Ɛhe na Wobetumi Anya Nokware Anigye?

NNIPA pii susuw sɛ sɛ wonya ahode pii a wobetumi anya anigye. Wo nso ɛ? Bere a ahode betumi ama yɛanya anigye no, ɛnkyerɛ sɛ anigye no bɛtra hɔ daa; saa ara na honam fam ahotɔ nhyɛ gyidi den, na ɛmfa honhom fam ahiade mma.

Wɔ ne Bepɔw so Asɛnka mu no, Yesu Kristo kae sɛ: “Anigye ne wɔn a wɔn honhom mu nneɛma ho hia wɔn, efisɛ wɔn na ɔsoro ahenni no yɛ wɔn dea.” (Mateo 5:3, NW) Afei nso Yesu kae sɛ: “Monhwɛ na monhwɛ mo ho yiye pɛpɛe ho! Na ɛnyɛ onipa ade a wanya na aboro so no mu na ne nkwa wɔ.”—Luka 12:15.

Nnipa pii de wɔn ho hyɛ nna mu ɔbrasɛe ne “honam nnwuma” foforo mu de hwehwɛ anigye. (Galatifo 5:19-21) Nanso ɔbrasɛe mu a yɛde yɛn ho bɛhyɛ no mfa nokware anigye a ɛtra hɔ daa mmrɛ yɛn. Nokwarem no, wɔn a wɔyɛ saa nneɛma no rennya Onyankopɔn Ahenni no.—1 Korintofo 6:9, 10.

Bere a afoforo rehwehwɛ anigye no, wɔtwe adwene si wɔn ankasa so de pɛ anuonyam. Nhoma horow ahyɛ nhomakorabea ne nhomatɔnbea ma, nanso nhoma a ɛtete saa mfaa anigye a ɛtra hɔ daa mmrɛɛ nkurɔfo. Ɛnde, ɛhe na yebetumi anya nokware anigye?

Sɛ yebenya anigye ankasa a, ɛsɛ sɛ yehu yɛn awosu mu ahiade ankasa. Yesu kae sɛ: “Anigye ne wɔn a wɔn honhom mu nneɛma ho hia wɔn.” Nokwarem no, sɛ yɛante ahiade yi ase amfa anni dwuma a, ɛso remma yɛn mfaso biara. Sɛ yɛbɛyɛ mfatoho a: Dɛn na ɛbɛba obi a otu mmirika tenten so bere a wabu n’ani agu nsu a ne nipadua hia no so no? So ɛnyɛ ne mu nsu na ɛbɛsa ntɛm ara ma wahu amane? Saa ara na sɛ yebu yɛn ani gu hia a yehia honhom fam aduan so a, awiei koraa no, yɛbɛbotow wɔ honhom mu. Eyi bɛma yɛn werɛ ahow.

Yesu huu ne honhom mu ahiade koraa, na osuaa Onyankopɔn Asɛm susuw ho daa. Ná otumi bue Kyerɛw Kronkron no kenkan a ɔmmrɛ, na ɔkyerɛɛ afoforo sɛ wɔnyɛ saa ara. (Luka 4:16-21; fa toto Efesofo 4:20, 21 ho.) Afei nso, Yesu de ne soro Agya apɛdeyɛ totoo aduan ho. Onyankopɔn apɛde a ɔyɛe no ma onyaa anigye pii.—Yohane 4:34.

Yiw, honam fam nneɛma ntumi mfa nokware anigye mma; saa ara nso na anigye mfi honam a ɛtɔ sin no akɔnnɔ akyi a yebedi mu. Nokware anigye yɛ komam tebea a egyina gyidi a edi mũ ne yɛne Yehowa Nyankopɔn ntam abusuabɔ pa so. Ɛnde na ɛfata sɛ odwontofo Dawid too dwom sɛ: “Nhyira ne ɔman a Awurade [Yehowa, NW] ne wɔn Nyankopɔn.”—Dwom 144:15b.

[Kratafa 23 mfonini]

Gyidi ne Onyankopɔn ntam abusuabɔ pa bɛma woanya nokware anigye