Ɔhaw A Ɛwɔ South Africa
Wɔ nsɛm abiɛsa a edidi so yi mu no, “Nyan!” kyerɛwfo a ɔwɔ South Africa no ka ɔhaw no ne ano aduru ho asɛm
“BASABASAYƐ a ɛkɔɔ so wɔ kurow bi mu no ama nnipa 26 awuwu.” “Nkurɔfo di awerɛhow bere a wosie nnipa 15 a wowuwui wɔ basabasayɛ bi mu no.” “Basabasayɛ no mu kɔ so trɛw ara.” “Nnipa a wɔawuwu no dodow adu 13 wɔ ɔtopae a ɛtotow wɔ SA wɔ nna 10 mu no mu.” Nsɛm ho amanneɛbɔ a ɛba da biara no ka awerɛhosɛm no ho asɛm. Sɛnea adwenkyerɛfo bi kae no: “South Africa rehyia ɔhaw a emu yɛ den sen biara wɔ n’abakɔsɛm mu, wɔ ɔman no ankasa mu ne akyi nso.”
Nnipa ɔpepem pii a wɔwɔ wiase nyinaa hu eyi ho mfonini na wɔkenkan ho nsɛm wɔ wɔn afi mu. Esiane ɛno nti, pii susuw sɛ South Africa nyinaa agyigya. Nanso ɛnte saa. Wɔ mmeae pii a aborɔfo wɔ ne wɔ abibifo nkuraa ase no, biribiara kɔ so pɛpɛɛpɛ.
Nanso, nsɛm a ɛyɛ hu sisi wɔ abibifo nkurow binom mu. Nnipa pii a na wɔrehwɛ TV ho dwiriw wɔn bere a wohuu obibini ababaa bi a wɔkyerɛ sɛ ɔno na ɔkeka nsɛm kyerɛ polisifo a wɔbobɔɔ no, tiatiaa no so, na wɔhyew no animono no. Mpɛn pii nnipa a wɔyɛ saa no dan wɔn abufuw no kɔ wɔn a wɔyɛ aban adwuma anaasɛ wɔn a wɔne aban no yɛ biako no so. Wɔakunkum abibifo a wɔyɛ polisifo na wɔahyew ɔhaha pii afi anaasɛ wɔasɛe no.
Basabasayɛfo yi mu pii yɛ mmofra. Wɔ wɔn fam no, basabasayɛ reyɛ ayɛ wɔn asetra kwan. Bio nso, akorɔnfo de saa hokwan no di dwuma tow hyɛ nnipa a wɔn ho nni asɛm so bɔ wɔn korɔn.
Basabasayɛ no aka South Africa sikasɛm nhyehyɛe. Wɔn sika no ahoɔden so atew kɛse. Ɛho abehia sɛ aguadikuw pii gyae adwuma yɛ, na eyi de adwuma a wonnya nyɛ aba. Edin a na South Africa wɔ wɔ aman afoforo so no asɛe.
Eyi ka aman a wɔbɛn no nso—Swaziland, Botswana, Lesotho, ne South West Africa/Namibia—a wɔn sikasɛm nhyehyɛe gyina South Africa so kɛse no. Wɔ mfe pii mu no, aman akɛse abien a ɛbɛn no, Mozambique ne Angola, ahyia ɔhaw a emu yɛ den sen South Africa de no a adwumayɛfo basabasayɛ a ɛka ho ama wɔn sikasɛm nhyehyɛe no asɛe kɛse.
South Africa yɛ ɔman a ɛyɛ fɛ a wɔde asase mu nneɛma ahorow ahyira no—nsase pa a wɔyɛ so afuw, sika kɔkɔɔ, adɛnkyɛmmo, biriw, kɔbere ne aboɔden abo afoforo pii. Na wɔ nnipa ahorow ahorow a wɔwɔ hɔ—abibifo, aborɔfo, Afrafrafo, ne Indiafo—no mu no, nnipa pa pii a wɔn yam ye wɔ hɔ.
Bio nso, South Africa yɛ ɔman a wɔpɛ nyamesom yiye. Abibifo ne aborɔfo pii gye Onyankopɔn di. Nanso ɔman no mu apaapae ma ɛyɛ awerɛhow. So ɛho asodi fã bi da nyamesom so? Dɛn na ɛde tebea a ɛyɛ awerɛhow yi aba? Na nea ɛho hia kɛse no, so ano aduru wɔ hɔ?