Fesili Mai Tino Fai‵tau

Kafai e ‵moe tasi se tagata mo se fafine kolā e se avaga i se fale e tasi e aunoa mo ne pogai ‵tau, e mata, a te mea tenā se agasala telā e manakogina ke fai se fakamasinoga ki ei?

E tonu, kafai e seai ne pogai ‵tau ke ‵moe tasi se tokolua kolā e seki avaga, ka fai eiloa ne te komiti fakamasino se fakamasinoga telā e fakavae ki fakamaoniga ‵tonu me ne aofia lāua i faifaiga fakatauavaga sē ‵tau.—1 Koli. 6:18.

E sukesuke faka‵lei ne te potukau o toeaina a tulaga takitasi konā ke fakaiku aka me e mata e manakogina ke fakatoka ne te komiti fakamasino io me ikai. E pelā me se fakaakoakoga: E mata, ko leva ne isi se fesokotakiga fakafamau o lāua? E mata, ko oti ne polopoloki ‵mafa muamua lāua e uiga ki lā faifaiga konei? Ne a tulaga kolā ne takitaki atu ei lāua ke ‵moe fakatasi i se po? E mata, ko leva ne palani ne lāua te mea tenā? E mata, ne ‵tau o mafau‵fau lāua ki te mea tenā, io me isi ne pogai ne ‵sae aka, kāti se fakalavelave tupu fakafuasei telā ne fai ei ke iku atu lāua ki te ‵nofo fakatasi i te po tenā? (Fai. 9:11) A lāua ne ‵moe i fea? E tiga eiloa e mafai o kese‵kese a tulaga konā, kae kāti e isi aka foki ne nisi pogai kolā e ‵tau o sukesuke faka‵lei ne toeaina.

Kafai ko oti ne fakapa‵tonu aka a manatu konā, ka fakaiku aka ei ne te potukau o toeaina me e mata, e ‵tau o fakamasino a lāua konei io me ikai.