Nea Ɛbɛma Woanya Wo Kokoam Adesua So Mfaso Kɛse

NEA ENTI A ƐHO HIA: Sɛ yɛn ankasa yi bere si hɔ de sua Onyankopɔn Asɛm a, ɛboa yɛn ma ‘yehu nokware no tɛtrɛtɛ, ne tenten, ne sorokɔ ne sɛnea emu dɔ yiye.’ (Efe 3:18) Afei ɛboa yɛn ma yɛkɔ so yɛ nnipa a asɛm ne dɛm biara nni yɛn ho wɔ wiase bɔne yi mu, na ɛma yeso “nkwa asɛm no mu denneennen.” (Flp 2:15, 16) Kokoam adesua ma yetumi paw nea yesua a ɛbɛboa yɛn. Dɛn na yebetumi ayɛ na yɛanya Bible akenkan ne ne sua so mfaso kɛse?

SƐNEA WOBƐYƐ NO:

• Sɛ Bible a wɔatintim na wode sua ade oo, sɛ ɛwɔ ɛlɛtrɔnik afiri so oo, wubetumi atwitwa nkyekyɛm ahorow ase na woayɛ kyerɛwtohɔ

• Sɛ worekenkan Onyankopɔn Asɛm a, bisa wo ho nsɛm yi: ‘Hena ho asɛm na ɛreka? Ɛfa dɛn ho? Bere bɛn na asɛm no sii? Esii wɔ he? Adɛn ntia? Ɔkwan bɛn so na metumi de ayɛ adwuma?’

• Hu asɛm no ani so. Fa nnwinnade a asafo ayɛ sɛ yɛmfa nyɛ nhwehwɛmu di dwuma. Hwehwɛ asɛmti anaa Bible nkyekyɛm bi

• Dwinnwen nea worekenkan no ho, na hwɛ sɛnea ɛfa wo ho

• Fa nea wusua no bɔ wo bra.—Lu 6:47, 48

HWƐ VIDEO A YƐATO DIN SUA ADE YIYE FA ‘SO NKWA ASƐM NO MU DEN’ NO. WUWIE A, BUA NSƐMMISA A EDIDI SO YI:

• Dɛn na anuanom bi ka faa kokoam adesua ho?

• Adɛn nti na yɛrebesua ade biara a, ɛsɛ sɛ yedi kan bɔ mpae?

• Ɛdɛn na ebetumi aboa yɛn ama yɛate Bible mu asɛm bi ase yiye?

• Kɔla ahorow bɛn na yebetumi de ahyehyɛ nneɛma nsow wɔ Bible a yɛde sua ade no mu?

• Adɛn nti na yɛresua Onyankopɔn Asɛm a, ɛho hia pa ara sɛ yedwinnwen ho?

• Dɛn na ɛsɛ sɛ yɛde nea yesua no yɛ?