Ade A Wɔde Kame Wɔ Ne Bere, Adekyɛ Wɔ Ne Bere

SAA aserewa fɛfɛ yi si ne dubaa so na ɔte ahobammɔ nka. Ne hokafo bɔ ne ho ban yiye. Sɛ onini foforo bɛn no a, ne hokafo no ba bɛyɛ ntakraboa a ne bo afuw na ɔpam ogyigyefo no fi ‘n’agyapade’ ho. Ɔyɛ aboa ketewaa a ɔde ade kame.

Ɔkraman a ɔyɛ onipa “adamfo a ɔsen biara” no nso yɛ ade a wɔde kame ho nhwɛso foforo. Sɛ wunsusuw saa a, wode bɔ mmɔden sɛ wubegye ne dompe afi ne nsam ara kwa! Wotumi hu ade a wɔde kame su yi wɔ mmofra mu mpo.

So woahu mmofra nkumaa baanu a wɔn nyinaa pɛ sɛ wɔde agodi ade koro no ara di agoru pɛn? Obiako kura agodi ade no wɔ ne nsam. Ɔfoforo no bɔ mmɔden sɛ obegye, nanso nea odi kan no de nteɛteɛm pow sɛ obegyaa mu. Ɛyɛ “ne de,” na wasi ne bo sɛ obekura mu saa ara.

So ɛyɛ bɔne sɛ wode w’agyapade bɛkame obi anaa? Bible no de obi ankasa agyapade ho nnyinasosm si hɔ. Nnipa besisi adan na wɔatra mu, wɔbɛyeyɛ bobe nturo na wɔadi mu aba, na wɔbɛtra wɔn ankasa bobe ne wɔn brɔdoma ase. (Yesaia 65:21; Mika 4:4) Aserewa no na odii kan baa hɔ na na ohia n’asasesin na wanya aduan ama n’abusua. Wɔde dompe no maa ɔkraman no na ɛho hia na amma ɔkɔm anne no.

Nanso abofra no ne n’agodi ade no nso ɛ? Ɛyɛ n’agyapade, nanso sɛ wamma afoforo anni ho agoru bi a, ɔrennya wɔn a ɔne wɔn bedi agoru. Sɛ ɔne afoforo kyɛ n’agyapade a na n’ani begye kɛse. Ɛnsɛ sɛ Kristofo ma wɔn werɛ fi “adekyɛ.”

Wotu adefo fo sɛ “wɔnkyɛ ade fɛw so na wɔn nsa nteɛ.”​—Hebrifo 13:16; 1 Timoteo 6:18; Asomafo no nnwuma 20:35.

Ade a wɔde kame bere wɔ hɔ na adekyɛ bere nso wɔ hɔ. Nanso ne nyinaa akyi no ɛsɛ sɛ yɛkae sɛ “asase ne n’ade dodow yɛ [Yehowa] dea, wiase ne wɔn a wɔtete mu nyinaa.” (Dwom 24:1) Sua sɛnea wode nneɛma a ɛyɛ yɛn de wɔ bere tiaa bi mu no bedi dwuma wɔ ɔkwan a ne Wura ankasa, Yehowa Nyankopɔn ani begye ho so. Ná Israel Hene Dawid yɛ ɔdefo, nanso ɔkaa no nokwarem kyerɛɛ Yehowa sɛ: “Wo [Yehowa] na kɛseyɛ ne mmaninyɛ ne anuonyam ne nimdi ne aseda wɔ wo, na nea ɛwɔ soro ne asase so nyinaa wɔ wo. Wo, [Yehowa] na ahenni wɔ wo . . . Na ahonya ne anuonyam fi w’anim.”​—1 Beresosɛm 29:11, 12.

Sɛ́ anka Dawid de nea ɛyɛ ne de no bɛkame afoforo na ɔde asie mmom no, oyii ntoboa kɛse de boaa asɔrefi a na wɔresi ama Yehowa som no. So ɔhwehwɛe sɛ wɔbɔ ne din ɔkwan titiriw bi so wɔ n’adema no ho? Dabi. Mmom no, wɔ ɔkwan bi so no, ohui sɛ ɛnyɛ adema biara koraa. “Na hena ne me, na hena ne me man, na yɛanya ahoɔden sɛ yebeyi yɛn yam ama ade saa? Na wo nkyɛn na ne nyinaa fi, na wo nsam na yenyae na yɛde ama wo yi.”​—1 Beresosɛm 29:14.

So ɛnyɛ Dawid su yi ne nea eye a ɛsɛ sɛ yɛn nyinaa nya anaa?