So Wokyerɛ Yehowa Abodwokyɛre Ho Anisɔ?
1 Sɛ Yehowa annya abotare wɔ mfe 10, 20, anaa mfe pii a atwam no mu, amma wɔanni adanse pii a, anka wubehu nokware no? Hwɛ anigye ara a ɛyɛ sɛ wama kwan ma nnipa foforo pii aba “adwensakra mu.” Nanso, Yehowa da kɛse no “bɛba sɛ owifo ba.” (2 Pet. 3:9, 10) Enti, ɛnsɛ sɛ yebu Onyankopɔn abodwokyɛre no sɛ akyɛ dodo sɛ ɔde wiase yi awiei no bɛba.—Hab. 2:3.
2 Hu Nnipa Mmɔbɔ: Yentumi nte Yehowa abodwokyɛre no ase nwie da. Enni sɛ yɛma yɛn werɛ fi atirimpɔw a ɛwom no. (Yona 4:1-4, 11) Adesamma asɛm yɛ Yehowa mmɔbɔ na ne yam hyehye no ma wɔn. Yesu nso te nka saa ara. Esiane sɛ na wɔn a ɔka asɛm no kyerɛ wɔn no yɛ no mmɔbɔ nti, na ɔpɛ sɛ asɛmpaka adwuma no mu trɛw na wɔnam so ama nnipa pii anya daa nkwa.—Mat. 9:35-38.
3 Sɛ asiane bi to nkurɔfo a wonnim nokware no a, so ɛyɛ a ɛnyɛ yɛn yaw? Nnipa pii a wɔwɔ hɔ nnɛ no te sɛ “nguan a wonni hwɛfo” bere a wɔbɔ mmɔden sɛ wobenya wiase haw ano aduru no. (Marko 6:34) Sɛ yɛde nnam ka asɛmpa no a, ɛma yɛkyekye akomapafo werɛ na yɛkyerɛ Yehowa abodwokyɛre ho anisɔ.—Aso. 13:48.
4 Yɛn Adwuma no Ho Hia Kɛse: Afe a etwaam no, wɔbɔɔ nnipa 323,439 asu na nnipa bɛboro 14,000,000 na wɔkɔɔ Nkaedi no bi. Hwɛ hokwan ara a nnipa pii wɔ sɛ wobetumi aguan ɔsɛe a ɛbɛba wiase yi so no! Sɛnea “nnipakuw kɛse” no dodow bɛyɛ de, yennim. (Adi. 7:9) Yennim bere tenten a ɛsɛ sɛ yɛde ka asɛm no. Nanso Yehowa nim. Ɛsɛ sɛ yɛka asɛmpa no sɛnea ɔpɛ, “ɛno ansa na awiei no bɛba.”—Mat. 24:14.
5 Wɔatwa bere no tiaa, na Onyankopɔn da no abɛn. (1 Kor. 7:29a; Heb. 10:37) Ɛyɛ ampa sɛ “yɛn nkwagye abɛn akyɛn bere a yɛdan gyidifo no.” (Rom. 13:11) Mommma yemmmu yɛn ani nngu atirimpɔw a Onyankopɔn abodwokyɛre no kura no so. Mmom no, momma yɛmfa ahopere nka asɛm no, sɛnea ɛbɛyɛ a Yehowa behu nnipa pii a wɔn kɔn dɔ adetrenee no mmɔbɔ.