Te Fiafia Mai te Ola i se Olaga Faigofie

NE AVAGA a Daniel mo Miriam i a Setema i te 2000 kae ne ‵nofo i te fa‵kai o Barcelona, i Sepania. “Ne ola māua i se olaga telā e fai pelā me se olaga masani,” ko te fakamatalaga a Daniel. “Ona ko ma galuega ‵togi, ne mafai ne māua o ‵kai i fale ‵kai ‵togi ‵mafa, faima‵laga atu ki nisi fenua, kae ‵pei foki ki toe gatu ‵gali eiloa. Ne ‵kau atu foki faeloa māua ki te galuega talai.” Kae ne fai eiloa se ‵fuliga.

I te fono i te 2006, ne otia malosi a Daniel i se lāuga telā ne fakasae aka ei a te fesili: “E mata, e fai ne tatou te ‵toe mea e mafai o fai ke fesoasoani atu ki a latou kolā ‘ka tamate’ ke olo atu i te auala ki te ola se-gata-mai?” (Faata. 24:11) Ne faka‵mafa mai i ei a te tiute ke fakailoa atu a te fekau fakaola tino i te Tusi Tapu. (Galu. 20:26, 27) E fai mai ne Daniel ana mea ne masaua, “Ne maua ne au se lagonaga me ko faipati mai eiloa a Ieova ki a au.” Ne taku mai foki i te lāuga me i te momea aka o mea e fai i te galuega talai e iku atu ki te mauaga o te fiafia telā e sili atu. Ne iloa ne Daniel me e tonu te mea tenei. Ko oti ne kamata o paenia a Miriam kae ne maua eiloa ne tou fafine a fakamanuiaga fakafia‵fia.

E fai mai a Daniel, “Ne fakaiku aka ne au me tenei eiloa te taimi ke fai ne au se ‵fuliga lasi ‵ki.” Kae ne fai eiloa ne ia. Ne ‵kati ifo ne ia ki lalo ana itula ga‵lue, ne kamata o paenia, kae mafaufau ki te fiafia ne mafai o maua ne lāua mo Miriam mai te tavini atu i se koga telā e manakogina malosi ei a tino talai o te Malo.

MEA FAIGA‵TA MUAMUA—KAE ‵SOKO ATU A TALA FAKAFIA‵FIA

I a Me 2007, ne tiaki ne Daniel mo Miriam lā galuega ‵togi kae olo atu ki Panama, se fenua telā ne asi atu muamua lāua ki ei. Ne aofia i te lā koga talai fou a nai fenua mo motu i Bocas del Toro i te Tai o te Caribbean, kolā e ‵nofo i ei a te tokoukega o tino Guaymi. Ne mafau‵fau a Daniel mo Miriam me kafai e fakaaoga lā tupe ‵teu, ko mafai ei o ‵nofo lāua i Panama mō se valu masina.

Ne faima‵laga atu lāua ki fenua konā i se poti mo pasika-ta-ki-vae, kae ne masaua ‵lei ne lāua te taimi muamua ne ‵tele atu ei lāua i pasika-ta-ki-vae—kāti i se 20 maila (32 km) i luga i tamā mauga kolā toeitiiti ko ‵tonu loa ki luga, mai lalo i te ‵vela o te la. Toeitiiti kae matapo a Daniel ona ko te fi‵ta. Kae i fale ne olo atu lāua ki ei i te lā auala, ne talimalo faka‵lei lāua ne kāiga Guaymi, maise eiloa māfai ko iloa ne te tauavaga a nai tugapati i te lotou ‵gana. E seki leva kae ne fai ne te tauavaga a akoga faka-te-Tusi Tapu e 23.

Kae i te taimi ne oti ei lā tupe, ne ‵fuli eiloa a te fiafia o te tauavaga ki te fanoanoa. Ne fai mai a Daniel: “Ne kamata māua o mafau‵fau mo loimata i ma mata e uiga ki te ‵toe ‵foki atu ki Sepania. Ne fanoa‵noa malosi māua ke tiaki ma akoga faka-te-Tusi Tapu.” Kae i se masina mai tua ifo, ne maua ne māua se tala fakafiafia. E fai mai a Miriam: “Ne ‵kami māua ke tavini atu e pelā me ne paenia fakapito. Ne fia‵fia malosi eiloa māua ke tumau i te ma galuega!”

TE ‵TOE MEA FAKAFIAFIA KI A LĀUA

I te 2015, ona ko fakama‵fuliga i te fakapotopotoga, ne fakamolemole mai ke faka‵soko atu te ma taviniga e pelā me ne paenia tumau. Se a te mea ka fai? Ne maua ne lāua te loto talitonu ki te folafolaga i te Salamo 37:5: “Tuku atu katoa a koe ki te Aliki [ko Ieova]; fakatuanaki ki a ia, kae ka fesoasoani a ia ki a koe.” Ne maua ne lāua a galuega ‵togi ke tausi atu ki a lāua i te lā galuega paenia, kae nei la ko tavini atu lāua i se fakapotopotoga i te fa‵kai o Veraguas, i Panama.

E fai mai a Daniel: “A koi tuai o tiaki ne māua a Sepania, ne seki iloa tonu me ne mafai o ola māua i se olaga faigofie. I aso nei ko mafai, kae ne maua faeloa ne māua a toe mea tāua.” Se a te ‵toe mea fakafiafia ki a lāua? E fai mai a ia, “A te fesoasoani atu ki tino loto maulalo ke tauloto e uiga ki a Ieova se mea fakafiafia telā e seai se mea e mafai o fakatusa ki ei!”