Owu​—Amanehunu A Ɛda Amansan Kɔn Mu

AFE biara nnipa ɔpepem 50 na wowuwu wɔ wiase nyinaa. Eyi kyerɛ sɛ nnipa 137,000 wu da biara. 5,700 wu dɔnhwerew biara, bɛyɛ 100 wu simma biara anaa nnipa 3 ne akyi wu wɔ anibu abien biara mu. Abusua biara nni hɔ a amanehunu a owu de ba no nka no. Ɔhene anaa ɔpapahwekwa, ɔdefo anaa hiani, ɔbarima anaa ɔbea​—wɔn nyinaa wu.

Amerikani nhoma kyerɛwfo, abɔrehudefo, ne aban nanmusini a wagye din Benjamin Franklin kyerɛw n’adamfo bi wɔ 1789 mu sɛ: “Wɔ wiase yi mu no, owu ne towtua nkutoo na wontumi nkwati.” Nanso ɛnyɛ ne nkutoo na ɔkaa saa. Bɛyɛ mfe 2,800 ansa na ɔreka eyi no, onyansafo Ɔhene Salomo a ofi tete Israel man mu kae sɛ: “Ateasefo nim sɛ wobewuwu.” Nanso, osii nea na wɔaka akyerɛ nnipa baanu a wodi kan no bɛyɛ mfe 3,000 ansa na ɔreka saa asɛm no so dua ara kwa: “Woyɛ dɔte na dɔte mu na wobɛsan akɔ.”​—Ɔsɛnkafo 9:5; Genesis 3:19.

Ɛmfa ho sɛ wontumi nkwatii owu wɔ adesamma abakɔsɛm mu no, ɛda so ara de awerɛhow kɛse ba. Wɔka no yiye sɛ yefi awosu mu pɛ sɛ yɛtra ase, na ɛnyɛ sɛ yebewu. Yɛpɛ sɛ abusuabɔ a ɛda yɛne yɛn mmusua ne yɛn nnamfo ntam no kɔ so tra hɔ. Nanso bere a mfe kɔ anim no, owu tetew saa abusuabɔ yi mu mmiako mmiako. Yɛn nananom, awofo, ne nnamfo wuwu.

Guinness Book of World Records ka sɛ: “Nokwasɛm ahorow no ne sɛ wɔn a wodi mfe ɔha a wotumi tra ase di mfe 113 ne akyi no ho yɛ nna yiye, na baabi a onipa nkwa nna du koraa a wogye tom mprempren no kyerɛ sɛ obiara ntra ase nni n’awoda biara wɔ ne mfe 120 akyi.” Enti, obiara nni hɔ a ɔte ase nnɛ a ohuu Winston Churchill (1869) anaa Mohandas Gandhi (1869) awo, anaa bere a Rusia tɔn Alaska maa United States wɔ 1867 mu, anaa kum a wokum Abraham Lincoln wɔ 1865 mu ​—sɛ wɔanka abakɔsɛm mu nsɛm a esisii ansa na afeha 19 reba ho asɛm mpo a.

Nokwarem no, nea wɔatumi ayɛ wɔ aduruyɛ ne nyansahu mu nyinaa akyi no, onipa nkwa nna da so ara si nea ɔbarima Mose a ɔtraa ase tete kae no ara pɛ: “Yɛn mfirihyiam nna, emu wɔ mfe aduoson, na sɛ ɛboro so a, na ɛredu aduɔwɔtwe na emu ahoahoade yɛ ɔbrɛ ne ahuhude, na etwam ntɛmso, na yetu kɔ.” (Dwom 90:10) Ná eyi yɛ nnipa nyinaa mfe a wɔakyekyem pɛpɛɛpɛ. Mose ankasa dii mfe 120.

Sɛ asetra mu wɔ ɔhaw sɛ dɛn ara a, dɔfo wu de yaw ne awerɛhow soronko ba. Mpɛn pii no ɛka wɔn a wɔte ase no akwahosan wɔ ɔkwammɔne so na wɔahu mpo sɛ ɛde yare ne owu ba. Ɛmfa ho sɛ abusua no muni bɛn na owu no, wɔte nka sɛ wɔahwerew ade kɛse. Sɛnea adwenemhaw ho nimdefo bi kae no. “sɛ nea ɔwoo wo wu a, wahwere wo tete. Na wo ba wu a, wahwere wo daakye.” Ahohia ne nkate mu haw a edi akyi ba no nyɛ nea wobetumi akyerɛkyerɛ mu. Wɔtaa sɛe sika pii, na ɛma tebea no sɛe kɛse. Hyɛ a wɔhyɛ obi sɛ ɔnyɛ ayiyɛ ho nneɛma ne amanne horow bi no tumi ma awerɛhow no yɛ kɛse.

Nanso so ɔkwan bi wɔ hɔ a yebetumi afa so abrɛ ahokyere ne ɔhaw ahorow a ɛto yɛn bere a yɛn dɔfo bi wu no bi ase?