Da Koro Nhyiam Titiriw Dwumadi Foforo

Da koro nhyiam titiriw a ebefi ase July 2000 no asɛmti ne: “Onyankopɔn Ade a Emu Dɔ no a Yɛbɛpɛɛpɛɛ Mu.” (1 Kor. 2:10) Nneɛma a ɛsom bo bɛn na yebesua?

Nimdeɛ a nnipa pii hwehwɛ no mma wonnya abotɔyam. Bible hyɛ yɛn den, sɛnea yebehu wɔ ɔmansin sohwɛfo kasa a wɔato din “Onyankopɔn Asɛm a Yɛpɛɛpɛɛ Mu no Ma Yenya Abotɔyam,” mu no. Ɔkasafo a wɔahyɛ da apaw no no bɛma yɛahu sɛnea Onyankopɔn ade a yɛbɛpɛɛpɛɛ mu no ne asɛmpa no a yɛbɛka no wɔ abusuabɔ bere a ɔkyerɛkyerɛ asɛm, “Wubu Ahenni Asɛnka no Dɛn?” mu no.

Ɛbɛyɛ dɛn na awofo atumi aboa wɔn mma ma wɔahwehwɛ Onyankopɔn Asɛm mu yiye? Wɔnam asɛm a ɛne, “Monkyerɛkyerɛ Mo Mma Onyankopɔn Asɛm” no so bɛma yɛahu nyansahyɛ a yebetumi adi akyi. Fekubɔ a Kristofo mmofra ne wɔn a wɔn ho akokwaw wɔ honhom fam nya no tumi boa wɔn kɛse. Wɔbɛda sɛnea wonya mfaso kɛse no adi wɔ ɔfã a wɔato din “Mmofra a Wosuasua Mpanyimfo” no mu.

Dɛn nti na ɛsɛ sɛ yɛyere yɛn ho hwehwɛ honhom fam akorade a ahintaw no nnɛ? Yehowa ne obi a ɔda ahintasɛm adi. Ɔkasafo a wɔahyɛ da apaw no no nam ɔkasa a wɔato din “Yehowa Kɔ so Da Ade a Emu Dɔ no Adi” no so bɛma yɛahu nea Yehowa ada no adi tete ne nnɛ nyinaa. Eyi bɛma yɛayere yɛn ho ‘apɛɛpɛɛ Onyankopɔn ade a emu dɔ no’ mu.

Fi ase yɛ nhyehyɛe seesei na woatumi akɔ bi. Ɛsɛ sɛ wɔn a wɔpɛ sɛ wɔde nsu mu asubɔ yɛ wɔn ahosohyira ho nsɛnkyerɛnne ma Yehowa no ma ɔhwɛfo guamtrani no aso te no ntɛm. Nea yɛbɛte no bɛma yɛanya ɔpɛ a emu yɛ den a yɛde bɛpɛɛpɛɛ Onyankopɔn Asɛm mu. Enti mma da titiriw yi a wɔde honhom fam nkyerɛkyerɛ bɛma no mmpa wo ti so!