Onyankopɔn Ne Kristo Nti, Yebenya Ahofadi Daakye

Dɛn na ama worebrɛ? Woyɛ abusua ti a abusua no mu asɛyɛde rebu wo kɔn mu? Anaa woyɛ ɔwofo baako a woretete mma, na ɛyɛ a nea abusua no bedi ayɛ den ama wo? Sɛ woyɛ aberantewaa anaa abaayewa nso a, ɛyɛ a w’atipɛnfo sisi wo anaa? Woyɛ obi a w’apɔwmuden nyɛ papa anaa onyin nti yare reteetee wo anaa? Obiara rehyia ɔhaw. Kristofo pii wɔ hɔ a, nneɛma a wɔrefa mu no dɔɔso, na wei ama wɔrebrɛ. Nanso yenim sɛ ɛrenkyɛ koraa, Yehowa beyi ɔhaw ne abɛbrɛsɛ a yɛrehyia no nyinaa afi hɔ.—2Ko 4:16-18.

Ɛwom, saa bere no nnya mmae, nanso yenim sɛ Yehowa te nea yɛrefa mu no ase, na animia ne nokwaredi a yɛde resom no no, n’ani sɔ. Afei nso, nhyira pii wɔ hɔ a daakye ɔde bɛma yɛn. Sɛ yedwinnwen weinom ho a, ɛkyekye yɛn werɛ. (Yer 29:11, 12) Yesu nso dwen yɛn ho paa. Bere a yɛreyɛ yɛn asɛde sɛ Kristofo no, yebetumi anya awerɛhyem sɛ, ɔrennyaw yɛn saa, ɔbɛboa yɛn. Efisɛ ɔkaa sɛ: “Me ne mo wɔ hɔ.” (Mt 28:20) Sɛ yedwinnwen ahofadi a Onyankopɔn Ahenni no bɛma yɛanya daakye no ho a, ɛbɛhyɛ yɛn anidaso no mu den na ɛbɛboa yɛn ama yɛagyina ɔhaw ne abɛbrɛsɛ a yɛrehyia no ano.​—Ro 8:19-21.

HWƐ VIDEO A YƐATO DIN BERE A AHUM NO REBOBƆ BA NO, MOMFA MO ADWENE NSI YESU SO!​—NHYIRA A DAAKYE AHENNI NO DE BƐBRƐ YƐN NO. WUWIE A, BUA NSƐMMISA A EDIDI SO YI:

• Ɛyɛɛ dɛn na nnipa twee wɔn ho fii Onyankopɔn ho? Dɛn na afi mu aba?

• Daakye papa bɛn na ɛda hɔ retwɛn wɔn a wodi Yehowa nokware no?

• Ɛbɛyɛ dɛn na yɛn nsa aka nhyira yi?

• Wiase foforo a ɛda yɛn anim no, nhyira bɛn na worehwɛ kwan?