Ɛhefa Na W’aniwa Wɔ?

MPƐN pii na Onyankopɔn nkoa hyia ɔhaw ne sɔhwɛ horow. Bere a ɛte sɛɛ mu na obi hia ɔsorosoroni no hɔ mmoa. So wode mpaebɔ a emu yɛ den srɛ Yehowa Nyankopɔn hɔ mmoa, a wohwɛ no kwan ma akwankyerɛ?

Eyi ne nkuranhyɛ a wubetumi anya afi Dwom 123. Yɛkenkan sɛ: “Wo na mema m’ani so mehwɛ wo, wo a wote soro no.” (Dw. 123:1) Esiane sɛ Ade Nyinaa So Tumfoɔ Nyankopɔn no te ɔsorosoro koraa nti, ɛbɛyɛ nea ɛfata sɛ odwontofo no bɛka ne ho asɛm sɛ ɔrema n’ani so akyerɛ ɔsoro asrɛ Ɔbɔadeɛ no hɔ mmoa. Bere a ɔreyɛ nea enti a ɛsɛ sɛ ɔma n’ani so hwɛ Yehowa no ho mfatoho no, ɔkɔɔ so kae sɛ: “Hwɛ, sɛnea nkoa ani hwɛ wɔn wura nsa ano, sɛ́ afanaa hwɛ n’awuraa nsa ano no, sɛ́ yɛn ani hwɛ Awurade [Yehowa] yɛn Nyankopɔn, ne no, de kosi sɛ ɔbɛdom yɛn. Dom yɛn, Awurade [Yehowa], bɛdom yɛn, na aniwuhyɛ afono yɛn dodo. Taamudifo fɛwdi ne ahantanfo aniwuhyɛ afono yɛn kra dodo.”​—Dw. 123:2-4.

Nkoa ne mfenaa hwɛ wɔn wuranom ne wɔn nwuraa nsa, de susuw nea ebia wɔn pɛ bɛyɛ ho. Awuranom ne nwuraa no nsa nso betumi de nea ehia wɔ asetra mu ama ne ahobammɔ nso ama wɔn nkoa. Saa ara nso na Onyankopɔn nkoa betumi ahwɛ no, a wɔpɛ sɛ wohu sɛnea n’apɛde te wɔ nsɛm ho, na wɔhwɛ ahobammɔ, ɔdom ne nhyira kwan fi ne hɔ nso.

Odwontofo no ne ne mfɛfo Israelfo no ayɛ wɔn a wɔredi wɔn ho fɛw. Esiane ɔkwan a wɔn atamfo fa so bu wɔn animtiaa nti na ɛfata yiye sɛ wɔbɛsrɛ Yehowa sɛ ɔmmra mmɛdom wɔn. Ahohora a wɔde agu wɔn so no abɛyɛ nea ɛda hɔ daa. Ɛdɔɔso. “Ahantanfo” no na wɔde aba efisɛ wɔadan “taamudifo,” a ɛkyerɛ sɛ wɔte hɔ dwoodwoo.

Tebea horow a ɛte saa na na ɛwɔ hɔ bere a wɔresi Yerusalem afasu no bio wɔ Nehemia akwankyerɛ ase no. Wɔ nea na atamfo no reka fa eyi ho no, Bible no bɔɔ amanneɛ sɛ: “Na Sanbalat tee sɛ yɛreto afasu no, ne bo hurui na onyaa abufuw pii pa, na odii Yudafo no ho fɛw. Na ɔkae ne nuanom ne Samaria atumfoɔ no anim sɛ: Dɛn na Yudafo nyamoonyamoofo yi reyɛ yi: So wɔmma wɔn kwan? So wɔbɛbɔ afɔre? So wobewie no nnɛ ara? So wobenyannyan abo no afi afabo akuwakuw a ahyehyew no mu? Na Amonni Tobia a ogyina ne nkyɛn no kae sɛ: Nea wɔreto yi mpo, sɛ sakraman foro a, obebubu wɔn abo afasu.”​—Neh. 4:1-3.

Wobetumi ahyɛ no nsow sɛ, wɔ atamfo ɔsɔretia ne fɛw a wodi no nyinaa akyi no, wosii Yerusalem afasu no wiei. Atirimpɔw titiriw a ɛwɔ akyi ne sɛ Nehemia ne ne mfɛfo adwumayɛfo no de wɔn ani too Yehowa so maa mmoa. (Neh. 5:4, 5) Sɛ yɛn nso yɛkɔ so de yɛn ani to Yehowa so hwehwɛ ne hɔ mmoa ne nhyira a yɛn nsa rensi fam na yɛrenni huammɔ da. Ɔbɛma yɛn yɛn mpaebɔ ahorow no ho mmuae.​—1 Yoh. 3:21, 22.