“Sɛnkyerɛnne” A Wɔka Siei No Awiei Abɛn
1. Dɛn nti na yebetumi de aseda ama sɛ Yesu asomfo no bisaa no asɛm a ɛwɔ Mateo 24:3 no?
YƐN a yɛwɔ hɔ nnɛ betumi de aseda ama sɛ Yesu Kristo asomafo no bisaa no sɛ: “Ka kyerɛ yɛn, Bere bɛn na nneɛma yi bɛyɛ, na dɛn na ɛbɛyɛ wo ba a woaba ne nneɛma nhyehyɛe no awiei ho sɛnkyerɛnne?” (Mateo 24:3, NW) Wɔn asemmisa no na ɛma ɔde nkɔmhyɛ tenteenten a emu nsɛm kɔ akyiri a nokware a ɛyɛ no ma yɛn ho dwiriw yɛn bere a yehu ne mmamu sɛ enya nkɔso wɔ afeha a ɛto so,aduonu yi mu no. Eyi boa yɛn ma yehu faako a yɛwɔ wɔ Onyankopɔn atirimpɔw ho dwumadi wɔ adesamma a wɔrehu amane so mu no yiye. Kristo “ba a waba” a aniwa ntumi nhu wɔ honhom mu ne “nneɛma nhyehyɛe no awiei” mu ankasa a yɛte no hyɛ yɛn gyidi den, efisɛ yehu “sɛnkyerɛnne no” a ɔka siei no.
2. Ɛhe na wɔaka “sɛnkyerɛnne” no afã horow nyinaa ho asɛm, na ne fã bɛn na yebesusuw ho mprempren?
2 “Sɛnkyerɛnne” no ne emu nsɛm nyinaa rebɛn n’awiei a emu da hɔ koraa a ɛremma wɔn a wɔhwɛ no nni mfomso. Nneɛma pii wɔ “sɛnkyerɛnne” no mu, sɛnea wɔada no adi wɔ Mateo kyerɛwtohɔ no, ti aduonu anan ne aduonu anum, Marko kyerɛwtohɔ no, ti dumiɛnsa, ne Luka kyerɛwtohɔ no, ti aduonu biako no; na ɛkame ayɛ sɛ agye adesamma awo ntoatoaso biako nkwa bere na ama “sɛnkyerɛnne” no afã horow nyinaa ada adi koraa. Wɔ ti horow a edi kan mu no yɛasusuw sɛnkyerɛnne no afã horow yi ho sɛnea wɔaka ho asɛm wɔ Mateo kyerɛwtohɔ no ti aduonu anum no. Afei yebesusuw afã horow a wɔada no adi wɔ ti aduonu anan, ne kyerɛwtohɔ ahorow a Marko ne Luka de mae a yɛde bɛtoto ho no ho.
3, 4. Bere a na wɔrebisa Yesu sɛ, “Bere bɛn na nneɛma yi bɛyɛ?” no na nneɛma bɛn na asuafo no reka ho asɛm no?
3 Bere a Kristo asomafo no fii wɔn asemmisa no ase sɛ, “Ka kyerɛ yɛn, Bere bɛn na nneɛma yi bɛyɛ?” no, na wɔreka nneɛma ahorow a na Yesu aka ho asɛm da no ara a ɛyɛ Benada, Nisan 11, afe 33 Y.B. wɔ nkɔmhyɛ kwan so no ho asam. Wɔ Yerusalem asɔrefi hɔ, bere a wakasa atia nyamesom akyerɛwfo ne Farisifo nyaatwomfo no akyi no, Yesu kɔɔ so kae sɛ: “Hwɛ . . . meresoma adiyifo ne anyansafo ne kyerɛwfo aba mo nkyɛn, na mubekum wɔn mu bi abɔ wɔn asɛndua mu na moaka wɔn mu binom mpire mo hyia adan mu, na moataa wɔn afi kurow mu akɔ kurow mu; na mogya trenee a wɔahwie agu asase so nyinaa, efi Habel trenee mogya so de besi Barakia ba Sakaria a mukum no asɔredan ne afɔremuka ntam no mogya so aba mo so. Nokware mise mo sɛ, eyinom nyinaa bɛba nnɛ mma yi so. Yerusalem, Yerusalem, wo a wukum adiyifo, na wusiw wɔn a wɔasoma wɔn wo nkyɛn abo, mpɛn ahe na anka mepɛe sɛ meboaboa wo mma ano, sɛnea akokɔtan boaboa ne mma ano ne ntaban ase, nanso moampɛ! Hwɛ, wobegyaw mo fi afituw ama mo. Na mise mo sɛ efi sesɛɛ morenhu me de bɛkɔ akosi sɛ mobɛka sɛ: Nhyira ne nea ɔnam [Yehowa] din mu reba no.”
4 Ansa na Yesu refi asɔredan anaasɛ asɔrefi hɔ no, ɔde nkɔmhyɛ foforo a ɛyɛ hu kaa ho, na yɛkenkan wɔ ɛno ho sɛ: “Na Yesu fii adi fii asɔrefi hɔ kɔe. Na n’asuafo no baa ne nkyɛn sɛ wɔbɛkyerɛ no asɔrefi aban no. Na ɔka kyerɛɛ wɔn sɛ: Munhu eyinom nyinaa? Nokware mise mo sɛ: Wɔrennyaw ɔbo ɔbo so ɛha a wɔrennwiriw ngu fam.”—Mateo 23:34 kosi 24:2.
5. Ɔtraa afurum ba so nkonimdi mu kɔɔ Yerusalem no, ná dɛn na Yesu aka afa ne ho?
5 Nnaanu ansa na eyi reba, Kwasida, Nisan 9 no, na wagyina bere a ɔte afurum ba so nkonimdi mu rekɔ Yerusalem no asũ no, esiane ɔsɛe a na ɛreba ne so no nti. Ɔrehyɛ ne sɛe a ɛyɛ hu denam Romafo so wɔ 70 Y.B. mu ho nkɔm no, ɔkae sɛ: “Na nna bi bɛba wo so a w’atamfo betwa wo ho ka, na wɔatwa wo ho kɔntɔnkrɔn, na wɔaka wo ahyɛ mu baabiara, na wɔadwiriw wo ne wo mma a wɔwɔ wo mu no agu fam, na wɔrennyaw wo mu bo ɔbo so, efisɛ wɔanhu bere a wɔdom bɛhwɛɛ wo no.”—Luka 19:41-44.
6. Na ɛyɛ nkɔmhyɛ ahorow bɛn ma asuafo a wɔyɛ Yudafo twetiafo ankasa no, na adwennwene bɛn na ɛde brɛɛ wɔn?
6 Yudafo twetiafo ankasa te sɛ Kristo asomafo no fam no, na ɛnonom yɛ nkɔmhyɛ ahorow a ɛyɛ hu. Awo ntoatoaso a na wɔyɛ ne fã no so na ná atreneefo mogya a wohwie gui wɔ Yudafo abakɔsɛm mu ne nea edi ɛno anim no rebɛba. Bere bɛn pɔtee na ná nneɛma yi bɛbam? Wɔpɛe Sɛ wohu. Wogye dii na wɔpaee mu kae sɛ Yesu ne Mesia anaasɛ Nea Wɔasra no, Kristo no. Nanso Yerusalem sɛe ho nkɔmhyɛ no daa no adi sɛ ná ɔremfa ne Mesia ahenni no nsi hɔ wɔ saa kurow a wɔrebɛsɛe no no mu. Ɔkae sɛ wɔrenhu no “efi sesɛɛ,” nanso ɔkaa ne ba wɔ “[Yehowa] din mu” nso ho asɛm. Bere bɛn na ɔbɛba bio ma wabedi Mesia a ɔyɛ no ho dwuma? Na ɛsɛ sɛ ɔsɛe a ɛreba Yerusalem ne n’asɔrefi no so no yɛ Yudafo nneɛma nhyehyɛe no awiei wɔ ɔkwan biara so. Bere a kurow kronkron ne asɔrefi kronkron biara‘nni hɔ no ebia na Yudafo asɔfo a wɔwɔ Lewini Aaron abusua mu no bɛyɛ wɔn a wɔka saa Yerusalem “mma” a wobedwiriw wɔn “agu fam” anaasɛ wobeyi wɔn afi asɔrefi hɔ som mu no ho. Enti ɛnyɛ nwonwa sɛ asomafo no ammisa Yerusalem ne n’asɔrefi no sɛe ho asɛm nko, na mmom wobisae nso sɛ: “Dɛn na ɛbɛyɛ wo ba a woaba ne nneɛma nhyehyɛe no awiei ho sɛnkyerɛnne?” nso.
7. Dɛn nti na “nneɛma nhyehyɛe no awiei” ho asɛm a ná asomafo no rebisa no yɛ nhwehwɛmu ho asemmisa a eye?
7 Ná wɔn nsemmisa no yɛ nhwehwemu a eye, efisɛ Yesu bae wɔ Yudafo nneɛma nhyehyɛe no “awiei” bere mu. Kyerɛw nsɛm afoforo ka tebea no ho asɛm saa wɔ adwene koro no ara mu. Hebrifo 9:26-28 kyerɛ sɛ ná Yesu nhia sɛ ɔkɔ so de ne ho bɔ afɔre daa, na ɛka sɛ: “Ɛnde anka ɛsɛ no sɛ ɔtaa hu amane fi wiase asefi, na afei a wiase mmere rewie du yi, wayi ne ho adi prɛko sɛ ɔnam afɔre a ɔde ne ho bɔe so beyi bɔne. . . . saa ara nso na Kristo a wɔde no bɔɔ afɔre prɛko sɛ ɔnsoa nnipa bebree bɔne.” Afei nso, 1 Korintofo 10:11 ka sɛ: “Na eyinom nyinaa ama woayɛ nhwɛso, na wɔakyerɛw ama yɛn a wiase bere awiei ato yɛn yi afotu.” Wɔkan fi afe a Yesu hyɛɛ ho nkɔm no so a, na aka Yudafo nneɛma nhyehyɛe no mfirihyia aduasa ason, a ennu awo ntoatoaso a wɔn nkwa nna yɛ mfirihyia aduanan de. Romafo faa Yerusalem na wɔsɛe no Elul 7 (anaasɛ, August 30, 70 Y.B., Gregorian mmerebu) . Kristo asomafo no dodow a wokwatii mogyadansefo wu na wɔtraa ase kosii saa bere a ɛyɛ hu no mu de, Bible kyerɛwtohɔ no nka.
June Da Biara Da Asɛm
(Wopɛ nsɛm a wɔahyehyɛ no nyinaa a, hwɛ nhoma no mu)