Tou Olaga i Aso Mai Mua, Tau Filifiliga!

E MATA, E ISI SAU FILIFILIGA TONU KI TE VAEGĀ OLAGA KA MAUA NE KOE I ASO MAI MUA? E tali‵tonu a nisi tino me i mea e ‵tupu ki olaga o tino i aso mai mua e se ‵tupu ona ko olotou filifiliga totino, kae ne mea loa ko oti ne fakatoka ke ‵tupu ki te tino. Kafai e se taunu olotou nisi fakamoemoega, e fakaiku eiloa ne latou me ne tulaga kolā e se mafai o fakasekegina. “Se mea eiloa ko oti ne fakaiku aka ke mo a eiloa e taunu!” ko olotou pati.

A nisi tino kāti ko ‵to manava‵se māfai e lavea ne latou me e seai se faka‵leiga ki te lalolagi matagā kae sē fai mea tonu tenei. Kāti ko oti ne taumafai latou o fakafaigofie aka olotou olaga—kae lavea atu faeloa a mea pelā mo taua, amioga ma‵sei, fakalavelave o te natula, mo masaki ei kolā e fakaseaoga faeloa i ei olotou palani e fai i taimi katoa. E ‵sili ifo eiloa latou ki a latou penei, ‘Kaia ka ‵saga atu fua ki ei?’

E tonu, me i fakanofonofoga i te olaga e mafai o pokotia i ei a ‵tou palani ki mea ko oti ne fakatoka ne tatou. (Failauga 9:11) E tiga i ei, kafai ko oko mai ki tau filifiliga e uiga ki tou olaga mō aso mai mua, ka fai eiloa ne koe se filifiliga tonu kae mautinoa e uiga ki ei. E tonu, e fakaasi mai i te Tusi Tapu me i tou olaga i aso mai mua e faka‵na eiloa ki tau filifiliga tenā. Ke onoono ki mea e fakaasi mai i ei.

A Mose, te takitaki o tino Isalaelu i aso mua, ne fai atu ki tino i te taimi tenā kae ko pili eiloa o ulu atu latou ki te Fenua o te Folafolaga: “Ko oti ne tuku atu ne au i otou mua a te ola mo te mate, te manuia mo te malaia; kae e ‵tau mo koe o filifili a te ola ko te mea ke ola koe mo tino ne ‵tupu mai i a koe, mai te alofa ki a Ieova tou Atua, mai te fakalogo ki tena leo, kae mai te ‵piki ‵mau ki a ia.”—Teutelonome 30:15, 19, 20.

“Ko oti ne tuku ne au i otou mua a te ola mo te mate, te manuia mo te malaia; kae e ‵tau mo koe o filifili a te ola.”—Teutelonome 30:19

E tonu! Ne faka‵sao ne te Atua a tino Isalaelu mai te ‵nofo pologa i Aikupito kae tuku atu ki mua o latou a avanoaga ke maua se olaga saoloto kae fakafiafia i loto i te Fenua o te Folafolaga. Kae e se maua tauanoa fua ne latou a mea katoa konei. Ke maua ne latou a fakamanuiaga konei, e ‵tau eiloa mo latou o “filifili a te ola.” Pefea la? ‘Mai te a‵lofa o latou ki te Atua, faka‵logo ki tena leo, kae ‵piki ‵mau ki a ia.’

I aso nei, e ‵pau foki eiloa a te filifiliga e tuku mai i ou mua, kae ko mea kolā e filifili ne koe ke fai, ka iloa i ei me se a te vaegā olaga ka maua ne koe i aso mai mua. Kafai e filifili koe ke alofa ki te Atua, fakalogo ki tena leo, kae ‵piki ‵mau ki a ia, ko tena uiga ko filifili eiloa ne koe a te ola, ko te ola se-gata-mai i te lalolagi palataiso. Kae se a te mea e aofia i mea takitasi konei?

FILIFILI KE ALOFA KI TE ATUA

A te alofa ko te uiga tāua ‵ki o te Atua. “Te Atua ko te alofa eiloa a ia,” ne tusi mai te apositolo ko Ioane. (1 Ioane 4:8) Ona ko te pogai tenei, i te taimi ne fakafesili atu i ei me tefea loa te ‵toe tulafono tafasili i te maluga i tulafono katoa, ne tali atu a Iesu: “E ‵tau mo koe o alofa ki a Ieova tou Atua mo tou loto kātoa mo tou ola kātoa mo tou mafaufau kātoa.” (Mataio 22:37) E se ‵tau fua o fakavae a te fesokotakiga o se tino mo Ieova te Atua ki te mataku valea, kae ki te alofa tonu. Kae kaia la e ‵tau ei mo tatou o filifili ke a‵lofa ki a ia?

A te alofa o Ieova mō tino e pelā eiloa mo te a‵lofa o mātua ki olotou tama‵liki. Faitalia me sē ‵lei katoatoa, a mātua a‵lofa e fakatonutonu, e fakama‵losi, e ‵lago kae polopoloki foki olotou tama‵liki me e ma‵nako latou ke fia‵fia kae ke manuia olotou olaga. Kae se a te mea e fakamoe‵moe ki ei a mātua? E ma‵nako latou ke a‵lofa atu olotou tama‵liki ki a latou kae ke puke ‵mau ki olotou loto a akoakoga kolā ne tuku atu ne latou mātua mō te ‵lei o latou. E a, e se tenā foki a te mea e manako ki ei a te ‵tou Tamana ‵lei katoatoa faka-te-lagi ke fakaasi atu ne tatou a te ‵tou a‵lofa ki a ia mō mea ‵lei katoa ne fai ne ia mō tatou?

FAKALOGO KI TENA LEO

I te ‵gana Epelu telā ne ‵fuli ki ei a te Tusi Tapu, a te pati “fakalogologo” e aofia i te manatu “fakalogo.” E a, e se tenei te mea e fakauiga tatou ki ei māfai e fai atu tatou ki se tamaliki, “fakalogo ki ou mātua”? Tela la, a te fakalogo ki te leo o te Atua e fakauiga loa ki te tauloto kae fakalogo ki ana pati e fai mai. Ona ko te mea e se lagona tonu ne tatou a te leo o te Atua, e faka‵logo tatou ki a ia mai te fai‵tau kae fakagalue ne tatou ana pati i loto i tena Muna, ko te Tusi Tapu.—1 Ioane 5:3.

I se taimi e tasi, ne fakaasi mai ne Iesu a te tāua ke faka‵logo tatou ki te leo o te Atua i ana pati: “E se ko meakai fua e ola i ei te tagata, kae ko pati katoa kolā e ‵to mai i te gutu o Ieova.” (Mataio 4:4) E pelā mo te tāua o mea‵kai faka-te-foitino ki a tatou, a te tauloto ki te iloa e uiga ki te Atua e sili atu i te tāua. Kaia? Ne fai mai te Tupu poto ko Solomona: “Me i te poto se puipuiga e pelā eiloa mo tupe se puipuiga, kae e tenei te aoga o te iloaga: A te poto e tausi ne ia tena matai ke ola.” (Failauga 7:12) A te iloaga mo te poto mai te Atua e mafai o puipui i ei tatou i aso nei kae e fesoasoani mai ke fai ne tatou a filifiliga ‵poto ke maua ne tatou a te ola se-gata-mai i aso mai mua.

‵PIKI ‵MAU KI A IA

‵Toe mafaufau ki te tala fakatusa a Iesu ne sau‵tala tatou ki ei i te mataupu mai mua atu, ana pati: “E mataliki te mataloa kae sai‵tia te auala telā e tau atu ki te ola, kae e mu‵tana fua a tino e maua ne latou.” (Mataio 7:13, 14) Kafai e faima‵laga atu i se vaegā auala penā, ka maua eiloa ne tatou a mea aoga māfai e tau‵tali fakapili‵pili atu tatou ki se tino poto telā e iloa ‵lei ne ia te auala telā e mana‵ko ke oko tatou ki ei—ko te auala ki te ola se-gata-mai. Tela la, se pogai ‵lei ‵ki ke ‵nofo fakapili‵pili atu tatou ki te Atua. (Salamo 16:8) Kae ka fai la pefea ne tatou a te mea tenā?

I aso katoa, e uke ‵ki a mea kolā e ‵tau o fai ne tatou, kae e uke atu foki a mea e ma‵nako tatou ke fai. Kae e mafai o fai a mea konā mo fakalavelave ki a tatou ko te mea ke mu‵tana io me ko te mea ke seai eiloa se taimi o tatou o fai a te mea e manako a te Atua ke fai ne tatou. Kae e tenā loa a te mea e fakamasaua mai i te Tusi Tapu ki a tatou: “Ke fakaeteete faeloa koutou i te auala e sa‵sale ei koutou, e se pelā me ne tino va‵lea kae e pelā mo tino ‵poto. Ke fakaaoga otou taimi ki toe mea aoga, me i aso konei ko aso ma‵sei.” (Efeso 5:15, 16) E fakapili‵pili tatou ki te Atua mai te mauaga o se fesokotakiga ‵lei mo ia e pelā me ko te ‵toe mea tāua i ‵tou olaga.—Mataio 6:33.

I A KOE TE FILIFILIGA

E tiga eiloa e se mafai ne koe o ‵fuli au mea ne fai i taimi ko ‵teka, kae e mafai eiloa ne koe o fai se fakatokaga ke maua ne koe fakatasi mo ou kāiga pele se olaga gali i aso mai mua. E fakaasi mai ne te Tusi Tapu me i te ‵tou Tamana faka-te-lagi, ko Ieova te Atua, e alofa malosi ‵ki eiloa ki a tatou kae manako a ia ke iloa ne tatou a mea kolā e manako a ia ke fai ne tatou. Ke onoono ki pati a te pelofeta ko Mika:

“Ne fai atu ne ia ki a koe te mea ‵lei, e te tagata. Kae se a te mea e manako ki ei a Ieova mai i a koe? Ke fai fua ne koe te fakamasinoga tonu, ke fakatāua te fakamaoni, kae ke sasale i te loto maulalo fakatasi mo tou Atua!”—Mika 6:8.

E mata, ka talia ne koe a te ‵kamiga a Ieova ke sa‵sale fakatasi mo ia ke maua ne koe a fakamanuiaga e uke kolā e seai se gataga ki ei mō latou kolā e talia ne latou a tena ‵kamiga? I a koe eiloa te filifiliga!