Ɔsom Adwuma Nkɔso

Wɔ April 2011 mu no, yenyaa nkɔanim foforo wɔ nneɛma bebree mu esiane akwampaefo aboafo adwuma a nnipa pii de wɔn ho hyɛɛ mu no nti. Adawurubɔfo 28,762 na wɔyɛɛ akwampaefo aboafo adwuma no bi! Daa akwampaefo nso dodow koduu 8,308. Eyinom nyinaa ma yenyaa adawurubɔfo dodow nkɔanim foforo 105,466. Wɔ April 2011 mu no, yɛde nsɛmma nhoma dodow a ɛsen biara 1,389,339 mae.

Mo ani begye nso sɛ mubehu sɛ nnipa 311,321 na wɔbaa Nkaedi no. Afe yi, wɔyɛɛ Nkaedi no wɔ nkurow ne nkuraa pii ase. Eyi ne bere a edi kan koraa a wɔayɛ saa. Nea ɛboae ne anuanom mmarima ne mmea 230 a wɔsomee sɛ bere tiaa mu akwampaefo atitiriw wɔ saa ɔsram no mu no.

Anuanom, saa amanneɛbɔ yi ka koma ankasa, na yɛkamfo mo nyinaa. Ɛmmra sɛ yɛn mu biara bɛkɔ so de nsi ayɛ adwuma a ɛho hia yi bi.—Mat. 24:14.