Mogya a Ɔyare Mmoawa Wom a Wɔde ma Wɔn a Mogya Tu Wɔn

MOGYA ho aguadi abɛyɛ adwuma a wonya sika dɔla ɔpepepem abien wom afe biara wɔ wiase nyinaa. Emu mfaso akyi a wodi de asiane kɛse bi aba France. Mogya a HIV mmoawa wom a wɔde maa nnipa bi a wɔwɔ ɔyare bi a wɔfrɛ no hemophilia (mogya a etu obi) no ama nyarewa bi a ɛne AIDS wɔ abusuabɔ akunkum wɔn mu 250 na aka nnipa ɔhaha pii nso.—The Boston Globe, October 28, 1992, kratafa 4.

Nnuruyɛfo a wɔyɛ anibiannaso ne aguadifo adifudepɛfo “apam a ɛho ntew” maa Germanfo a wɔyare hemophilia 400 wuwui, na anyɛ yiye koraa no mogya a HIV mmoawa wom a wɔde ma no ama ɔyare no aka nnipa foforo 2,000.—Guardian Weekly, August 22, 1993, kratafa 7.

Canada nso nyaa ne mogya ho aniwusɛm bi. Wobu akontaa sɛ wɔde mogya a HIV mmoawa wom maa Canadafo a wɔyare hemophilia bɛboro 700. Wɔbɔɔ aban no kɔkɔ wɔ July 1984 mu sɛ Red Cross kuw rekyekyɛ mogya a AIDS mmoawa wom ama Canadafo a wɔyare hemophilia, nanso wɔannyae mogya a ɔyare mmoawa wom no tɔn araa de kosii afe biako akyi wɔ August 1985 mu.—The Globe and Mail, July 22, 1993, kratafa A21, ne The Medical Post, March 30, 1993, kratafa 26.

Reuters (Nsɛm ho amanneɛbɔ adwuma a agye din wɔ Britain) amanneɛbɔ a efi Madrid, Spain, bae wɔ April 21, 1993 kyerɛe sɛ, sɛnea Health Ministry (akwahosan asoɛe) no kyerɛ no, Spain betua sika de apata nnipa 1,147 a wɔyare hemophilia a wɔde mogya ne nnuru a mogya wom a na AIDS mmoawa wom maa wɔn wɔ 1980 mfe no mu no. Nnipa bɛboro 400 na AIDS ayɛ wɔn ma wɔawuwu dedaw.—The New York Times, April 22, 1993, kratafa A13.

Ɛrekɔ 1982 awiei no, Centers for Disease Control (Asoɛe a ɛhwɛ siw nyarewa ano) fii ase bɔɔ NHF (National Hemophilia Foundation [Ɔman asoɛe a ɛhwɛ wɔn a wɔyare Hemophilia]) kɔkɔ wɔ asiane a ɛwɔ aduru a ɛma mogya tumi da a wɔfrɛ no factor VIII no mu—aduru no biako a wɔde ma obi no betumi ayɛ nnipa 20,000 mogya a wɔde afra, a sɛ wɔn mu biako pɛ mpo wɔ AIDS a, ɔyare no betumi ayɛ nea wɔde ma no no. Wɔde kɔkɔbɔ a emu yɛ den mae wɔ 1983 mu, nanso NHF de asɛm bi too gua wɔ May mu saa afe no a na n’asɛmti ne “NHF Hyɛ sɛ Wɔnkɔ so Mfa Aduru a Ɛma Mogya Tumi Da Nni Dwuma.” Eduu saa bere no na nnipa a ɛrekunkum wɔn no redɔɔso, na wɔkɔɔ so de nnipa mpempem pii nkwa too asiane mu. Ná saa aduru a ɛma mogya tumi da yi ho nhia na wɔn a wɔyare hemophilia no akɔ so atra ase; ná akwan foforo wɔ hɔ a wobetumi afa so asa yare no. Anka wobetumi agye nnipa mpempem pii nkwa. Ɛde besi 1985 no, na nnwumakuw a wɔyɛ nnuru no ahu sɛ sɛ wɔnoa aduru no a, ɛbɛyɛ nea asiane nnim. Ɛno mu mpo no na wogu so ara retɔn aduru a wɔnnoae no.—Dateline NBC, December 14, 1993.

[Mfonini Fibea wɔ kratafa 31]

CDC, Atlanta, Ga.