Ke ‵Poto I Te Faiga O Fakaikuga Totino

1, 2. E mata, e fiafia koe o fai a fakaikuga, kae pefea ou lagonaga ki nisi fakaikuga ne fai ne koe?

FAKAIKUGA! Fakaikuga! E fai ne tatou a mea konā i aso katoa. E pefea ou lagonaga ki vaegā fakaikuga e fai ne koe? E loto fia‵fia a nisi tino o fai a fakaikuga i a latou eiloa. E mafaufau latou me e saoloto latou o fai olotou fakaikuga totino, kae ita ma fai ne so se tino se fakaikuga mō latou. E ui i ei, e ma‵taku a nisi tino ma fai a fakaikuga tāua i olotou olaga. E ‵sala atu a nisi tino ki tusi fakatonutonu io me ko tino fakatonutonu kae fakamāumāu a tupe e uke ke maua a te fesoasoani telā e manakogina ne latou.

² A te tokoukega o tatou e ‵nofo fua i te kogaloto. E iloa ne tatou me e isi ne mea e se pule tatou ki ei kae seai se mea e mafai o fai ne tatou ki ei; kae loto fakafetai tatou me e mafai ne tatou o fai a fakaikuga i feitu e uke o te olaga e ‵tusa mo ‵tou manakoga. (Kala. 6:5) Kae e mafai o fakaasi tonu atu ne tatou me e se fai faeloa ne tatou a fakaikuga ‵poto io me aoga.

3. Ne a fakatakitakiga e fesoasoani mai ki a tatou ki te faiga o fakaikuga, kae kaia koi faigata te faiga o fakaikuga?

³ E pelā me ne tavini a Ieova, e fia‵fia tatou me ne tuku mai ne ia a fakatakitakiga manino e uiga ki te ukega o mea tāua i ‵tou olaga. E iloa ne tatou me kafai e tau‵tali tatou i fakatakitakiga konā, e fai ne tatou a fakaikuga kolā e fakafiafia ki a Ieova kae aoga ki a tatou. Kae kāti koi fe‵paki tatou mo fakalavelave mo tulaga kolā e se taku fakapitoa mai i te Muna a te Atua. E fakaiku aka pefea ne tatou a te mea e ‵tau o fai? Pelā me se fakaakoakoga, e iloa ne tatou me e se ‵tau mo tatou o kai‵soa. (Efe. 4:28) Kae se a te mea e fakavae ki ei te kaisoa? E mata, e taku pelā me se kaisoa ona ko te tāua o te mea telā ne puke, te pogai ne puke ei, io me se isi mea aka? E fakaiku aka pefea ne tatou māfai e fai mai a nisi tino me e seai se fakatakitakiga manino ki te mea e ‵tau o fai? Se a te mea e mafai o fesoasoani mai ki a tatou?

TE FAIGA O FAKAIKUGA MO TE MAFAUFAU ‵LEI

4. Ne a manatu fakatonutonu ne maua ne tatou māfai e fai ne tatou se fakaikuga?

⁴ Kafai e fai atu tatou ki se taina Kelisiano me e ‵tau o fai ne tatou se fakaikuga tāua, kāti e fai mai a ia ke fai ne tatou mo te mafaufau ‵lei. A te mea tenā se manatu ‵lei. E fakaasi mai i te Tusi Tapu ke fakaeteete tatou i te fai fakavave o se fakaikuga: “Kafai e sona gasue fakavave fua koe, e se mafai o uke au mea.” (Faata. 21:5) Se a la te uiga ke fai a fakaikuga mo te mafaufau ‵lei? E mata, e fakauiga i ei me e ‵tau mo tatou o faifai malie, mafaufau faka‵lei ki ei, ke loto malamalama, kae fai se fakaikuga ‵lei? A mea katoa konei e fesoasoani mai ke fai ne tatou se fakaikuga ‵lei, kae koi uke atu a mea e ‵tau o fai ko te mea ke fakagalue a te mafaufau ‵lei. ​—Lo. 12:3; 1 Pe. 4:7.

5. Kaia e seai ei se tino i a tatou e ‵lei katoatoa tena mafaufau?

⁵ E seai se tino i a tatou ne fanau mai e ‵lei katoatoa a tena mafaufau. Kaia la? I a tatou katoa ne fa‵nau mai i te agasala mo te tulaga sē ‵lei katoatoa, tela la, ko ‵mao tatou mai i te foitino io me ko te mafaufau ‵lei katoatoa. (Sala. 51:5; Lo. 3:23) I tafa i ei, ne aofia tatou i tino kolā ne “fakapouli” olotou mafaufau ne Satani; ne ‵teke muamua tatou ki a Ieova mo ana tulaga amio‵tonu. (2 Koli. 4:4; Tito 3:3) E tigā eiloa ne fakavae ‵tou fakaikuga ki te mea telā ne mafau‵fau tatou me e ‵lei kae ‵tau, ko fakaloiloi ne tatou a tatou eiloa faitalia me ne mafaufau ‵loto tatou ki te fakaikuga.​—Faata. 14:12.

6. Se a te mea e mafai o fesoasoani mai ke ati aka ne tatou se mafaufau ‵lei?

⁶ E ui eiloa ko ‵mao tatou mai i te foitino mo te mafaufau ‵lei katoatoa, a te ‵tou Tamana faka-te-lagi ko Ieova, e ‵lei katoatoa i feitu katoa. (Teu. 32:4) Se mea fakafiafia me ko oti ne fai ne ia ke mafai ne tatou o ‵fuli ‵tou mafaufau kae ati aka se mafaufau ‵lei. (Faitau te 2 Timoteo 1:7.) E pelā me ne Kelisiano, e ma‵nako tatou o mafau‵fau, fakasako‵sako kae gasue‵sue i se auala poto. E ‵tau o pule atu tatou ki ‵tou mafaufauga mo lagonaga kae fakaakoako ki mafaufauga, lagonaga, mo faifaiga a Ieova.

7, 8. Taku mai se tala ki te auala ne mafai ei o fai se fakaikuga poto faitalia a fakamalosiga mai i tino io me se tulaga faigata.

⁷ Mafaufau ki se fakaakoakoga. A te faifaiga masani a tino kolā e olo o ‵nofo i nisi fenua, ko te ave olotou pepe fatoa fa‵nau ki olotou kāiga i te fenua tonu ke tausi ki ei ko te mea ke tumau a mātua i te ga‵lue ke maua a tupe. Ne fanau ne se fafine e nofo atu i se fenua fakaa‵tea se pepe tagata tino gali. I te taimi tenā, ko kamata tou fafine o sukesuke ki te Tusi Tapu kae gasolosolo eiloa ki mua i te feitu faka-te-agaga. Ne kamata o fakamalosi atu a taugasoa mo kāiga ki tou fafine mo tena avaga ke ave a te pepe ki ana tupuna i te fenua tonu.a E ui i ei, ne matea ne tou fafine mai i tena sukesukega me i o ia te tiute ne tuku mai ne te Atua, e pelā me se mātua, ke puti aka a te tamaliki. (Sala. 127:3; Efe. 6:4) E mata, e ‵tau mo tou fafine o tautali i te tuu telā e fai ne te tokoukega o tino me se auala ‵lei? Io me e ‵tau o tautali a ia i mea kolā ne tauloto ne ia mai i te Tusi Tapu kae talia a tulaga faiga‵tai mea tau tupe mo te kaitaua mai o nisi tino? Se a te mea ne ‵tau o fai ne koe moi fai ko koe tenā?

⁸ Ona ko te ma‵losi o fakamalosiga, ne fakaasi atu ne tou fafine a mea i tena loto ki a Ieova ke maua se fakatakitakiga mai i a ia. I te taimi ne faipati atu ei a ia ki te tino telā e fai ne ia tena akoga mo nisi tino i te fakapotopotoga e uiga ki te fakalavelave, ne kamata o maua ne tou fafine a te mafaufau o Ieova e uiga ki te fakalavelave. Ne matea foki ne tou fafine a te fakamaseiga e mafai o oko ki lagonaga o tamaliki māfai e ‵vae kea‵tea mai i olotou mātua i te taimi koi kamata ei latou o tupu‵tupu aka. I te otiga ne mafaufau faka‵lei ki pati a te Tusi Tapu e uiga ki te fakalavelave, ne fakaiku aka ne tou fafine me se mea sē tonu ke ave kea‵tea a te pepe. Ne lavea ne tena avaga a te fesoasoani o tino o te fakapotopotoga mo te lasi o te fiafia mo te foitino malosi o te pepe. Ne talia ne tou tagata se akoga faka-te-Tusi Tapu kae kamata o kau ki fakatasiga fakatasi mo tena avaga.

9, 10. Se a te uiga ke fakaaoga te mafaufau ‵lei, kae e mafai pefea o fai ne tatou?

⁹ A te mea tenā se fakaakoakoga fua e tasi, kae e fakaasi mai i ei me i te fakaaogaga o se mafaufau ‵lei e se fakauiga fua ki te faiga o te mea telā e mafau‵fau tatou io me ko nisi tino me e ‵lei io me aoga. E mafai o faka‵tusa a ‵tou mafaufau mo loto sē ‵lei katoatoa ki se itula telā e tō vave io me tō tuai. A te fakalagolago ki ei e maua i ei ne tatou a fakalavelave e uke. (Iele. 17:9) E ‵tau o fakatonutonu aka ne tatou a ‵tou mafaufau mo ‵tou loto ki tulaga fakatuagagina o te Atua.​—Faitau te Isaia 55:8, 9.

¹⁰ Ona ko pogai ‵lei, e fakatonu mai te Tusi Tapu ki a tatou: “Talitonu ki te Aliki [Ieova] mo tou loto katoa. Sa fakalagolago lele eiloa ki tou iloa. Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu.” (Faata. 3:5, 6) Onoono la ki te tugāpati “sa fakalagolago lele eiloa ki tou iloa.” Kae ‵tao atu ki ei ko te “ke masaua faeloa ne koe a [Ieova].” A ia ko te Tino telā e ‵lei katoatoa tena mafaufau. Tela la, so se taimi e ‵tau ei o fai ne tatou se fakaikuga, e ‵tau o ‵kilo tatou ki loto i te Tusi Tapu me se a te kilokiloga a te Atua, ko mafai ei o fakavae ki ei a ‵tou fakaikuga. A te mea tenā ko te fakaaogaga o te mafaufau ‵lei​—e fakaakoako ei ki te mafaufau o Ieova.

AKOAKO A TE MALOSI O TOU MAFAUFAU

11. Se a te kī ki te faiga o fakaikuga ‵poto?

¹¹ E se faigofie faeloa a te faiga mo te fakataunuga o fakaikuga ‵poto. E mafai o faigata a te mea tenei ki tino kolā koi ‵fou ki te munatonu io me kolā ne fatoa kamata o gasolo ki mua i te feitu faka-te-agaga. Tela la, e mafai eiloa o ga‵solo tonu ki mua a pepe faka-te-agaga penā, e pelā mo pati i te Tusi Tapu. Ke mafaufau ki te auala e tauloto ei se tamaliki o sasale kae sē siga. A te kī ke iku manuia e fakalagolago faeloa ki te toe‵toe o ana ‵maga mo te fai faeloa. E penā foki a te pepe faka-te-agaga māfai ko oko ki te faiga o fakaikuga ‵poto. Masaua me ne fakamatala mai ne te apositolo ko Paulo i tino ma‵tua ko latou “kolā e fakamasani kae fakaaoga ne latou te malosi o olotou mafaufau, ke fakavasega aka ei a mea ‵tonu mo mea ‵se.” A pati ko te “fakamasani” mo te “fakaaoga” e fakauiga katoa ki te faiga faeloa o taumafaiga, kae tenā eiloa te mea e manakogina ke fai ne tino ‵fou. ​—Faitau te Epelu 5:13, 14.

12. E mafai pefea o tauloto ne tatou a te faiga o fakaikuga ‵poto?

¹² I aso takitasi, e ‵tau o fai ne tatou a fakaikuga lasi mo fakaikuga foliki e uke. E ‵tusa mo te sukesukega e tasi ne fai, e silia atu i te 40 pasene o ‵tou fakaikuga ne seki fakavae ki mea ne mafaufau tonu ki ei kae ne fakavae fua ki uiga masani. Pelā me se fakaakoakoga, kāti e fakaiku aka ne koe i taeao katoa me se a te gatu ka pei koe ki ei. E mafai o kilo koe ki te mea tenei e pelā me se mea foliki, kae fai tau fakaikuga e aunoa mo te mafaufau tonu ki ei, maise eiloa māfai koe e fakavave. Kae e tāua ke mafaufau faka‵lei koe me ko te gatu telā ka pei ne koe e fetaui mo tou tulaga e pelā me se tavini a Ieova io me ikai. (2 Koli. 6:3, 4) Kafai koe e ‵togi ou gatu, kāti e mafaufau koe ki vaegā gatu kolā ko lauiloa, kae pefea te mata‵lei mo te ‵togi? Ka fesoasoani mai a te faiga o filifiliga tonu i mea penei ke akoako te ma‵losi o ‵tou mafaufau, ke mafai ne tatou o fai a fakaikuga tonu i mea kolā e ‵lasi atu.​—Luka 16:10; 1 Koli. 10:31.

KE ATI AKA SE MANAKOGA O FAI A TE MEA TONU

13. Se a te mea e manakogina ke fakamautinoa aka me e tau‵tali eiloa tatou i fakaikuga kolā ko oti ne fai ne tatou?

¹³ E iloa ne tatou katoa i te faiga o te fakaikuga tonu se mea e ‵tau o fai, kae e se faigofie faeloa a te fakataunuga. Pelā me se fakaakoakoga, e ma‵nako a nisi tino o fakagata te ‵pusi kae e se malosi a te manakoga tonu ke fakagata. A te mea telā e manakogina ko te taumafai o tautali i te fakaikuga telā ko oti ne fai. E tali‵tonu a nisi tino me e tai ‵pau eiloa ‵tou manakoga mo se taganoa. Ko te lasi o te fakaaoga io me fakamalosi ne tatou, ko te momea aka foki o malosi. Kafai e se fakaaoga sāle ne tatou, ka gasolo ifo eiloa o vāivāi io me sē aoga. Se a la te mea e mafai o fesoasoani mai ke ati aka ne tatou io me fakamalosi aka a ‵tou manakoga ke ‵piki ‵mau kae fakataunu a te mea telā ko oti ne fakaiku aka ne tatou? A te ‵fuli atu ki a Ieova e mafai o fesoasoani mai ki a tatou.​—Faitau te Filipi 2:13.

14. Kaia ne malosi ei a Paulo o fai a te mea telā ne iloa ne ia e ‵tau o fai?

¹⁴ Ne iloa ne Paulo a te mea tenei mai i te mea ne oko ki a ia. E tasi te taimi ne fai mai ei a ia: “E isi se manakoga i loto i a au ke fai a te mea ‵lei kae se mafai ne au o fai.” Ne iloa ne tou tagata a te mea e manako a ia o fai io me ‵tau o fai, kae e isi se mea telā e taofi aka ei a ia mai i te fakataunuga o te mea tenā. Ne fakaasi tonu mai ne tou tagata: “Kae ko toku ‵kanoloto tonu eiloa e fiafia ki te tulafono a te Atua, kae e lagona foki ne au i toku foitino se isi tulafono telā e taua atu ki te tulafono i toku mafaufau kae e takitaki ne ia au ke pologa ki te tulafono o te agasala telā e nofo i toku foitino.” E mata, e seai se fakamoemoega i te tulaga telā ko oko a ia ki ei? Ikai. Ana muna: “Fakafetai ki te Atua e auala i a Iesu Keliso te ‵tou Aliki!” (Lo. 7:18, 22-25) Ne toe tusi mai foki tou tagata: “Me e maua ne au a te malosi i mea katoa e auala i a ia telā ne tuku mai ne ia te ‵mana ki a au.”​—Fili. 4:13.

15. Ne pokotia pefea a tino kolā ne aofia i fakaikuga tonu io me ko fakaikuga sē tonu?

¹⁵ Tela la, e ‵tau o fai ne tatou ne fakaikuga tonu ko te mea ke fakafiafia atu ki te Atua. Ke masaua a pati a Elia ki tino tapuaki ki a Paala mo aposetate Isalaelu i te Mauga o Kalamelu: “Ko afea e fai ei ne koutou se filifiliga tonu? Kafai te Aliki [Ieova] ko te Atua, tapuaki ki ei; kae kafai te Atua ko Paala, tapuaki atu ki ei.” (1 Tupu 18:21) Ne iloa ne fanau a Isalaelu a te mea e ‵tau o fai ne latou, kae ko sē iloa ne latou o ‘filifili.’ E ‵kese ‵ki eiloa mo tausaga mai mua atu me ne fai ne Iosua se fakaakoakoga ‵lei i te taimi ne fai atu ei a ia ki tino Isalaelu: “Kafai e se fia tavini koutou ki a ia, filifili i te aso nei me ko oi e fia tavini koutou ki ei, . . . Ka ko au mo toku kaiga, e tavini eiloa matou ki te Aliki [Ieova].” (Iosu. 24:15) Se a te mea ne iku mai i tena fakaikuga ne fai? Ne fakamanuia a Iosua mo latou kolā ne ‵piki ki a ia mai te ‵nofo i loto i te Fenua o te Folafolaga, “te fenua maumea kae laukele ola.”​—Iosu. 5:6.

FAI A FAKAIKUGA ‵POTO KAE KA MANUIA KOE

16, 17. Fakamatala mai a mea aoga kolā e mafai o maua mai i te faiga o fakaikuga e ‵tusa mo te loto o te Atua.

¹⁶ Ke mafaufau ki se fakanofonofoga fakamuli nei. A te taina fatoa papatiso ko avaga, kae ko tokotolu a lā tamaliki fo‵liki mo tena avaga. I te aso e tasi, ne manatu aka se tino galue ke olo lāua mo te taina ki te suā kamupane me e tai lasi te togi i ei kae e isi foki ne nisi mea aoga e maua i ei. Ne mafaufau kae ‵talo a ‵tou taina e uiga ki ei. Ko oti ne filifili ne tou tagata a tena galuega mua, telā e tai feoloolo te togi i ei ko te mea ke sē galue a ia i fakaotiga o vaiaso, ke mafai o kau a ia ki fakatasiga kae ‵kau fakatasi mo tena kāiga i te galuega talai. Ne matea ne ia me kafai e maua ne ia te galuega fou, ka sē fai ne ia a mea konā mō se taimi tai mata leva. Se a te mea ne mafai o fai ne koe?

¹⁷ I te otiga ne mafaufau ki te auala ka pokotia ei a tena feitu faka-te-agaga, ne seki talia ei ne te taina a te galuega fou. E mata, e mafaufau koe me ne salamō a ia i tena fakaikuga? Ikai. Ne manatu aka tou tagata i fakamanuiaga faka-te-agaga e aoga fakafia atu ki a ia mo tena kāiga i lō se ‵togi maluga. Ne fia‵fia ‵ki eiloa tou tagata mo tena avaga i te taimi ne fai atu ei te lā tamaliki fafine matua ko sefulu ana tausaga, i a ia e alofa ki ana mātua, alofa ki taina mo tuagane, kae alofa malosi ki Ieova. Muna a tou fafine me ne manako a ia o tuku atu tena ola ki a Ieova kae papatiso. Ko oko eiloa i te loto fakafetai o tou fafine ki te fakaakoakoga ‵lei a tena tamana i te fakamuamuaga o te tapuakiga ki a Ieova i tena olaga!

18. Kaia e tāua ei ke fai ne tatou taki tokotasi a fakaikuga ‵poto i aso takitasi?

¹⁸ Ne takitaki eiloa ne te Mose Sili, ko Iesu Keliso, a tino tapuaki ‵tonu o Ieova i te koga lavaki o te lalolagi a Satani i tausaga e uke. E pelā me ko te Iosua Sili, ko toka nei a Iesu o fakaseai a te lalolagi sē fakamaoni kae ‵taki atu ana soko ki te lalolagi fou kae amiotonu telā ne folafola mai. (2 Pe. 3:13) Tela la, e se tenei te taimi ke toe ‵foki tatou ki ‵tou vaegā mafaufauga mua, vaegā olaga mua, mea kolā ne fakatāua ne tatou, mo mea kolā ne kausaki ki ei. Tenei eiloa te taimi ke malamalama faka‵lei tatou me se a te loto o te Atua mō tatou. (Lo. 12:2; 2 Koli. 13:5) Ke fakaasi mai i fakaikuga mo filifiliga e fai ne koe i aso takitasi i a koe ko te vaegā tino telā e ‵tau o maua a fakamanuiaga sē-gata-mai a te Atua.​—Faitau te Epelu 10:38, 39.