Ahenni Adawurubɔfo Bɔ Amanneɛ
Nokware Nyankopɔn no a Wɔhwehwɛ no So Akatua a Wonya
WƆ AFEHA a ɛto so du A.Y.B. mu no, abosonsom hyɛɛ Yuda mmusuakuw abien ahemman no ma. Nanso, saa abosonsom pii yi mu na ɔbarima bi traa ase a na ne koma di mu wɔ Onyankopɔn anim. Ná ne din de Yehosafat. Odiyifo Yehu kaa ne ho asɛm sɛ: “Wɔahu wo ho nsɛm pa, sɛ . . . woasiesie wo koma ahwehwɛ Onyankopɔn.” (2 Beresosɛm 19:3) Saa ara na nnɛ “mmere a emu yɛ den” yi mu no, nnipa ɔpepem pii ‘asiesie wɔn koma’ ahwehwɛ nokware Nyankopɔn, Yehowa, no. (2 Timoteo 3:1-5) Osuahu a edi so a efi Togo, Afrika Atɔe fam, no di eyi ho adanse.
Casimir kɔɔ Katolek sukuu na ɔkɔɔ Awurade Adidi nea edi kan bere a na wadi mfe akron no. Nanso, bere a Casimir dii mfe 14 no, na wagyae asɔre kɔ. Eyi maa ɔbɔɔ hu efisɛ na osusuw sɛ Mass a ɔnkɔ no bɛma wakɔ hell anaa anyɛ yiye koraa no, mfimfimmea.
Wɔ sukuu mu no, Casimir kɔdɔm mmofra kuw bi a na wohyiam pɛnkoro dapɛn biara sua Bible no. N’ankasa nso fii ase kenkan Bible no. Bere bi, Casimir kenkan aboa bi a ne ho yɛ hu a ofi po mu bae no ho asɛm wɔ Adiyisɛm nhoma no mu. (Adiyisɛm 13:1, 2) Bere a obisaa ho asɛm fii Bible adesua kuw no kannifo no hɔ no, ɔka kyerɛɛ no sɛ aboa no yɛ paara, ne sɛ obefi po mu aba ankasa. Saa nkyerɛkyerɛmu yi haw Casimir efisɛ na ɔte bɛn Atlantic Mpoano. Ogye dii sɛ ɔbɛyɛ wɔn a aboa no bedi kan akyere wɔn awe no biako.
Casimir fii ase tiatiaa sika na ama watumi aguan akɔ anafo fam sare so sɛnea ɛbɛyɛ a aboa no rennya no. Ɔkaa ne nsusuwii no ho asɛm kyerɛɛ ne yɔnko sukuuni bi. Ne yɔnko sukuuni no a na ɔyɛ Yehowa Dansefo no maa no awerɛhyem sɛ aboa biara remfi po mu mma ankasa. Ɛno akyi bere tiaa bi no, ɔtoo nsa frɛɛ Casimir sɛ ɔmmra nhyiam wɔ Ahenni Asa so. N’ani gyee nhyiam horow no ho na ofii ase kɔe daa. Ɔpenee ofie Bible adesua nso so.
Bere a Casimir nyaa nkɔanim wɔ n’adesua no mu no, abusuafo fii ase sɔre tiaa no. Ná n’abusua no som wɔn nananom a wɔawuwu, na na wodi aboa a wonhwiee ne mogya ngui a wɔde bɔ afɔre ma abosom no. Bere a Casimir de obu kae sɛ onni nam no, wohunahunaa no, na wɔka kyerɛɛ no sɛ omfi fie hɔ. Casimir yɛɛ komm, na wogyaee ahunahuna no. Nanso, saa mogyanam yi nkutoo na wɔde yɛɛ abusua no aduan asram abiɛsa. Ná ɛyɛ den ma Casimir sɛ obenya aduan a ɛbɛso no adi, nanso ogyinaa eyi ne ahokyere afoforo ano.
Casimir kɔɔ so nyaa honhom fam nkɔso koduu ahosohyira ne asubɔ ho. Akyiri yi, wɔpaw no asafo mu somfo, na ɔkɔɔ Asomfo Ntetee Sukuu no adesuakuw a ɛto so anan no bi wɔ Togo. Seesei, ɔreyɛ atu-ho-ama adwuma wɔ baa dwumadibea hɔ.
Yiw, hwɛ sɛnea Ɔhene Dawid nsɛm yi ayɛ nokware wɔ akwan pii so: “Sɛ wohwehwɛ [Yehowa, NW] a, ɔbɛma woahu no.”—1 Beresosɛm 28:9.
[Kratafa 8 mfonini ahorow]
Casimir (nifa so) yɛ atu-ho-ama adwuma wɔ baa dwumadibea hɔ