Ke Momea Aka Faeloa ‵Tou Atamai i te Galuega Talai—Te Fakafesagai Atu ki Mea Kolā e Mafai o Fakagata ei a Sau‵talaga
Te Pogai e Tāua ei: Mafaufau me ko pili o tupu se fakalavelave. Ka ‵mate a tino vagana ke ‵tele atu latou ki se koga ke ‵sao latou i ei. E fanatu koe ki te fale o tou tuakoi ke fakailoa atu ki a ia, kae e fai mai a ia, me i a ia ko tō fakalavelave. E mautinoa eiloa, me ka se taofi fakavave aka ne koe au taumafaiga ke fesoasoani atu ki a ia! E se talia tatou ne tino e tokouke i te ‵tou koga talai, kae e se iloa ne latou a te tāua o te ‵tou fekau fakaola tino. I te taimi e āsi atu ei tatou, kāti e fakalave‵lave latou. (Mata. 24:37-39) Io me kāti ne maua ne latou se lagonaga fakailoga tino ona ko tala sē ‵tonu. (Mata. 11:18, 19) Kāti e mafau‵fau latou me e seai se ‵kese o tatou mai i lotu kolā e ‵fua mai i ei a fuataga ma‵sei. (2 Pe. 2:1, 2) Kafai ne seki fiafia muamua te tino i te fale, e se ‵tau o fakagata fakavave aka ‵tou taumafai ki ei.