Owu Ntwa Ne Nyinaa To!

ADEBƆ ho nyansahu rentumi mmɔ ɔdesani nkwa, na ɛrentumi mma awufo nsan mma nkwa mu bio. Nanso adesamma Bɔfo no betumi! Ɔwɔ ɔdesani nkwa ne sɛnea ɛyɛ adwuma no ho nimdeɛ a edi mu. Obetumi ayɛ nneɛma a nkwa mfiase ho animdefo mpo ntumi nte ase, na wɔaka sɛ wɔbɛyɛ bi.

Esiane sɛ Onyankopɔn na ɔbɔɔ onipa nti, onim ɔkwan a ɔbɛfa so ama wɔatra nkwa mu daa, na wɔasan abɔ no foforo bere a wawu. Na afei a Onyankopɔn ama kwan ma obiara ahu nea afi ne mmara ho asoɔdenyɛ mu aba no, bere a ɔde besiesie nsɛm wɔ asase so no rebɛn ntɛmntɛm. Nea ɛka eyi ho ne awufo a obenyan wɔn afi wɔn nna mu na wakyerɛ adesamma kwan akɔ daa nkwa mu wɔ asase so.

Dabi, owu rentwa ne nyinaa to! Ɛyɛ Onyankopɔn atirimpɔw sɛ ɔbɛsan de paradise tebea a na ɛwɔ Eden no aba asase so nyinaa, na wɔama adesamma nsa aka pɛyɛ a na anka wɔwɔ no bio. Eyi betumi ama nnipa atra ase daa wɔ asase a wɔbɛsan ayɛ no paradise a anigye wom so. Ɛno nti Yesu tumi ka kyerɛɛ ɔbarima bi a na ɔrewu no sɛ: “Wobɛka me ho wɔ paradise.” Na ɛno nti nso na ɔdwontofo no tumi kyerɛwee sɛ: “Treneefo benya asase no adi, na wɔatra so daapem.”​—Luka 23:43; Dw. 37:29.

Nanso sɛ asetra wɔ Onyankopɔn nhyehyɛe foforo no mu betumi ayɛ nea mfaso wɔ so a, adesamma hia biribi a ɛsen daa nkwa. Wohia biribi a ɛkyɛn owusɔre a ɛbɛba. Dɛn bio na ehia titiriw? Ɛsɛ sɛ woyi mprempren nneɛma nhyehyɛe bɔne, a enni asɛntrenee na ɛyɛ basabasa no fi hɔ. Afei nso, ɛho hia sɛ wonya trenee nniso wɔ adesamma nyinaa so.

Nniso a Ɛyɛ Pɛ

Bere a Yesu rekyerɛ n’akyidifo no sɛ wɔmmɔ mpae no, ɔde Onyankopɔn apɛde a wɔbɛyɛ wɔ asase so a ɛbɛba mu no kaa Onyankopɔn soro ahenni a ɛbɛba no ho. (Mat. 6:9, 10) Saa ɔsoro ahenni, anaa nniso, no ne nea Onyankopɔn bɛfa so adi Paradise a wɔbɛsan de aba no ho dwuma.

Nea ɛfata no, Yesu ne saa nniso no hene a wɔapaw no. Ɔno ne Kristo a wɔhyɛɛ ne ho bɔ sɛ ɔbɛba sɛ agyenkwa, odiyifo a ɔsõ kyɛn Mose, ɔhene a n’ahenni bɛtra hɔ daa.​—Deut. 18:15; Yes. 9:6, 7; Luka 1:30-33; Yoh. 4:42.

Mfiase no, ahenni a ɛwɔ Kristo nsam no beyi mprempren nneɛma nhyehyɛe a ɛwɔ asase so a enye no afi hɔ. Eyi beyi nniso nyinaa, kwasafo nhyehyɛe ne sikasɛm ho nhyehyɛe a ahyɛ adesamma so bere tenten no nyinaa afi hɔ. (Dan. 2:44) Nanso Bible nkɔmhyɛ kyerɛ sɛ “nnipakuw kɛse” bi befi mu aka. Wɔde eyinom bɛkɔ Onyankopɔn nhyehyɛe foforo no mu na wɔafi nkwa ase foforo wo asase a wɔapopa nsɛmmɔnedi afi so so, a daa nkwa hokwan da wɔn anim.​—Adi. 7:9, 10, 14.

Awufo a Wobenyan Wɔn

Ɛnyɛ wɔn a wobefi mprempren nhyehyɛe yi awiei mu aka no nko na wobenya nkwa anidaso; awufo no pii nso benya saa anidaso yi. Yesu kaa eyi ho asɛm bere a ɔkae sɛ: “Mommma eyi nnyɛ mo nwonwa, efisɛ dɔn no reba a wɔn a wowɔ ada mu nyinaa bɛte ne nne, na wɔafi adi.” Ɔsomafo Paulo nso kae sɛ: “Owusɔre a wɔn a wɔteɛ ne wɔn a wɔnteɛ bɛsɔre no bɛba.”​—Yoh. 5:28, 29; Aso. 24:15.

Eyi bɛyɛ adebɔ foforo​—wɔn a wowu no a wɔsan bɔ wɔn foforo. Wɔbɛsan afi adamoa no mu aba a wɔwɔ nipasu a na wɔwɔ ansa na wɔrewu no, a wɔn nkae ne sɛnea na wɔn adwene di dwuma nyinaa ka ho. Esiane sɛ na kan nipadua horow a wokura no asan kɔ dɔte mu nti, Onyankopɔn bɛma wɔn nipadua foforo a ekura kan nipasu no adwene mu tumi a onipa no wɔ ansa na ɔrewu no. Bere a Yesu wɔ asase so no, oyii Onyankopɔn tumi yi adi denam nyan a onyan awufo te sɛ Lasaro, Nain okunafo no babarima no, ne hyiadan mu panyin babea no so.​—Yoh. 11:38-44; Luka 7:11-17; 8:49-56.

Na, sɛnea Yesu saa ayarefo yare bere a ɔwɔ asase so no, saa nso na obeyi nea bɔne de aba no afi adesamma a wɔagye wɔn no so, ma wɔasan ayɛ pɛ wɔ adwene ne nipadua mu. Afei, sɛ ‘ɔtamfo a odi akyiri no, obetu owu agu.’ Owu a yenya fii awo mu no renkum obi bio da!​—1 Kor. 15:26; Adi. 21:1, 3, 4.

Afei biribiara nni hɔ a ɛbɛsɛe asomdwoe ne biakoyɛ a ɛbɛtra asase so no. Adesamma a wɔagye wɔn no bɛtrɛw Paradise no mu de akosi asase ano. Wobedi wɔn adwuma a anigye wom no mu aba daa, efisɛ Yehowa ‘bebue ne nsam na wama asase nyinaa anya nea wɔpɛ adi amee.’ (Dw. 145:15, 16) Mmoa mpo bɛba abɛhyɛ onipa ase ma ɔde ɔdɔ ahwɛ wɔn so bio, sɛnea na ɛte wɔ Eden no.​—Gen. 1:28.

Dɛn Na Ɛsɛ Sɛ Woyɛ?

So wopɛ sɛ wunya saa nhyira horow yi wɔ Paradise a wɔasan de aba bio no mu anigye wɔ asase so anaa? Ɛnde hwehwɛ Ɔbɔadeɛ a wabɔ ne tirim sɛ ɔde eyinom bɛba no ho nimdeɛ a edi mu. Ɛno na Yesu kae sɛ ɛsɛ sɛ wɔyɛ. (Yoh. 17:3) Fa gyidi di Ɔkyerɛkyerɛfo Kɛse, Yesu Kristo, afotu ne n’akwankyerɛ akyi wɔ osetie mu. (Yoh. 3:36) Nnipa pii reyɛ saa wɔ wiase afanan nyinaa na wɔrenya mfaso horow ankasa mprempren.

Sɛ nhwɛso no, bere a ɔbea bi a ofi Asia a ɔte South Afrika no kunu wui no, osii gyinae sɛ ɔbɛkyen kɔm awu akɔka ne kunu no ho. Yehowa Adansefo kɔsraa no na wofi Onyankopɔn Asɛm mu kyerɛɛ no nokware a ɛfa awufo ho, a wɔannye no biribiara. Ɔtee ase sɛ, ɛwom sɛ na awerɛhow a ɔredi no fata de, nanso obetumi adi so na wanya daakye a anigye wom. Sɛnea osusuw ade ho no nyinaa sakrae. Afei de ɔno nso de saa anidaso a ɛreba yi kyerɛkyerɛ afoforo.

Dabi, owu ntwa ne nyinaa to! Yehowa de owusɔre anidaso a ɛyɛ nwonwa, a daa nkwa wɔ Paradise a wɔasan de aba bio nso ka ho, ma. Na bere a enni awiei a wɔde bedi nneɛma pa ho dwuma nso bɛba. Hwɛ sɛnea ɛbɛyɛ papa sɛ yebehu sɛnea asase no ne nneɛma a ɛyɛ nwonwa a ɛwɔ so nyinaa te no yiye, na yɛate amansan kɛse yi ne emu okyinsoroma ahorow ne nsoromma akuwakuw no nyinaa ase.

Nea ɛkyɛn ne nyinaa no, ɛbɛyɛ akomatɔyam kɛse sɛ yebehu yɛn Bɔfo Kɛse, Yehowa no yiye na yɛne no anya daa abusuabɔ a anigye wom, ‘efisɛ Yehowa ho nimdeɛ bɛhyɛ asase so ma sɛ nsu a ɛkata po so.’​—Yes. 11:9.