Adwinni Ho Nyansa Akyɛde a Onyankopɔn fi Ayamye mu de Ama

YEHOWA ani gye nnwuma a wayɛ no ho. (Dwom 104:31) Wɔda anigye kɛse a onya fi n’adebɔ nnwuma mu no adi wɔ Genesis 1:31: “Onyankopɔn huu nea ɔyɛe nyinaa, na hwɛ, eye papa.”

Yehowa nkutoo ankora saa anigye yi so. Ɔde hokwan no maa Yesu sɛ ɔnyɛ odwumayɛfo, nea wɔnam no so bɔɔ nneɛma nyinaa no. (Yohane 1:3; Kolosefo 1:16, 17) Afei nso, sɛ́ “odwumayɛfo panyin no,” na Yesu “ani gye wɔ [Yehowa] anim bere nyinaa.”—Mmebusɛm 8:30, 31, NW.

Nanso ɛnyɛ soro nkutoo na adwinni ho nyansa wɔ. Eugene Raudsepp kyerɛw wɔ ne nhoma How Creative Are You? mu sɛ: “Wɔde ahyɛ adesamma mu.” Eyi nyɛ asɛm a ɛne asɛm ahyia ara kwa, efisɛ wɔbɔɔ onipa wɔ Onyankopɔn suban so. (Genesis 1:26) Enti, Yehowa de adwinni ho nyansa a ɛma akomatɔyam dom adesamma.—Yakobo 1:17.

Enti, ɛnyɛ nwonwa sɛ Bible no kamfo nnwonto, asaw, adenwene, aduannoa, adwinni, ne nneɛma foforo a wofi nyansa mu yɛ. (Exodus 35:25, 26; 1 Samuel 8:13; 18:6, 7; 2 Beresosɛm 2:13, 14) Besaleel a na ɔyɛ odwumfo no de ne dom akyɛde “nwenee” nneɛma ma wɔde boaa ntamadan no si. (Exodus 31:3, 4) Ebetumi aba sɛ oguanhwɛfo Yabal na odii kan yɛɛ ntamadan, ade a wɔyɛe a ɛboaa atutradi. (Genesis 4:20) Ɛnyɛ sɛ na Dawid yɛ odwontofo ne dwom hyehyɛfo nko, na mmom na ɔyɛ nnwom ho nnwinnade yɛfo nso. (2 Beresosɛm 7:6; Dwom 7:17; Amos 6:5) Ebetumi aba sɛ Miriam na ɔkyerɛɛ asaw a Israelfo saw de dii ahurusi bere a wogyee wɔn fii Po Kɔkɔɔ no mu anwonwakwan so no.—Exodus 15:20.

Adwinni ho nyansa taa boa ma nokware som kɔ so. Yesu nam nyansakwan so de mfatoho ahorow ne nhwɛso a asuade wom kaa n’asɛm no. Saa ara na wɔhyɛ n’asuafo nkuran sɛ ɛsɛ sɛ “wɔyɛ asɛnka ne kyerɛkyerɛ ho adwuma.” (1 Timoteo 5:17) Yiw, wɔn asɛnka adwuma no nyɛ ade a wɔyɛ no daa ara kwa. Ɛyɛ adwinni a ehia akwan a nyansa wom a wɔnam so kyerɛkyerɛ. (Kolosefo 4:6) Eyi hia kɛse bere a obi rekyerɛkyerɛ ne mma.—Deuteronomium 6:6, 7; Efesofo 6:4.

Enti, Yehowa ma afoforo nso nya anigye a adwinni ho nyansa de ba no bi. Akyɛde a wofi ayamye mu de ama bɛn ara ni!