitome i te loto”? (Iele. 9:26, NW)

Ne ‵teke mai latou ona ko te loto ma‵keke kae manakogina ke tapale kea‵tea a te mea telā ne fai ei ke ma‵keke olotou loto—ko mafaufauga, mea kolā e fiafia ki ei, io me ko lagonaga kolā e fe‵paki mo mafaufauga io me ko lagonaga o te Atua. (Iele. 5:23, 24)—15/3, itulau e 9-10.

Ne fai pefea a Iesu mo fai se fakaakoakoga o te tino telā ne maua ne ia se olaga aoga?

E isi sena galuega tāua ne fai i tena olaga, ko te faiga te loto o te Atua. Ne lasi ‵ki a tena alofa ki tena Tamana, kae ne alofa foki a ia ki tino. E ‵tusa mo pati i te Tusi Tapu, ne iloa ne Iesu i a ia e alofagina kae talia ne tena Tamana. Konā eiloa a kī ke maua se olaga aoga.—1/4, itulau e 4-5.

Ne a mea e aofia i te vaega faka-te-lalolagi o te fakapotopotoga a te Atua?

E aofia i ei te Potukau Pule, komiti o ofisa lagolago, ovasia faima‵laga, potukau o toeaina, fakapotopotoga, mo Molimau taki tokotasi.—15/4, itulau e 29.

Kaia e mafai ei o fai atu tatou i te Atua e se sauā i te fakaokomaiga o ana fakamasinoga?

E se fiafia a Ieova ki te ‵mate o tino amio ma‵sei. (Eseki. 33:11) E fakaasi mai i ana faifaiga ko ‵teka me e alofa eiloa a ia o fakailoa muamua ki tino a koi tuai o fakaoko mai tena fakamasinoga. E mafai ne te mea tenei o tuku mai se fakamoemoega ke ‵sao tatou i fakamasinoga a te Atua i te taimi mai mua.—1/5, itulau e 5-6.

E mata, ne fakasala ne te kau Isalaelu a pagota mai te fakatau‵tau i luga i lakau?

Ikai. Ne fai ne nisi atufenua mua kae sē ko te kau Isalaelu. I te taimi o Tusitusiga Tapu Epelu, a tino amio ma‵sei e tamate muamua mai te peipei ki fatu. (Levi. 20:2, 27) Ka oti, ko fakatautau ei te foitino mate ki luga i te lakau e pelā me se faka‵pulaga ki nisi tino.—15/5, itulau e 13.

Kaia e se mafai ei ne tino o aumai a te filemu ki te lalolagi?

Faitalia te uke o mea ko oti ne fakataunu ne tino, e se mafai ne latou o fakatonutonu olotou auala totino. (Iele. 10:23) E pule foki a Satani ki te lalolagi, tela la, e se mafai ne tino o aumai a te filemu ki te lalolagi. (1 Ioa. 5:19)—1/6, itulau e 16..