Wiase Nsɛm

Aware Ahorow a Anigye Wom

Bere a The New York Times reka nea efii nnansa yi nhwehwɛmu ahorow a ɛfa aware ahorow a etumi tra hɔ kyɛ ho mu bae no ho asɛm tiaa no, ɛbɔɔ amanneɛ sɛ, “tumi a wotumi ka ɔhaw horow ho asɛm ho hia kɛse sen sɛnea awarefo dɔ wɔn ho wɔn ho kɛse anaa anigye a na wɔwɔ ansa na wɔwaree no.” Adwenemyare ho ɔdenimfo Howard Markman a ɔwɔ Denver Sukuupɔn mu no ka sɛ, “Awarefo nyinaa hyia tebea a ɛyɛ anigye ne nea ɛyɛ awerɛhow wɔ aware mu. Nanso ɛyɛ awarefo a wɔne wɔn ho nni nkitaho yiye no na ɛda adi kɛse sɛ wɔn aware no yɛ nea ebetumi agu wɔ tebea a emu yɛ den a ɛte sɛɛ mu.” George Levinger a ɔwɔ Massachusetts Sukuupɔn mu de ka ho sɛ: “Ɛnyɛ nea ɛho hia wɔ aware a anigye wom mu ne fata a mofata mo ho mo ho kɛse, na mmom ɔkwan a mofa so di fata a monfata mo ho mo ho dwuma no.”

Ɔkwan a Eye Sen Biara a Wɔfa So Hwɛ Abofra

Burton L. White a ɔyɛ The First Three Years of Life nhoma no kyerɛwfo no ka sɛ, “Baabi a wɔhwɛ mmofra wɔ hɔ biara nni hɔ wobetumi ahwɛ abofra yiye wɔ hɔ asen sɛnea ɔwofo betumi ayɛ no.” White ka sɛ, ɛsɛ sɛ awofo gyae nnwuma wɔyɛ no ansa na wodi hia mpo na ama wɔatra wɔn mma ho wɔ wɔn mfe abiɛsa a edi kan wɔ wɔn asetra mu no mu. Bere a ogye tom sɛ ɛnyɛ bere nyinaa na wobetumi de nea wakamfo akyerɛ no adi dwuma no, ɔte nka sɛ mpɛn pii abofra no awofo ankasa na wotumi di n’ahiade ho dwuma, wɔde nkamfo ma wɔ nea otumi yɛ ho na wɔboa no ma onya nkɔso sɛnea ɛsɛ sen biara. Ɔde ka ho sɛ: “Ɛyɛ nea ɛyɛ den sɛ wubetumi anya obi a oye sen wo ma watete wo ba.”

Ofie Adwuma a Abusua Yɛ

Times of London bɔ amanneɛ sɛ, “Wɔ susuw a wosusuw sɛ mmea anya ahofadi wɔ ofie nnwuma ahorow a wɔyɛ no ho nyinaa akyi no, wɔn mu ɔha biara mu 93 da so ara nya siesie a wosiesie fie no mu kyɛfa kɛse. Okununom mu ɔha biara mu 2 pɛ na wɔyɛ adwuma no mu fã kɛse na wɔn mu ɔba biara mu 27 pɛ na wɔboa.” Bio nso, mmeawa mu ɔha biara mu 8 ne mmarimaa mu ɔha biara mu 3 pɛ na wɔboa wɔn nanom wɔ siesie a wosiesie hɔ no mu.

“Afiase a Woguan Kɔ”

Geoffrey Fellows a ɔyɛ Ahyehyɛde a Ɛhwɛ afiase nsɛm so wɔ Ontario no muni no kyerɛw wɔ Globe and Mail a wotintim Wɔ Toronto no mu sɛ, “Kyerɛwtohɔ ahorow kyerɛ sɛ nnipa a wɔwɔ afiase no dodow kɔ soro kɛse afe biara bere a awɔwbere fi ase no.” Dɛn ntia? Osusuw sɛ efisɛ, “nnipa pii wɔ hɔ a wɔwɔ ɔpɛ sɛ wobebu mmara so sɛnea ɛbɛyɛ a wobeguan afi awɔw no mu.” Henanom ne nsɛmmɔnedifo yi?

Fellows ka sɛ, “Nnipa a wontumi nhwɛ wɔn ho, wɔn a wɔnyɛ adwuma ne akobɔfo.” Nanso ɛyɛ biribi a ɛsen bere no na ɛka wɔn ma wɔkɔ afiase. Afiase ahorow no ma wonya aduan ne dabere, a asɛyɛde biara nna wɔn so.

“Afuru a Atew Asensɛn Hɔ” Ho Asiane

The Medical Post of Toronto, Canada no bɔ amanneɛ sɛ, “Sɛ obi afuru atew asensɛn hɔ a,​—ɛkyerɛ sɛ obetumi anya asiane a ɛbɔ ho anum a ɛne komayare anaa ɔyare bi a ɛma obi afã afã wu no asen wɔn a wonni srade pii saa no. Asiane kɛse nni wɔ a obi wɔ asere, anan ne to a ɛsosoe no mu.” Nea wohui yi yɛ nea egyina nhwehwɛmu pii a Swedenfo de bere tenten yɛe no so. Sɛ obi pɛ apɔwmuden kɛse a, Ɔbenfo Ulf Smith a ɔwɔ Goteborg Sukuupɔn a ɛwɔ Sweden mu no kamfo kyerɛ sɛ ɛnsɛ sɛ ɔbarima asen trɛw sen ne dwonku na ɛnsɛ ɔbea asen trɛw sen ne dwonku 0.8. Smith rema wɔn a wɔn nipadua mfinimfini ayeyɛ akɛse no anya anidaso no, ɔka sɛ ɛno bedi kan akɔ, sɛ wɔteɛteɛ wɔn apɔw mu a.

Kotolekfo Nsu Mu Asubɔ

St. Louis Post-Dispatch bɔ amanneɛ sɛ, “Apam Foforo no mu asu a wɔbɔ denam hyɛ a wɔde obi hyɛ nsu mu no so no rekɔ so wɔ Katolekfo mu.” James T. Telthorst a ɔyɛ St. Louis Archdiocese Ɔsom Dwumadibea so panyin no ka sɛ bere a asu a wɔbɔ obi denam nsu a wɔde petepete anaasɛ wohwie gu mmofra ne mpanyimfo a wɔanya adwenesakra no ti so yɛ ade a wɔda so ara yɛ no, mprempren de, wɔpɛ nsu mu asubɔ. Asɔre abiɛsa a ɛwɔ mpɔtam hɔ no bɔ nkurɔfo asu wɔ atare a wɔatu ma wɔde yɛ saa no mu. Telthorst gye tom sɛ, “Na hyɛ a wɔde obi hyɛ nsu mu bɔ no asu ne ade a na wɔyɛ wɔ asɔre ahorow a edi kan no mu.” Nanso amanneɛbɔ no anka nokwasɛm a ɛyɛ sɛ wɔanka akokoaa biako pɛ mpo a wɔbɔɔ no asu ho asɛm wɔ Bible mu no ho asɛm.

Ɔbarima Ne Ɔbea Nna a Edi Aware Anim Renya Nkɔso

The New York Times ka sɛ, “Amerikafo mmea mu bɛboro nkyem anan mu baasa afi ase renya ɔbarima ne ɔbea nna mu kyɛfa ansa na wɔaware.” Nea wɔahu no yɛ nea egyina nhwehwɛmu a ɛfa mmea a wɔanya fi mfe 15 kosi 44 no ho a Ɔman no Dwummadibea a ɛhwɛ Akwahosan ho Nkontaabu ho nsɛm so yɛe no so. Ɛkaa pefee sɛ, mmea a wɔwaree wɔ 1975 ne 1979 mfe no ntam no mu ɔha biara mu 79 nyaa ɔbarima ne ɔbea nna mu kyɛfa ansa na wɔware bere a mmea a wɔwaree wɔ 1960 ne 1964 mfe no ntam no mu ɔha biara mu 52 yɛɛ saa no. Nea wɔbɔɔ ho amanneɛ bio nso ne wɔn a woawo bere a wɔnyɛ awarefo no dodow a ɛkɔɔ soro​—efi ɔha biara mu 5 wɔ 1960 mu beduu ɔha biara mu 19 wɔ 1982 mu.

1914​—“Abakɔsɛm Mu Nsakrae Kɛse”

Die Welt atesɛm krataa a wotintim wɔ German no mu asɛm bi kaa yɛ a August 1, 1944 yɛ da titiriw wɔ abakɔsɛm mu no ho asɛm? Bere a ɔkenkanfo bi reka nea ɛkae ho asɛm no, ɔkyerɛw kɔmaa atesɛm krataa no akyerɛwfo sɛ wɔabu wɔn ani agu da bi a ɛho hia kɛse so​—August 1, 1914. Sɛnea ɔkenkanfo no kyerɛ no, saa da no na “abakɔsɛm mu nsakrae kɛse bi a ɛkaa wiase no nyinaa fii ase a ɛnyɛ sɛ ɛkaa Germany nkutoo na mmom ɛsakraa Europa ne wiase no nyinaa. Ɔko no ma yɛhweree nneɛma pii na wɔnam Versailles ‘apam’ a ɛno na ɛmaa wiase nyinaa ko a ɛto so abien no fii ase no so ma ɛbaa awiei. Nkɔso a Soviet Russia ne U.S.A. a. ɛyɛ ɔman a ɛwɔ tumi kɛse anya, tu a wotuu Europa gui ne sɔre a Wiase Aman a Ɛto So Abiɛsa no asɔre no nyinaa yɛ nneɛma a wiase nyinaa ko a edi kan no ma efii ase. Nna kakraa bi na ɛyɛ titiriw sen saa August 1, 1914 no!”

Bible Kyerɛwsɛm Yɛ Nokware

Wɔde adanse foforo a ɛkyerɛ yɛ a Bible kyerɛwsɛm a ɛwɔ hɔ nnɛ yɛ nokware no mae nnansa yi ara wɔ amanaman ntam nhyiam bi a wɔyɛe wɔ Basel, Switzerland no ase. Ɔbenfo Barbara Aland a ɔwɔ Germany Sukuu a ɛhwɛ Bible Nsaano Nkyerɛwee Mu Nhwehwɛmu ho nsɛm so wɔ Munster no daa nhwehwɛmu a wɔayɛ wɔ Hela Bible nsaano nkyerɛwee a wohuu wɔ 1975 mu wɔ St. Catherine Nkokorafi a ɛwɔ Bepɔw Sinai so no mu nsɛm a wɔatwa no tiaa adi. Ɔka kyerɛɛ atesɛm krataa Westfalische Nachrichten a wotintim wɔ Germany no sɛ: “Wɔde adanse a ɛsom bo foforo aka Apam Foforo mu kyerɛwsɛm no mu nhwehwɛmu no ho.” Asɛm no ka sɛ, “Apam Foforo nhoma no 69 a wonnim a wɔde wɔn nsa akyerɛw no mu nhwehwɛmu . . . kyerɛ sɛ kyerɛwsɛm a wɔagye atom abedu saa bere yi mu no yɛ nokware.”

Wɔn a Wonni Mfe Aduonu a Wonyinsɛn

Alan Guttmacher Sukuu a ɛwɔ New York no ka sɛ, wɔn a wonnii mfe aduonu a wɔwɔ United States a wonyinsɛn a woyi gu no dodow kɔ soro sen wɔn a wɔwɔ aman afoforo 37 a wɔanya nkɔso no mu. Wɔn a wonnii mfe aduonu a wonyinsɛn wɔ U.S. no yɛ 1,000 biara mu 96 bere a sɛ wode toto ho a, ɛyɛ 45 wɔ England ne Wales, 43 wɔ France, 35 wɔ Sweden ne 14 wɔ Netherlands. United States na edi kan wɔ nyinsɛn a wɔn a wonnii mfe aduonu yi gu no mu. Nhwehwɛmu no ma wohui sɛ ebedu bere a wobenya mfe 18 no, na mmea 1,000 biara mu 60 ayi nyinsɛn agu. Bɛyɛ 30 yɛ saa wɔ France ne Sweden, bɛyɛ 24 wɔ Canada, bɛboro 20 wɔ England ne Wales ne 7 wɔ Netherlands. Ɛkame ayɛ sɛ wɔn a wonnii mfe aduonu a wɔde wɔn ho hyɛ ɔbarima ne ɔbea nna mu no dodow wɔ aman asia no mu no yɛ pɛ nanso wɔkaa yɛ a ɛnyɛ den sɛ wɔn a wɔwɔ Europa aman no mu benya nnuru a wɔde siw nyinsɛn ano ne ɛho afotu a wɔde ma no ho asɛm sɛ ɛne ade titiriw a ama wɔn a wonyinsɛn no dodow nnɔɔso no.

Wɔpɛ Afunu a Wɔhyew Mmom

Na “monkora asase no so mma ateasefo” ne asɛm a wɔkae de fii afunu a wodii kan hyewee no ase wɔ Britania wɔ March 26, 1885 mu. Efi saa bere no reba no, ɛkame ayɛ sɛ wɔahyew afunu ɔpepem 11. The Associated Press bɔ amanneɛ sɛ, afunu a. wɔhyew wɔ Britania a ɛyɛ ɔha biara mu 67 no yɛ nea ɛkɔ soro sen biara wɔ wiase no mu no biako. Eyi yɛ nkɔanim kɛse a wɔanya fi 1940 bere a na wɔhyew nnipa a wowuwu no mu ɔha biara mu 3.8 pɛ wɔ Britania no. Dɛn nti na wɔyɛ eyi? Afunu a wɔhyew Kuw no kyerɛwfo Roger Arber ka sɛ, “Asase som bo kɛse.” Nea ɛne eyi bɔ abira no, ɔkae sɛ wɔhyew wɔn a wowuwu no mu bɛyɛ ɔha biara mu 13 wɔ Amerika, 52 wɔ New Zealand, 55 wɔ Sweden na 60 wɔ Denmark