Nhyiam Asa Ho Ahiade

Odwontofo no ani gyee kɛse bere a wosee no sɛ ɔne Onyankopɔn asomfo nkɔsom no. (Dw. 84:11, 12) Saa ara na Onyankopɔn nkurɔfo a wɔwɔ hɔ nnɛ nso wɔ obu kɛse a ɛte saa ma beae a wɔsom no. Yehu eyi wɔ mmɔden a wɔbɔ sɛ wobenya Ahenni Asa ahorow de ayɛ nhyiam nketewa ne Nhyiam Asa de ayɛ nhyiam akɛse no mu.

Ɛyɛ anigye sɛ yehu sɛ amansin pii reyɛ ade wɔ nkuranhyɛ a wɔde ama sɛ wɔmpɛ nsase a ɛsosõ mma nhyiam ahorow wɔ mmeae a wonnya baabi pa nnye ntua ho ka anaasɛ baabi a mmeae yi ho ka mma wontumi ntɔ no ho. Eyi hyɛ nkuran.

Bere a yɛrehu nyansa a ɛwom sɛ yebenya nsase a ɛbɛn anuanom a yɛbɛyɛ so nhyiam daa no, ɛnsɛ sɛ yebu yɛn ani gu sika a yɛde besisi Nhyiam Asa ahorow wɔ saa nsase yi so no so. Bere a yebu sika a yɛde besisi ho akontaa no, yɛhu sɛ ɛrenyɛ nea mfaso wɔ so sɛ yebesisi Nhyiam Asa wɔ ɔmansin biara mu, esiane sɛ anuanom nni sika a yebetumi de ayɛ saa nti.—Luka 14:28.

Esiane nea yɛaka wɔ atifi hɔ no nti, ɛbɛyɛ nea mfaso wɔ so na nyansa wom kɛse sɛ amansin pii bɛbom asi Nhyiam Asa biako a saa amansin no nyinaa bɛkɔ hɔ nhyiam. Nokwarem no, ɛrentumi nyɛ yiye sɛ yɛde nyansahyɛ a ɛwɔ atifi hɔ no bedi dwuma wɔ baabiara. Amansin bi sõsõ araa ma wɔyɛ nhyiam A ne B. Ntease wom sɛ ebia amansin a ɛte saa no ntumi nkɔka amansin foforo ho. Nanso, adwene no ne sɛ yɛde sika ne nneɛma kakra a yɛwɔ no bedi dwuma nyansam sɛnea yebetumi, na bere koro no ara yɛasisi Nhyiam Asa ahorow ntɛmntɛm.