Mmofra Bisa Sɛ. . .

So Ɛsɛ Sɛ Mifi Fie?

“Mama ne Papa:

Wiɛ, afei de mereka sɛnea m’adi kan aka no, ɛnyɛ sɛ mereyɛ eyi de ahyɛ mo abufuw anaasɛ de atua ade bɔne bi a moayɛ me so ka. M’ani rentumi nnye bere a moaka me ahyɛ fie bere nyinaa te sɛ nea mopɛ sɛ meyɛ no. Ebia eyi nso rema m’ani nnye nanso mepɛ sɛ mesɔ hwɛ.”

EYI na abeawa bi a wadi mfe 17 de fii krataa a ɔde rekra n’awofo ase. Ɔno, te sɛ mmofra afoforo pii no, te nka sɛ ɛsɛ sɛ wɔtwe wɔn ho na wɔde wɔn ho. Martin a wadi mfe dunwɔtwe no gye tom sɛ: “Ɛkame ayɛ sɛ abofra biara a wadi mfe a madi no de fi a wobefi fie ho adwene no di agoru.” Nanso pii no ara yɛ nea ɛsen di a wɔde ho adwene no di agoru ara kwa. Sɛ nhwɛso no, wɔ Federal Republic of Germany no, mmeawa baasa biara mu biako ne mmarima baanan biara mu biako a wɔadi fi mfe 15 kosi 24 nte fie mprempren.

Onyankopɔn hu siei sɛ pɛ a obi bɛpɛ sɛ ɔware no bɛma “wagyaw n’agya ne ne na.” (Genesis 2:23, 24) Nanso ntease pa afoforo wɔ hɔ a ɛbɛma obi afi fie, te sɛ trɛw a obi bɛtrɛw ne som mu ama Onyankopɔn. (Marko 10:29, 30) Nanso wɔ mmofra binom fam no, ɛyɛ pɛ a wɔpɛ honam fam nneɛma pii nti na wofi fie. Nanso afoforo nso de hokwan bi a ebue di dwuma ara kwa. Germanni abofra bi a wɔfrɛ no Horst kae sɛ: “Ná madi mfe 17 pɛ. Da koro bi, bere a mereboa m’adamfo bi ma wasiesie ne dan mu no, yehuu sɛ obiara nte ɔdan a edi hɔ a mukaase ketewaa bi ka ho no mu. Mpofirim ara minyaa adwene sɛ ɛyɛ hokwan a manya sɛ me nso mefi fie.”

Nanso dɛn nti na mmofra pii de saa hokwan a wonya no fi fie?

“Wopɛ Sɛ Wunya Ahofadi Kɛse”

Wɔ mmofra pii fam no, ɛte sɛ nea wonni ahotɔ wɔ fie. Aberante biako ka sɛ: Ne tiaa ara ne sɛ wopɛ sɛ wunya ahofadi kɛse ara kwa. Tra a wo ne w’awofo bɛtra fie no nyɛ akomatɔyam bio. Wo ne wɔn gye akyinnye bere nyinaa na wɔnte wo ahiade ahorow no ase. Nea ɛka ho no, wote nka sɛ anohyeto ahorow no dɔɔso dodo, na ɛsɛ sɛ wokyerɛkyerɛ biribiara a wobɛyɛ mu kyerɛ w’awofo bere nyinaa.”

Ɔsomafo Paulo kyerɛkyerɛɛ mu sɛ: “Meyɛ abofra no, mekasae sɛ abofra, medwenee sɛ abofra, misusuwii sɛ abofra; na meyɛɛ ɔpanyin yi, magu mmofraasɛm no.” (1 Korintofo 13:11) Ebia susuw a wubesusuw sɛ wonyɛ abofra” bio no bɛma woasɔre atia bu a wobu wo sɛ woyɛ abofra no. Adolescence nhoma no ka sɛ: “Mmerante ne mmabaa wɔ ɔpɛ a emu yɛ den sɛ wɔbɛde wɔn ho. Wɔpɛ sɛ wɔyɛ nea wɔpɛ, wɔkyerɛ wɔn adwene na wɔtra ase sɛnea wɔpɛ sen sɛ wɔbɛyɛ nea mpanyimfo a wodi wɔn so no pɛ.”

Nanso, ɛwom sɛ ebia wubebu wo ho sɛ woanyin de, nanso sɛnea w’awofo susuw nsɛm ho no yɛ soronko. Ebia wɔda so ara hu “mmofraasɛm” bi wɔ wo ho. Na ɛwom sɛ ebia wopɛ ahofadi a wode bɛyɛ biribi de, nanso ebia w’awofo behu sɛ ɛho hia sɛ wosiw wo kwan.

So ɛnyɛ w’awofo na wobetumi ahu faako a wubetumi ade wo ho akodu ankasa? Bible no ka sɛ: “Me ba, tie w’agya nteɛso, na mpo wo na mmara.” (Mmebusɛm 1:8) Nokwarem no, ɛtɔ bere bi a ebia awofo ahobammɔ bɛyɛ nea ɛtra so anaasɛ wɔn anohyeto bɛyɛ nea emu yɛ den dodo. Nanso sɛnea ɔwofo biako ka faa ne babea ho no: “Ɛhaw me sɛ biribi betumi ato no. Osusuw sɛ memma omfi adi efisɛ minni no mu ahotoso, nanso ɛnte saa. Mempɛ sɛ opira.”

So Fi a Wubefi Fie Ne Ano Aduru?

Dɛn na wobɛyɛ sɛ w’awofo yɛ katee a? Sɛ́ anka wubefi fie no, kae sɛ wo da so ara hia w’awofo. Ɛdɛn, wubenya wɔn nhumu ne wɔn nyansa mu mfaso wɔ mfe pii a ɛbɛba no mu. (Mmebusɛm 23:22) Eyi yɛ nokware titiriw, sɛ w’awofo suro Onyankopɔn a. So ɛsɛ sɛ afei de wo ne wɔn tetew mu wɔ w’asetra mu esiane sɛ wo ne wɔn anyɛ adwene wɔ nneɛma kakraa bi ho nti? Sɛ́ anka wubefi fie ntɛm ara no, so ɛrenyɛ nea nyansa wom sɛ wobɛbɔ mmɔden sɛ wobɛma wo ne wɔn ntam nkitahodi no ayɛ obi a wanyin de?a

Susu nea Germanni abofra bi a wɔfrɛ no Karsten ka wɔ saa asɛm yi ho no ho. N’awofo hyɛɛ no nkuran denneennen sɛ mma ommfi fie nkɔ kosi sɛ obenya biribi ankasa a obegyina so afi fie. Ɔyɛɛ eyi kosii sɛ bere bi akyi no, wɔtoo nsa frɛɛ no sɛ ɔmmɛsom sɛ bere nyinaa somfo wɔ Ɔwɛn Aban Asafo no baa dwumadibea a ɛwɔ West Germany no. Mprempren otu mmofra afoforo fo sɛ: “Mmfi fie da, esiane sɛ wo ne w’awofo ntumi mmɔ nti. Sɛ wo ne wɔn ntumi mmɔ a, ɛbɛyɛ dɛn na woatumi ne nnipa afoforo abɔ? Fi a wubefi fie no renni ɔhaw no ho dwuma. Nea ɛne no bɔ abira no, ɛno bɛkyerɛ sɛ wo ho nkokwawee koraa sɛ wobɛde wo ho na ɛbɛma wo ne w’awofo ntam apae kɛse.”

Na nneɛma afoforo wɔ hɔ a ebia ɛbɛma fi a wubefi fie no ayɛ nea nyansa nni mu. Mpɛn pii no mmofra hu sɛ ɛnyɛ mmerɛw sɛ wɔn nkutoo bɛtra sɛnea na wosusuw no. Mpɛn pii no nnwuma ho yɛ na. Ɔdan akatua akɔ soro. Na dɛn na sika fam ahokyere a ɛte sɛɛ a aka mmofra no hyɛ wɔn ma wɔyɛ? Pulling Up Roots nhoma no akyerɛwfo ka sɛ: “Wɔsan ba fie a wɔhwɛ kwan sɛ awofo bɛsan ahwɛ wɔn bio.” Mpɛn pii no mmofra pii no ara fa saa kwan a ɛyɛ animguase yi so. Esiane wiase no sikasɛm nhyehyɛe a ayɛ basaa no nti, so ɛsɛ sɛ wopɛ ntɛm pow ahobammɔ a fie a wote de ma no?

Asiane Kɛse a Anibere Wom

Wɔ Luka ti 15:11-32 no, Yesu ka aberante bi a ɔpɛe sɛ ɔde ne ho ho asɛm. Bere a ɔmpɛ sɛ ɔtwɛn no, okogyee ahode a ɛbɛyɛ ne de no na otuu kwan. Nanso na ahofadi nte sɛ nea na osusuw no koraa. Bere a otuu kwan “kɔɔ akyirikyiri asase bi so” akyi no, “ɔkɔbɔɔ ahohwi sɛee n’ahode nyinaa.” Bere a onni n’awofo tumi a eye ase no, ɔne nguaman buu bra bɔne! Adwuma a ɔbɛyɛ ho yɛɛ den maa no, ma enti ɔkɔyɛɛ adwuma a Yudafo bu no animtiaa​—ɔkɔhwɛɛ mprako.

Ɔba ɔdesɛefo anaa ‘ɔhohwini’ no dii ne tebea bɔne yi ho awerɛhow sɛ: “Apaafo ahe na m’agya nni a wonya aduan ma ɛboro so; na me de, ɔkɔm rekum me yi. Mɛsɔre makɔ m’agya nkyɛn, na mase no sɛ: Agya, mayɛ ɔsoro ne w’anim bɔne.” Ɔrekyerɛ ahobrɛase no Ɔba “hohwini” no gyaee ahantan na ɔsan baa fie.

Ɛwom sɛ wobuu saa bɛ yi de kyerɛɛ Onyankopɔn mmɔborohunu de, nanso asuade pa bi wom: Fi a wubefi fie a nyansa nni ɛho atitirimpɔw no mu no betumi apira wo wɔ abrabɔ ne honhom mu! Nea ɛyɛ awerɛhow no, Kristofo mmofra binom a wɔfaa ahofadi kwan so no ahu amane wɔ honhom mu. Esiane sika fam ahokyere nti, ebinom ne mmofra afoforo a wɔn asetra kwan ne Bible nnyinasosɛm bɔ abira kyɛ ɛka ahorow te sɛ ɔdan ne aduan ho ka. Nanso Bible no bɔ kɔkɔ sɛ: “Mommma wɔnnnaadaa mo. Fekubɔ bɔne sɛe su a ɛho wɔ mfaso.” (1 Korintofo 15:33, New World Translation) Afoforo de ahofadi foforo a wɔanya no ayɛ nneɛma bɔne. Horst (a yɛadi kan aka ne ho asɛm no) dii kan huu eyi.

Onim abofra bi a ne mfe a wadi ne ne de yɛ pɛ a ɔno nso afi fie. Horst ka sɛ: “Ɛwom sɛ ɔnwaree de, nanso ɔne n’adamfo ɔbea bi kɔtrae. Wɔtow pon ahorow a nsa a ano yɛ den abu so wɔ ase, na mpɛn pii no ɛma ɔbowee. Sɛ anka ɔda so ara ne n’awofo te a, anka wɔremma eyinom mu biara ho kwan. Horst de baa awiei sɛ: “Ɛyɛ nokware sɛ bere a woafi fie no wowɔ ahofadi pii. Nanso sɛ yɛbɛka no nokware mu a, so ɛnyɛ nea mpɛn pii wɔde yɛ nneɛma bɔne?”

Enti sɛ wopɛ ahofadi pii a, bisa wo ho sɛ: Dɛn nti na mepɛ ahofadi kɛse saa? So mepɛ sɛnea ɛbɛyɛ a metumi anya hokwan a eye de ayɛ nneɛma a ɛho wɔ mfaso? Anaa mepɛ sɛnea ɛbɛyɛ a menya honam fam nneɛma pii anaa mede ayɛ nneɛma ahorow a wɔabara? Kae nea Bible no ka wɔ Yeremia 17:9 no: “Koma wɔ hɔ yi, ɛyɛ okontomponi sen ade nyinaa na emuɔ, hena na obenya mu ahuye?” Enti yɛ nhwehwɛmu a emu dɔ wɔ wo botae horow ho ansa na woayɛ nhyehyɛe a anibere wom a wode befi fie.

Ɛrenkyɛ nneɛma ahorow te sɛ aware bɛma woafi w’awofo nkyɛn. Enkosi sɛ saa bere no bɛba no, dɛn nti na ɛsɛ sɛ woma wo ho pere wo kɛse sɛ wobɛkɔ? Wo ne w’awofo nsusuw ho. Ebia wɔn ani begye sɛ wɔbɛma woatra hɔ, ne titiriw no, sɛ woboa abusua no yiyedi ankasa a. Ɛdenam wɔn mmoa so no, wubetumi akɔ so anyin, asua ade na wo ho akokwaw wɔ fie hɔ ara.

[Ase hɔ asɛm]

[Kratafa 18 adaka]

“Mma, muntie mo awofo asɛm Awurade mu; na eyi na ɛteɛ. Di w’agya ne wo na ni! Eyi ne mmara asɛm a edi kan a bɔhyɛ wɔ mu: na awie wo yiye, na wo nna aware asase so. Na agyanom, munnyi mo mma abufuw, na mmom monyɛn wɔn Awurade kasakyerɛ ne nyansakyerɛ mu.”​—Efesofo 6:1-4.

[Kratafa 17 mfoni]

Ɛdenam w’awofo mmoa so no wo ho betumi akɔ so akokwaw wɔ fie