KRISTOFO ABRABƆ
Hwehwɛ Onyankopɔn Adwene Wɔ Ho
Biribiara a yɛyɛ no, yɛpɛ sɛ yɛyɛ ma Yehowa ani gye. (Mme 27:11) Sɛ yebetumi ayɛ saa a, ɛnde sɛ Onyankopɔn nhyɛɛ biribi ho mmara pɔtee mpo a, ɛsɛ sɛ gyinae a yebesi wɔ ho no kyerɛ sɛ yenim n’adwene. Dɛn na ɛbɛboa yɛn ama yɛatumi ayɛ saa?
Ɛyɛ a sua Bible da biara. Bere biara a yɛbɛkan Bible no, ɛte sɛ nea Yehowa rekasa akyerɛ yɛn. Sɛ yɛhwɛ sɛnea Yehowa ne ne nkurɔfo dii nsɛm, na yesua wɔn a wɔyɛɛ nea ɛteɛ wɔ n’ani so ne wɔn a wɔyɛɛ n’ani so bɔne no ho ade a, ɛbɛboa yɛn ama yɛahu n’adwene wɔ nneɛma ho. Sɛ yɛrebesi gyinae bi a, honhom kronkron betumi akae yɛn asuade ne nnyinasosɛm a yɛasua afi Onyankopɔn Asɛm mu no.—Yoh 14:26.
Yɛ Nhwehwɛmu. Sɛ ehia sɛ wusi gyinae bi a, bisa wo ho sɛ, ‘Kyerɛwsɛm anaa Bible mu asɛm bɛn na ebetumi aboa me ama mahu sɛnea Yehowa hu asɛm no?’ Bɔ Yehowa mpae sɛ ɔmmoa wo. Afei asafo nhoma a yɛde yɛ nhwehwɛmu a ɛwɔ wo kasa mu no, fa hwehwɛ Bible nnyinasosɛm a ɛfa w’asɛm no ho, na fa nnyinasosɛm no yɛ adwuma.—Dw 25:4.
HWƐ VIDEO A YƐATO DIN ƐSƐ SƐ YƐDE ‘BOASETƆ TU MMIRIKA’—DIDI YIYE. WUWIE A, BUA NSƐMMISA A EDIDI SO YI:
Ɔhaw ahorow bɛn na onuawa kumaa a ɔwɔ video no mu no hyiae?
Sɛ nea ɛtoo onuawa no bi to wo a, sɛn na wubetumi de nneɛma a yɛde yɛ nhwehwɛmu no adi ho dwuma?
Sɛ yegye bere yɛ nhwehwɛmu na yɛyɛ kokoam adesua a, sɛn na ɛboa yɛn ma yesisi gyinae pa?—Heb 5:13, 14