Nsɛm a Yebetumi Aka

De afi Bible adesua ase wɔ Memeneda a edi kan wɔ January mu

“Ɛkame ayɛ sɛ ɛsono adwene a nnipa dodow no ara kura wɔ Onyankopɔn ho. Ebinom susuw sɛ Onyankopɔn yɛ tumi nwonwaso bi. Afoforo nso hu no sɛ ɔyɛ wɔn soro Agya a ɔwɔ ɔdɔ. Wohwɛ a Onyankopɔn te sɛn?” Twɛn ma ommua. Fa asɛm a ɛwɔ January 1 Ɔwɛn-Aban no akyi kyerɛ no, na munsusuw asɛm a ɛwɔ asɛmmisa a edi kan no ase ne anyɛ yiye koraa no emu kyerɛw nsɛm no mu biako ho. Fa nsɛmma nhoma no ma no, na yɛ nhyehyɛe san kɔsra no na munsusuw asɛmmisa a edi hɔ no ho.

Ɔwɛn-Aban January 1

“Yɛaba sɛ yɛne wo rebesusuw asɛm bi a ɛhaw obiara ho tiawa. Ɛfa ɔdɔfo wu ho. Migye di sɛ wo ne me bɛyɛ adwene sɛ sɛ yɛn yɔnko berɛbo anaa yɛn busuani a ɔbɛn yɛn paa wu a ɛyɛ yaw sen biribiara. [Twɛn ma ommua.] Bible mu asɛm yi akyekye nnipa pii werɛ. [Kenkan Yesaia 25:8.] Bible hyɛ bɔ sɛ wobeyi owu afi hɔ, na wɔde yɛn adɔfo a wɔawuwu no nso bɛba nkwa mu bio. Nsɛm a ɛte sɛɛ na ɛwɔ nsɛmma nhoma yi mu.”

Nyan! January

“Wunhu sɛ ɔhaw a mmusua hyia nnɛ no dɔɔso paa? [Twɛn ma ommua.] Abebusɛm a ɛwɔ Bible mu yi ka nea ɛsɛ sɛ mmusua yɛ na ama wɔatumi akyekye wɔn fie ma agyina. [Kenkan Mmebusɛm 24:3.] Nnipa pii ahu sɛ Bible afotu a wɔde yɛ adwuma no boa wɔn. Nsɛmma nhoma yi ma yehu Intanɛt dwumadibea soronko bi a wɔde kyerɛkyerɛ Bible mu, na nneɛma pii wɔ hɔ a wɔde boa mmusua a wontua hwee.”