Ne Oko Mai Pefea Tatou ki Konei?

Ke fakatoetoe aka i nai pati, e fakamatala mai i te Kenese, te tusi muamua i te Tusi Tapu, a te kamataga o te iunivesi: “I te kamataga o te faitega ne te Atua te lagi mo te lalolagi.” (Kenese 1:1) Mai tua o te faitega ne te Atua o lakau mo manu, ne faite ei ne ia a tino muamua, ko Atamu mo Eva. Ne ‵kese lāua mai i manu me ne mafai ne tino o fakaasi atu a uiga o te Atua, e aofia i ei te saolotoga. Tela la, ne ‵tau eiloa o panaki mo lāua a ikuga o mea e fai ne lāua. Kafai ne faka‵logo lāua ki fakatonuga a te Atua, ne mafai o aofia lāua i te fuafuaga a te Atua e pelā me ko mātua muamua i te kāiga faka-te-foitino telā ne mafai o maua ne latou a te olaga filemu kae ‵lei i te lalolagi ki te se-gata-mai.

Kae ne maua ne se agelu, io me se tino faka-te-agaga, a te avanoaga ke fakaaoga a tino ke fakataunu ei ana manakoga kaiu. Ne fai ei a ia mo fai Satani, telā e fakauiga ki te “Tino ‵Teke.” E auala i se gata, ne fakaloiloi ei ne Satani a Eva, mai i ana pati, me e ‵lei atu eiloa tena olaga e aunoa mo te takitakiga a te Atua. Ne tau‵tali atu a Atamu mo Eva ki a Satani, telā ne fakagata ei te lā sokoga ki te Tino ne faite ne ia lāua. Ona ko te lā filifiliga masei, ne galo atu ei i ‵tou mātua muamua a te ola se-gata-mai kae ne faka‵solo mai fua ne lāua ki a tatou katoa a te agasala, te tulaga sē ‵lei katoatoa, mo te mate telā e seai eiloa se tino e mafai o sao mai i ei.

I konā foki eiloa, ne folafola atu ei ne te Atua tena manakoga ke toe faka‵lei aka a te tulaga fakafanoanoa tenei kae ne tuku atu ei se auala ki tama‵liki a Atamu ke maua a te ola se-gata-mai. Ne ‵valo mai ne te Atua me e isi se “fanau”​—se tino fakapito​—ka fakaseai fakamuli ne ia a Satani kae toe faka‵lei aka a logo‵maega kolā ne māfua mai i a Satani, Atamu, mo Eva. (Kenese 3:15) Ko oi la te “fanau” tenā? Ka fakaasi fakamuli mai eiloa.

I te taimi tenei, ne taumafai faeloa a Satani o fakagata a te fuafuaga ‵lei a te Atua. Ne gasolo aka fakavave o tokouke a tino agasala kae amio ma‵sei. Ne fakaiku aka ne te Atua ke fakaseai atu a tino ma‵sei i te lolo. Ne fakatonu atu a ia ki a Noa ke faite se vaka​—se pokisi lasi telā e mafai o lagalaga​—ke faka‵sao ei a ia mo tena kāiga, fakatasi mo manu kolā ne fakatonu atu ke ave ki loto i te vaka.

I se tausaga mai tua ifo o te kamataga o te Lolo, ne ulu atu ki tua mo te vaka a Noa mo tena kāiga ki se lalolagi ‵ma. Kae ne seki sae mai eiloa a te “fanau.”

​—E fakavae eiloa ki te Kenese, mataupu e 1-11; Iuta 6, 14, 15; Fakaasiga 12:9.