Krataa a Efi Akwankyerɛ Kuw no Hɔ

Yɛn Nuanom Asɛmpakafo:

Ɛyɛ hokwan kɛse paa na yɛanya sɛ yɛayɛ baako resom Yehowa, nokware Nyankopɔn koro pɛ no! Yɛyɛ ne “mfɛfo adwumayɛfo.” Wama yɛn adwuma sɛ yɛnka Ahenni a ɔde asi hɔ no ho asɛmpa na yɛnkyerɛkyerɛ nkurɔfo ma wonnya nkwa. (1 Kor. 3:9; Mat. 28:19, 20) Ehia sɛ yɛyɛ nhyehyɛe pa na yɛatumi de asomdwoe ne baakoyɛ ayɛ adwuma yi wɔ wiase nyinaa.—1 Kor. 14:40.

Nhoma yi bɛboa wo ma woahu sɛnea nneɛma kɔ so wɔ Kristofo asafo no mu nnɛ. Woabɛyɛ Yehowa Dansefo yi, nhoma yi bɛsan ama woahu hokwan ne asɛde ahorow a wowɔ. Sɛ wuso hokwan a woanya yi mu yiye na woyɛ ho adwuma a, ɛbɛma woayɛ ‘den wɔ gyidi no mu.’—Aso. 16:4, 5; Gal. 6:5.

Enti yɛhyɛ wo nkuran sɛ, tɔ wo bo ase sua saa nhoma yi. Hwɛ sɛnea w’ankasa wode emu nsɛm no bɛbɔ wo bra. Yɛmfa no sɛ nnansa yi ara na wobɛyɛɛ ɔdawurubɔfo a ɔmmɔɔ asu. Dɛn na ɛsɛ sɛ woyɛ na woatumi abɔ asu abɛyɛ Yehowa Dansefo? Sɛ nso woabɔ asu a, dɛn na wubetumi ayɛ ama wo gyidi ayɛ den na woatrɛw ɔsom a wode ma Yehowa no mu? (1 Tim. 4:15) Wobɛyɛ dɛn aboa ama asomdwoe akɔ so atena asafo no mu? (2 Kor. 13:11) Wokenkan nhoma yi a, wubenya nsɛmmisa yi ho mmuae.

Woyɛ onuabarima a woabɔ asu? Dɛn na wobɛyɛ na woatumi asom sɛ asafo mu somfo na akyiri yi woabɛyɛ asafo mu panyin? Nnipa bebree na wɔreba Onyankopɔn ahyehyɛde yi mu, enti ɛho abehia paa sɛ yenya anuanom mmarima a wɔfata ma wodi nneɛma anim. Sɛ ‘wopɛ sɛ woyɛ ɔhwɛfo adwuma’ a, nhoma yi bɛboa wo ma woahu nea ɛsɛ sɛ woyɛ.—1 Tim. 3:1.

Yɛn mpaebɔ ne sɛ nhoma yi bɛboa wo ama woahu hokwan a wowɔ wɔ Yehowa ahyehyɛde yi mu na woaso mu yiye. Yɛdɔ mo paa, na yɛkɔ so bɔ mpae sɛ, nnipa bebree a wɔde anigye bɛsom yɛn soro Agya Yehowa afebɔɔ no, mo nso mobɛka wɔn ho.—Dw. 37:10, 11; Yes. 65:21-25.