Filifili ki se Olaga e Manako Koe ki ei i Aso Mai Mua

I se 3,500 tausaga ko ‵teka, ne fai atu a Ieova te Atua ki tino kolā ne tapuaki atu ki a ia a mea e ‵tau o fai ne latou ke maua se olaga gali i aso mai mua: “Ko oti ne tuku ne au i otou mua a te ola mo te mate, te manuia mo te malaia; kae e ‵tau mo koe o filifili a te ola ko te mea ke ola koe, ko koe mo tino ne ‵tupu mai i a koe.”—Teutelonome 30:19.

Ke maua se olaga gali i aso mai mua, ne ‵tau mo tino konā o fai se filifiliga tonu. E fai foki ne tatou te filifiliga tenā i aso nei. E fakamatala mai i te Tusi Tapu a te auala ke filifili ki se olaga gali i aso mai mua: “Mai te alofa ki a Ieova tou Atua, mai te fakalogo ki tena leo.”—Teutelonome 30:20.

E A‵LOFA KAE FAKA‵LOGO PEFEA TATOU KI A IEOVA?

SUKESUKE KI TE TUSI TAPU: Ke alofa ki a Ieova, e ‵tau mo koe o sukesuke muamua ki te Tusi Tapu e uiga ki a ia. Kafai e fai koe penā, ka iloa ne koe me i a ia se Atua alofa telā e manako ke maua ne koe te ‵toe mea ‵lei. E ‵kami ne ia koe ke ‵talo atu ki a ia “me e atafai a ia ki a” koe. (1 Petelu 5:7) E tauto mai te Tusi Tapu me kafai e taumafai koe ke fakapilipili atu ki a ia, kae “ka fakapilipili mai a ia ki a” koe.—Iakopo 4:8.

FAKAGALUE AU MEA KO ILOA: Ke fakalogo ki te Atua, ko te tautali ki ana fakatakitakiga ‵poto kolā e maua i te Tusi Tapu. Kafai e fai koe penā, “ka manuia ei ou auala kae ka gasuesue foki koe mo te poto.”—Iosua 1:8.