Bɔ W’aware Ho Ban

Ntam a ɛyɛ a awarefo ka no, Yehowa bu no aniberesɛm paa. Ɔpɛ sɛ wɔkɔ so yɛ baako, ɔmpɛ sɛ wɔn ntam bɛtetew. (Mt 19:5, 6) Sɛ yɛhwɛ Onyankopɔn asomfo mu a, awarefo pii wom a wɔn aware yɛ fɛ. Nanso aware biara nni hɔ a ɔhaw nnim. Wɔn a wɔnsom Yehowa no de, sɛ wohyia ɔhaw wɔ wɔn aware mu a, nea ɛyɛ a ɛba wɔn adwene mu ara ne sɛ wɔbɛtetew mu anaa wobegyae aware. Nanso Kristofo de, ɛnsɛ sɛ yenya saa adwene no bi da. Sɛ woyɛ Kristoni a woaware a, dɛn na wubetumi ayɛ de abɔ w’aware ho ban?

Nneɛma nnum a edidi so yi betumi aboa wo:

1. Biribiara a ebetumi ama w’aware agyigya no, twe wo ho fi ho; mfa wo ho nhyehyɛ obi a ɔnyɛ wo hokafo, na mfa biribiara a ɔbrasɛe wom nnyigye w’ani. Sɛ woyɛ saa a, ɛbɛbɔ wo koma ho ban.​—Mt 5:28; 2Pe 2:14.

2. Hyɛ wo ne Yehowa adamfofa no mu den, na yere wo ho sɛ wobɛyɛ w’asɛde wɔ aware no mu.​—Dw 97:10.

3. Kɔ so ara hyɛ nipasu foforo no, na yɛ nneɛma nketenkete a ɛbɛma wo hokafo ani agye na ama ne koma atɔ ne yam.​—Kol 3:8-10, 12-14.

4. Wo ne wo hokafo ntaa mmɔ nkɔmmɔ. Sɛ worekasa nso a, kyerɛ sɛ wubu no.​—Kol 4:6.

5. Ɛsɛ sɛ wode nea ɛsɛ ma wo hokafo no; ɛyɛ a ma ɛnna adi sɛ wodɔ no na wudwen ne ho.​—1Ko 7:3, 4; 10:24.

Sɛ Kristofo di aware ni a, ɛkyerɛ sɛ wobu Yehowa, efisɛ ɔno na ɔhyehyɛɛ aware.

HWƐ VIDEO A YƐATO DIN ƐSƐ SƐ YƐDE ‘BOASETƆ TU MMIRIKA’​—FA MMIRIKA NO HO MMARA YƐ ADWUMA NO. WUWIE A, BUA NSƐMMISA A EDIDI SO YI:

• 

  Ɛwom, sɛ nkurɔfo mmienu ware foforo a, ɛyɛ a wɔn ani tumi gye, nanso akyiri yi nsɛnnennen bɛn na wotumi hyia?

• 

  Sɛ awarefo bi te nka sɛ anigye nni wɔn aware mu a, Bible mu afotu bɛn na ebetumi aboa wɔn?

• 

  Mmara ahorow bɛn na Yehowa ahyehyɛ afa aware ho?

• Sɛ aware bi bɛsɔ a, dɛn na ɛsɛ sɛ okunu ne ɔyere yɛ?