Nokwaredi—Eye, Na So Ɛno Nkutoo Dɔɔso?

SO NOKWARE a yebedi wɔ yɛn da biara da asetram no ho hia ankasa? Nsɛm asekyerɛ nhoma bi kyerɛkyerɛ “nokwaredi” mu sɛ “adeyɛ a nyaatwom nnim; nokwasɛm; asɛntrenee; ampayɛ.” Ɛda adi pefee sɛ, saa su yi boa ma yɛne afoforo nya abusuabɔ pa. Ɔsomafo Paulo tuu fo sɛ: “Muntie mo honam fam wuranom asɛm ade nyinaa ho, ɛnyɛ ani so som mu, sɛ wɔn a wɔsɔ nnipa ani, na mmom koma kronn [nokwaredi, NW] mu, sɛ wɔn a wosuro [Yehowa, NW].” (Kolosefo 3:22) Hena na n’ani rennye ho sɛ obenya ɔnokwafo a ɔte saa ma wayɛ adwuma ama no? Ɛnnɛ, ɛnyɛ den sɛ nnipa a wodi nokware betumi anya adwuma ayɛ na wɔakɔ so ayɛ a wonnyi wɔn adi.

Nanso, ade a ɛma nokwaredi ye kɛse ne sɛnea ɛka yɛne Onyankopɔn ntam abusuabɔ no. Tete Israelfo no nyaa Onyankopɔn nhyira bere a wɔde ahwɛyiye dii mmara horow so na wodii afahyɛ ahorow no. Bere a Paulo reka asafo no ahotew ho asɛm no, ɔhyɛɛ Kristofo nkuran sɛ: “Enti momma yɛnhyɛ fa, ɛnyɛ mmɔkaw dedaw no mu, nanso ɛnyɛ bɔneyɛ ne amumɔyɛ mmɔkaw mu, na mmom kronkronyɛ [nokwaredi, NW] ne nokware apiti mu.” (1 Korintofo 5:8) Sɛ yɛn som bɛsɔ Onyankopɔn ani a, nokware a yebedi nyɛ ade a eye kɛkɛ na mmom ɛyɛ ade a ɛho hia nso. Nanso, hyɛ no nsow sɛ nokware a yebedi nkutoo nnɔɔso. Ɛsɛ sɛ egyina nokware so.

Ebetumi aba sɛ na wɔn a wɔhyehyɛɛ Titanic no gye di nokwarem sɛ po so hyɛn no ntumi ngu asu. Nanso, wɔ ne po so akwantu a edi kan wɔ 1912 mu no, ɛkɔpem asukyenee bi maa nnipa 1,517 hweree wɔn nkwa. Ebia na afeha a edi kan no mu Yudafo binom wɔ ɔkwan a wɔfa so som Onyankopɔn no mu gyidi nokwarem, nanso na wɔn mmɔdenbɔ no ‘nnyina nokware nimdeɛ so.’ (Romafo 10:2) Sɛ Onyankopɔn ani bɛsɔ yɛn a, ɛsɛ sɛ nea yefi yɛn koma mu gye di no gyina nokware so. Yehowa Adansefo a wɔwɔ wo mpɔtam no ani begye ho sɛ wɔbɛboa wo ma woahwehwɛ ɔkwan a wobɛfa so asom Onyankopɔn wɔ nokwaredi mu a egyina nokware so.