So ‘Woreto Ɔkafo Poma Ano Dade Anankoti’?

WƆ BIBLE mmere mu no, na wɔde ɔkafo poma—abaa tenten bi a bere nyinaa na dade bi a ano yɛ nam hyɛ ano—na ɛkã mmoa a wɔtwe nneɛma no kyerɛ wɔn kwan. Sɛ aboa no yɛ asoɔden sɔre tia poma a wɔde ka no no denam pia a opia poma no so a, dɛn na efi mu ba? Sɛ́ anka obenya ahotɔ no, ɔde yaw mmom na ɛba ne ho so.

Yesu Kristo a wɔanyan no no kaa ɔkafo poma ho asɛm bere a oyii ne ho kyerɛɛ ɔbarima bi a wɔfrɛ no Saul a na ɔnam kwan so rekɔkyere Yesu asuafo no bi no. Saul tee sɛ Yesu rekasa fi hann bi a ano yɛ den mu sɛ: “Saul, Saul, adɛn nti na wotaa me? Ɛyɛ den ma wo sɛ wobɛto ɔkafo poma ano dade anankoti” no. Ná Saul nam Kristofo a ɔtaa wɔn no so reko atia Onyankopɔn ankasa, enti na ɔreyɛ biribi a ebepira n’ankasa mmom.—Asomafo no Nnwuma 26:14.

So ebetumi aba sɛ yɛn nso ‘yɛreto ɔkafo poma ano dade anankoti’ a yennim? Bible de “anyansafo nsɛm” toto akafo poma a ɛkanyan yɛn ma yɛpere fa ɔkwan pa so ho. (Ɔsɛnkafo 12:11) Onyankopɔn Asɛm mu afotu a efi honhom mu no betumi ahyɛ yɛn nkuran akyerɛ yɛn ɔkwan pa a ɛsɛ sɛ yɛfa so—sɛ yɛma ho kwan a. (2 Timoteo 3:16) N’akwankyerɛ a yɛbɛko atia no bepira yɛn mmom.

Saul tiee Yesu nsɛm no, ɔsakraa n’akwan, na ɔbɛyɛɛ Kristoni somafo Paulo, a wɔdɔ no no. Saa ara na Onyankopɔn afotu a yebetie no bɛma yɛanya nhyira a ɛtra hɔ daa.—Mmebusɛm 3:1-6.

[Mfonini Fibea wɔ kratafa 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers