Fakamanuiaga mō Latou Kolā e Faka‵logo ki te Atua

Ne fai mai te pelofeta ko Mose me kafai e faka‵logo tatou ki fakatonuga a te Atua, ka maua ne tatou ana fakamanuiaga. (Teutelonome 10:13; 11:27) E se faka‵logo tatou ki te Atua ona ko te ma‵taku i tena fakasalaga. E fakamalosi tatou ne uiga ‵gali o te Atua ke faka‵logo ona ko te ‵tou a‵lofa ki a ia kae ma‵nako o ‵kalo kea‵tea mai te fakafanoanoa a ia. “Tenei te uiga o te alofa ki te Atua, ko te fakalogo ki ana fakatonuga.”—1 Ioane 5:3.

Kae e mafai pefea o iku atu te fakalogo ki te Atua ki te mauaga o ana fakamanuiaga? Mafau‵fau ki auala e lua.

1. A TE FAKALOGO KI TE ATUA KA FAI NE IA TATOU KE ‵POTO

“Au, Ieova, ko tou Atua, ko te Atua telā e akoako ne ia koe ke ‵lei koe . . . takitaki ne ia koe ki te auala e ‵tau o sasale ei koe.”—ISAIA 48:17.

A Ieova te Atua, te ‵tou Mafuaga, e iloa ne ia tatou kae e tuku mai ne ia a te takitakiga e manakogina ne tatou. Kafai e ma‵nako tatou ko ana akoakoga ke fesoasoani mai i te faiga o fakaikuga ‵poto, e ‵tau o tauloto ne tatou a mea e manako te Atua ke fai ne tatou mai te Tusi Tapu, kae ke fakagalue ne tatou a akoakoga konā.

2. A TE FAKALOGO KA FAI NE IA TATOU KE FIA‵FIA

“E fia‵fia a latou kolā e lagona ne latou te muna a te Atua kae tausi ki ei!”—LUKA 11:28.

I aso nei, e maua ne te fia miliona o tino kolā e faka‵logo ki te Muna a te Atua a te fiafia tonu. E pelā me se fakaakoakoga, mafaufau ki se tagata i Sepania telā ne masani o ita vave kae fai fakamasei ne ia a nisi tino—e aofia i ei tena avaga. Ne faitau ne ia i se aso e tasi a tusitusiga a te pelofeta ko Mose e uiga ki te loto maulalo o Iosefa, te tama tagata a Iakopo. A Iosefa ne fakatau atu ki tua pelā me se pologa kae ‵pei ki te falepuipui ona ko fakamasinoga sē ‵tonu; kae ne tumau eiloa a ia i te loto maulalo, uiga filemu kae loto fakamagalo. (Kenese, mataupu 37-45) Ne fai ‵tonu mai te tagata Sepania, penei: “A te mafaufau ki te fakaakoakoga a Iosefa ne fakamalosi mai ki a au ke ati aka te loto maulalo, te uiga atafai, mo te loto pulea. Ona ko te mea tenā, ko maua nei ne au se olaga fiafia.”

E maua i te Tusi Tapu a fakatakitakiga e uke e uiga ki te auala e ‵tau o fai faka‵lei ki nisi tino. Mafaufau ki nisi fakamatalaga i te suā mataupu telā ka ‵soko mai.