Wɔtaa Wɔn Esiane Trenee Nti

Ebia woate afi nnamfo ne abusuafo hɔ sɛ Yehowa Adansefo taa nya asɛm wɔ aban mu, sɛ aban ahorow bara wɔn adwuma no, anaasɛ wɔyɛ nnipa bɔne. Dɛn nti na wɔka nsɛm a enye yi fa wɔn ho?

Ɛnyɛ sɛ Adansefo no nni mmara so nti na ɛte saa, na mmom esiane sɛ wodi Yesu anammɔn akyi nti. Yesu ka kyerɛɛ n’asuafo no sɛ nnipa bɛbɔ wɔn ahohora, wɔbɛtaa wɔn, na wobedi atoro aka nsɛmmɔne ahorow nyinaa bi atia wɔn. Eyi te saa efisɛ Onyankopɔn sɔretiafo kɛse, Satan, ne wiase yi Nyame na ɔbɛpɛ sɛ ɔdan nnipa fi Onyankopɔn som ho.—Mateo 5:10-12; 10:16-22, 34-39; 24:9, 10; Yohane 15:17–16:3; 2 Timoteo 3:12; 1 Petro 5:8; Adiyisɛm 12:17.

Bere a wɔkyeree asomafo no na wɔde wɔn kɔɔ asennibea no, ɛnyɛ sɛ na wɔyɛ nsɛmmɔnedifo, mmarima a wɔyɛ basabasa, anaasɛ ɔman asetutufo nti. Ɛyɛ asɛmpa a na wɔreka no nti. Bere a ɔsomafo Paulo de n’asɛm kɔdan asennibea kɛse no, na ɔpɛ sɛ ɔde anoyi ma wɔ hɔ na ɔkyerɛ sɛ Kristofo wɔ hokwan sɛ wɔka asɛmpa no.—Asomafo no Nnwuma 4:18-20; 5:28-32; Filipifo 1:7.

Ɛnnɛ, Yehowa Adansefo yɛ Kristofo a wodi mmara so a wotua wɔn tow na wɔde obu ma atumfoɔ. Wɔde Kaesare de ma Kaesare ne Onyankopɔn de ma Onyankopɔn. Sɛ ntawntawdi bi bɛda wɔne aban bi ntam a, na ɛyɛ pene a aban no mpene wɔn asɛnka adwuma no so nti anaasɛ wɔn ho a wɔmmfa nhyehyɛ amanaman no nsɛm mu ntia. Nanso wɔ eyi mu no, ɛsɛ sɛ Yehowa Adansefo ma wɔn gyinabea yɛ te sɛ asomafo no de no a wɔn na wɔkae sɛ: “Ɛsɛ sɛ yetie Onyankopɔn mmon sen nnipa” no.”—Asomafo no Nnwuma 5:29; Marko 12:17; Yohane 18:36; Tito 3:1, 2.

Ɛnyɛ sɛ Yehowa Adansefo ani gye ɔtaa ho na mmom wɔbɛpɛ sɛ wɔtra ase wɔ asomdwoe ne kommyɛ mu. Nanso sɛ esiane Onyankopɔn mmara ne Yesu Kristo nhwɛso akyi a wodi nti wɔtaa wɔn a, wɔn ani gye sɛ wobegyina mu.—Mateo 5:10-12; Asomafo no Nnwuma 5:40, 41; 1 Korintofo 4:12; 1 Timoteo 2:2; 1 Petro 3:14, 15; 4:12-16.

• Dɛn nti na wɔbɔ Yehowa asomfo ahohora na wɔtaa wɔn?

• Dɛn nti na ɛtɔ bere bi a Yehowa Adansefo ne aban mpanyimfo nya ntawntawdi sɛnea ɛbaa Kristofo asomafo no so no?

• Yehowa asomfo bu ɔtaa dɛn?

[Kratafa 29 mfonini]

Wɔkyeree Yesu begyinaa Pilato anim na wɔde ɔsomafo Paulo kɔtoo afiase esiane Onyankopɔn Ahenni ho asɛm a wɛkae nti