Asɛmmisa Afã

◼ So ɛfata sɛ yɛbɔ yɛn nsam bere a wɔbɔ amanneɛ sɛ wɔagye obi no?

Yehowa Nyankopɔn adɔe nti wakyerɛ ɔkwan a egyina Kyerɛwnsɛm so a nnebɔneyɛfo a wɔanu wɔn ho betumi afa so asan anya n’anim dom na wɔagye wɔn aba Kristofo asafo no mu bio. (Dw. 51:12, 17) Wɔhyɛ yɛn nkuran sɛ sɛ ɛba saa a ɛsɛ sɛ yeyi ɔdɔ adi kyerɛ saafo a wɔanu wɔn ho ampa no.—2 Kor. 2:6-8.

Nanso, ɛmfa ho anigye a yenya bere a wogye obusuani anaa obi a yenim no no, ɛsɛ sɛ yɛyɛ komm bere a wɔbɔ amanneɛ wɔ asafo no mu sɛ wɔagye no no. October 1, 1998, Ɔwɛn-Aban no kratafa 17 kaa eyi ho asɛm sɛ: “Nanso ɛsɛ sɛ yɛkae sɛ, asafo no mufo dodow no ara nnim nea ɛyɛe a wotuu obi anaa wogyee no. Afei nso ebia nea wanu ne ho no bɔne aka ebinom anaa apira wɔn—ebia bere tenten bi mpo. Esiane nsɛm a ɛtete saa nti, sɛ wɔbɔ amanneɛ sɛ wɔagye obi a, yebefi ntease mu atwɛn a yɛnyɛ biribi mfa nkyerɛ sɛ yɛrema no akwaaba kosi bere a yebetumi ayɛ saa sɛ ankorankoro.”

Ɛwom sɛ yɛn ani gye kɛse bere a yehu sɛ obi asan aba nokware no mu de, nanso yɛn nsam a yɛbɛbɔ wɔ bere a wogye no no renyɛ nea ɛfata.