Adehu No Awiei

WƆDE Amanaman Apam no sii hɔ na wɔyɛɛ ne nhyiam a etia abien wɔ Geneva, Switzerland, wɔ 1920 mu. Wɔ n’ahoɔden a na ɛso rehuan ne nhyehyɛe tenten a emu yɛ den wɔ Paris akyi no, na ɛte sɛ nea Woodrow Wilson mmɔdenbɔ ahorow no ayɛ yiye.

Ná Wilson nam Apam no so rebɛtrɛw ne “nokware, atɛntrenee, ahofadi ne asomdwoe” no mu. Wɔ ne kasa ahorow no biako mu no, ɔkae sɛ: “Yɛagye saa nokware no atom na ɛrebɛkyerɛ yɛn kwan, na ɛrebɛkyerɛ yɛn [Amerikafo] kwan, na ɛnam yɛn so de wiase no akɔ kommyɛ ne asomdwoe bea a wiase no nsoo ho dae da.” Ná adehu no mu nsɛm nen.

Ɔka kyerɛɛ Amerika Bagua no sɛ: “Yɛde asi hɔ awie, wɔdaa anidaso no adi. Ɛnyɛ yɛn ankasa tirim adwene bi so na ɛnam bae, na mmom ɛnam Onyankopɔn a ɔkyerɛɛ yɛn kwan yi no nsa so. . . . Yɛn anim ara na yebetumi akɔ a yɛama yɛn ani so wɔ ahotɔ honhom mu, de adi adehu no akyi.” (Yɛn na yɛde nkyerɛwde soronko akyerɛw afã bi no.) Ɔdehufo no akasa bio. Ná ɔda so ara gye di sɛ ɔyɛ Onyankopɔn adwinnade a ɔnam so bɛma adesamma anya asomdwoe.

Wɔpowee wɔ Fie

Wɔbɔ gyee Wilson so sɛ ɔmanpanyin a ɔyɛ ogyefo wɔ Europa. Nanso ansa na ɔrekɔ Asomdwoe Nhyiam no mpo no, na wɔde kɔkɔbɔ ahorow ama no wɔ Amerika. Ɔkyerɛwfo Elmer Bendiner bɔ amanneɛ sɛ: “Theodore Roosevelt de [Amerika Baguafo] gyinaesi no too gua: ‘Ɛsɛ sɛ wɔn a wɔne yɛn ayɛ biako ne yɛn atamfo nyinaa ne Owura Wilson ankasa te ase sɛ Owura Wilson nni tumi biara sɛ ɔbɛkasa ama Amerikafo saa bere yi. . . Owura Wilson ne ne nsɛntitiriw dunan . . . no yɛ nea enni hokwan biara bio sɛ yebegye atom sɛ ɛyɛ Amerikafo apɛde.’”

Woodrow Wilson dii mfomso sɛ ɔkɔtɔn n’adehu no wɔ Europa na obuu n’ani guu adwenem naayɛfo a wɔwo n’ankasa kurom no so. Wɔ March 1920 mu no, Amerika Bagua no sii gyinae sɛ ɛremfa ne ho nhyɛ Apam no mu.

Esiane sɛ na ɛho adwene afura Wilson ani nti, ɔkɔɔ so ara a na eyi mfa ne ho. Wɔ ne baguam ɔkasa a etwa to mu no, gyidi a na ɔwɔ wom no daa adi pefee, nanso na ɛyɛ nea ɛrenkosi baabiara: “Mahu sɛ nkwasea asɔre atia Ɔsoro Akwankyerɛ pɛn, na mahu wɔn sɛe te sɛ nea ɔsɛe pasaa ne animtiaabu bɛba eyinom so bio no. Sɛ́ yebedi nkonim no yɛ nea akyinnye biara nni ho te sɛ nea Onyankopɔn di hene no.”

Esiane sɛ na ɔyare aka no ama ne fã-fã awu a ɛnkyɛe nti, n’ankasa manfo gyinae a wosi tiaa no no maa asɛm no sɛee kɛse. N’Apam ho adehu no anim bɛyɛ wusiwusi a enni mũ. Woodrow Wilson wui February 3, 1924. Asɛm a etwa to a ɔkae ne sɛ: “Meyɛ afiri a abubu nketenkete. Sɛ afiri no sɛe a​—mayɛ krado.” Ná ne nipadua abubu ankasa, na saa arã na ɛbaa ne wiase nyinaa Amanaman Apam no so.

“Versailles Apam no Nni Hɔ Bio”!

Ɛwom sɛ ɔko biara anhyɛ da amma wɔ mfirihyia 15 mu wɔ wiase de, nanso na Apam no wɔ ne wu amanehunu mu fi ne mfiase mpo. Antumi ansiw ɔko a Bolivia ne Paraguay de wɔn ho hyeem wɔ 1933 mu no ano. Antumi anyɛ tow a Mussolini kɔtow hyɛɛ Ethiopia so wɔ 1935 mu no ho hwee. Italy nam ɔsɛe ne nkonimdi so yii Ethiopia fii Apam no mu na ɛno ankasa fii Apam no mu December 1937. Latin-Amerika aman ason fii Apam no mu afe a edi hɔ no. Adehu no resɛe.

Ɔko sii wɔ Spain wɔ 1936 mu. Apam no mufo sii gyinae sɛ wɔremfa wɔn ho nnye saa ɔko no mu. Nanso Germany a efii Apam no mu 1933 no ne Italy de mmoa maa ɔsahene Franco a ɔtew atua tiaa Republikan nniso a ɛwɔ Madrid no. Apam no antumi ansiw nnipakum kɛse a ɛkɔɔ so wɔ Spainfo asase so no ano. Ɔko a ɛkɔɔ so wɔ Spain no bɛyɛɛ nea ɛde Amanaman Apam no wu ankasa bɛba​—Wiase Ko II​—ho nhwɛso.

Wɔ saa bere yi mu no na Hitler redi tumi wɔ Germany na na ɔde ntɛmpɛ retetew ne ho afi Versailles Apam a ɛde anohyeto ahorow maa Germany wɔ Ɔko Kɛse no akyi no mu. Ná ɔpɛ sɛ Germany man no nya Lebensraum (asase kɛse) . Ɔtrɛw Germany ahye mu denam Saar, Rhineland ne Austria a ɔde yɛɛ ne de no so. Ɔde Czechoslovakia yɛɛ ne de koraa wɔ 1939 mu. Wɔ eyi nyinaa mu no, Apam no antumi anyɛ hwee.

Ná asase ketewa a ɛnam Germany kosi Baltic mpoano kurow Danzig mu a wɔde maa Poland no ama Hitler bo afuw fi bere tenten. Osiw ɛno ano wɔ August 1939 mu. Ne nanmusifo de nkrasɛm kɔmaa Amanaman Apam no nanmusifo panyin a ɔwɔ Danzig no sɛ: “Wugyina hɔ ma Versailles Apam no; Versailles Apam no nni hɔ bio. Wɔ nnɔnhwerew abien ntam no, yɛde Swastika [Nazi frankaa] besi ɔdan yi atifi.”

Hitler asraafo kɔtow hyɛɛ Poland so wɔ September 1, 1939 mu. Britania ne Franse nso tuu Germany so sa. Wiase Ko II afi ase.

Adehu no Ano Brɛ Ase na Ɛsã

Woodrow Wilson hyɛɛ nkɔm bi kyerɛɛ nnipa a wɔwɔ Omaha wɔ 1919 mu a na ɛkyerɛ sɛ n’Apam no bedi nkogu. Sɛnea ɔkyerɛwfo Ishbel Ross kyerɛ no, ɔkae sɛ: “‘Metumi aka no pefee sɛ, sɛ amanaman no amfa ɔkwan yi [Apam no] a ebetumi asiw ano so a, wiase nyinaa ko foforo bɛba wɔ awo ntoatoaso foforo mu.’ Na ɔsan hyɛɛ nkɔm foforo wɔ San Diego bere a ɔkae sɛ: ‘Sɛ wode nea wɔde bedi dwuma wɔ ɔko foforo a ɛbɛba mu no toto ho a, na nea Germanfo de dii dwuma no te sɛ biribi a wɔde di agoru ara kwa.’” Ɛmfa ho sɛ Apam no wɔ hɔ no, Wiase Ko II bɛyɛɛ asɛm paara, na akode a wɔde dii dwuma no nyɛ agoru.

Dɛn nti na Apam no anyɛ yiye? Ɔkyerɛwfo Elmer Bendiner ka wɔ ne nhoma A Time for Angels no mu sɛ: “Wɔde Apam no sii hɔ wɔ amammuisɛm mu nsɛnhuhuw ahorow mu: sɛ ɔko a wogyaee wɔ 1919 mu no yɛ asomdwoe na ɛnyɛ nhyehyɛe a ɛde ɔko ba awiei ara kwa; sɛ wobetumi abrɛ ɔman yiyedi ase ahyɛ wiase nyinaa yiyedi ase; sɛ nniso bi betumi de ne ho ato nhyehyɛe bi a ɛnyɛ n’ankasa de so.” Na Bible no da ahuhusɛm foforo adi​—sɛ onipa nam amammui ahyehyɛde ahorow so betumi ama nea Onyankopɔn Ahenni a wahyɛ ho bɔ no nkutoo na ebetumi de aba no aba​—nokware asomdwoe ne anigye ma adesamma nyinaa.​—Adiyisɛm 21:1-4.

[Kratafa 10 mfoni]

Wiase Ko ll a ɛpae gui wɔ 1939 mu no na ɛde Apam no wu ankasa bae

[Asɛm Fibea]

U.S. Army photos