Atoro Som Rekɔ Ne Sɛe mu!

SƐNEA ɛbɛyɛ na yɛahu sɛ ebia wiase yi atoro som awiei abɛn no, momma yɛnhwehwɛ Bible nkɔmhyɛ ahorow biako a ɛyɛ nwonwa sen biara no mu. Ɛfa sɛnkyerɛnne kwan so ɔbea a ne ho yɛ nwonwa a wɔkaa ne ho asɛm wɔ Bible nhoma a etwa to, Adiyisɛm, mu no ho.

Wubetumi ayɛ ɔbea a wadi aman so sɛ ɔhemmaa, na wanya nnipa ɔpepepem pii asetra so nkɛntɛnso wɔ abakɔsɛm nyinaa mu—ɔbea a ɔwɔ ahode a ɔhyɛ atade afasebiri ne nkra nhoma, na ɔde sika, aboɔden abo, ne nhene pa ahyehyɛ ne ho no—ho mfonini wɔ w’adwenem? Wɔakyerɛw din tenten bi wɔ ne moma so sɛ ahintasɛm: “Babilon kɛse no, asase so nguaman ne akyide nã.” Esiane sɛ asase so ahene ne no abɔ “aguaman” nti, ne brasɛe no hyɛ no agyirae ma ɔda adi pefee. Ne nnebɔne atoatoa akodu soro. Ɔte aboa nwonwaso kɔkɔɔ bi a ɔwɔ ti ason ne mmɛn du so.—Adiyisɛm 17:1-6; 18:5.

Sɛ wubetumi ayɛ ɔbea yi ho mfonini a, ɛnde na wowɔ nkɔmhyɛ mu nipa titiriw a Yesu suani Yohane nam anisoadehu bi a onya fii ɔbɔfo bi hɔ no ho adwene bi. Ɔkyerɛkyerɛ mu yiye wɔ Adiyisɛm atiri 17 ne 18. Kenkan atiri ahorow yi wɔ w’ankasa Bible mu. Wubetumi adi sɛnea nsɛm sisi nnidiso nnidiso fi bere a wɔdaa ɔbea a ne ho yɛ nwonwa yi adi kosi sɛ awiei koraa owui no akyi.

Aguaman no a Wobehu No

Yegyina nneɛma abien a ɔhemmaa-aguaman no te so wɔ sɛnkyerɛnne kwan so no hu no. Wɔka ne ho asɛm wɔ Adiyisɛm 17:18 sɛ “kurow kɛse a edi asase so ahene so hene no.” Sɛnea ɛda adi wɔ Adiyisɛm 17:1, 15 no, eyi ma onya hokwan tra “nsu pii,” a ɛkyerɛ “nkurɔfo ne nkurɔfo akuwakuw ne aman ne ɔkasa horow” so. Sɛnea ti koro no ara nkyekyem 3 kyerɛ no, wohu no sɛ ɔsan te aboa a ɔwɔ ti ason so—wɔtaa de aboa di dwuma wɔ Bible mu sɛ wiase amammui nniso anaa ahyehyɛde ho sɛnkyerɛnne.

Eyi kyerɛ sɛ aguaman no, Babilon Kɛse, yɛ ahemman a ɛkorɔn a edi tumi ahorow ne wɔn nkoa so. Eyi nyɛ ahemman biara sɛ wiase atoro som ahemman.

Ɛyɛ nea wonim nyamesom akannifo nkɛntɛnso wɔ ɔman mmara ne amammuisɛm mu yiye wɔ abakɔsɛm mu. The World Book Encyclopedia ka sɛ: “Efi bere a Atɔe fam Roman Ahemman no hwee ase [afeha a ɛto so 5] mu no, pope no nyaa tumi kɛse sen onipa foforo biara wɔ Europa. . . . Ná pope no kura amammui ne honhom fam tumi. Wɔ afe 800 mu no, Pope Leo III de Frankfo sodifo, Charlemagne [Charles Ɔkɛseɛ], sii agua so sɛ Romafo hempɔn. . . . Ná Leo III de hokwan a pope no wɔ sɛ ɔma wogye ɔhempɔn tumi tom wɔ mmara kwan so no asi hɔ.”

Ɔsɔfopɔn Thomas Wolsey, (1475?-1530) yɛɛ tumi a na Katolek Asɔre no ne ne “mmapɔmma” di wɔ atumfoɔ so no ho nhwɛso kɛse. Wɔka ne ho asɛm sɛ “onipa a na ɔwɔ tumi sen biara wɔ England mfe pii mu.” Wɔ Ɔhene Henry VIII nniso ase no, “ankyɛ na ɔbɛyɛɛ obi a ɔwɔ tumi wɔ amansɛm nyinaa mu. . . . Odii ahensɛm na odii ne tumidi no mu ahurusi.” Nhoma a ɛka nneɛma pii ho nsɛm no toa asɛm no so sɛ: “Ɔsɔfopɔn Wolsey de mmɔden a na ɔbɔ sɛ ɔmanyɛfo ne ɔhwɛfo no hwɛɛ England ne aman foforo ntam nkitahodi so maa Henry VIII.”

Obi foforo a wobetumi de no ayɛ nhwɛso akyerɛ sɛnea Katolek tumidi nyaa wiasefo amansɛm so nkɛntɛnso a ɛda nsow ne Sɔfopɔn Richelieu, a ofi France (1585-1642), a odii France so ankasa . . . bɛboro mfirihyia 18 no.” Nhoma a yɛadi kan afa mu asɛm aka no ka sɛ: “Ná odi akokrokosɛm, na ankyɛ na ɔde ahopere hwehwɛɛ tumidi akɛse.” Wɔyɛɛ no sɔfopɔn wɔ 1622 mu, “na ankyɛ na ɔbɛyɛɛ otitiriw wɔ France aban mu.” Ɛda adi sɛ na ɔyɛ ɔbarima nsiyɛfo efisɛ “n’ankasa dii adehye asraafo no anim wɔ La Rochelle ntua no mu.” Asɛm no de ka ho sɛ “na Richelieu ani gye amanaman ntam nkitahodi ho kɛse.”

Kɔ a Vatican akɔ so de ne ho ahyehyɛ amansɛm mu no da adi pefee wɔ nkaebɔ ahorow a bere nyinaa epue wɔ Vatican atesɛm krataa, L’Osservatore Romano mu a ɛfa amannɔne ananmusifo a wɔde wɔn abodin nkrataa rema otumfoɔ pope no. Ɛda adi sɛ Vatican wɔ Katolekfo anokwafo a bere nyinaa wobetumi ama pope no ahu amammui ne amanaman ntam nsɛm tebea wɔ wiase nyinaa.

Nhwɛso pii wɔ hɔ a yebetumi de ama de akyerɛ nkɛntɛnso a nyamesom akannifo wɔ—wɔ Kristoman mu ne akyi—wɔ wiase yi amammuisɛm mu. Nokwasɛm a ɛyɛ sɛ sɛnkyerɛnne kwan so aguaman no te “nsu pii” (a egyina hɔ ma “nkurow ne nkurɔfo akuwakuw ne aman”) ne aboa (a egyina hɔ ma wiase amammui tumidi) so no nso kyerɛ sɛ nkɛntɛnso a ɔwɔ wɔ nkurow, nkurɔfo akuwakuw, aman, ne tumidi ahorow so no yɛ soronko, na ɛkorɔn sen amammui tumidi bi ara kɛkɛ. Ma yɛnhwɛ sɛnea ɛte.

Ná edin tenten a ɛbɔ ne moma so no fã bi ne “Babilon Kɛse.” Ɛfa tete Babilon a Nimrod a na ‘ɔsɔre tia Yehowa,’ nokware Nyankopɔn no, kyekyeree bɛyɛ mfe 4,000 a atwam ni no ho. (Genesis 10:8-10) Edin yi a ɛda ne so no kyerɛ sɛ ɔyɛ tete Babilon ho nhwɛsode kɛse, bere a esi ne su titiriw so dua no. Su bɛn? Ná ɔsom a egyina ahonhonsɛmdi, amanne ahorow a ɛmfata, ahoni som, nkonyaayi, nsoromma mu hwɛ, ne gyidi hunu so—a Yehowa Asɛm kasa tia ne nyinaa no—ahyɛ tete Babilon ma.

The New International Dictionary of New Testament Theology ka sɛ wɔ afeha a ɛtɔ so 18 A.Y.B. mu no, wɔyɛɛ Maduk “Babilon kuropɔn nyame, ma enti ɔbɛyɛɛ Sumeria-Akkadiafo anyame bɛyɛ 1300 no mu otitiriw. Ɛkaa ɔsom mu amanne nyinaa boom. . . . Wɔ Gen. 11:1-9 no, wɔka dimmɔne a Babilonfo asɔrefie kɛse no gyei ho asɛm sɛ nnipa ahantan a ɛpɛ sɛ ɛkorɔn sen ɔsoro.”

Enti na tete Babilon ne atoro som fibea, a bere kɔɔ so no, ɛkaa wiase nyinaa. Babilon som mu nneyɛe, nkyerɛkyerɛ, amanne, ne nsɛnkyerɛnne atrɛw wɔ wiase afã horow nyinaa na ɛda adi wɔ wiase som mpempem pii a atu afra no mu. Amammui nniso ahorow, ne ahemman ahorow asɔre na ahwe ase, nanso Babilon som atumi afi ne nyinaa mu aka.

Dɛn Nti na ne Sɛe Abɛn Saa?

Sɛnea wɔakyerɛkyerɛ mu mpɛn pii wɔ nsɛmma nhoma yi a aba dedaw mu no, Bible nkɔmhyɛ ne nsɛm a awosow wiase no fi 1914 no ma ɛda adi pefee sɛ seesei yɛte “nneɛma nhyehyɛe no awiei.” (Mateo 24:3, NW) Eyi kyerɛ sɛ wiase nhyehyɛe bɔne a ɛyɛ n’ade te sɛ aboa no awiei rebɛn ntɛmntɛm te sɛ “aboa” a ɔwɔ mmɛn du a “ɔhyɛ atade afasebiri” a seesei aguaman no te ne so no ara pɛ. (Adiyisɛm 17:3) Ɛda adi sɛ ɛkame ayɛ sɛ saa aboa yi gyina hɔ ma aman a ɛwɔ asase so nyinaa amammui ahyehyɛde—Amanaman Nkabom no. Awiei a wɔahyɛ ho nkɔm no bɛba abeyi amammui nniso a emu apaapae a enye a edi adesamma so no afi hɔ. Na ɔhemmaa guamanfo a ɔte aboa no so no nso ɛ?

Onyankopɔn bɔfo kyerɛkyerɛ mu sɛ: “Na mmɛn du a wuhui no, ne aboa no, wɔn na wɔbɛtan aguaman no, na wɔayɛ no pasaa, na wada adagyaw, na wɔadi ne nam, na wɔde ogya ahyew no. Na Onyankopɔn na ɔde ahyɛ wɔn komam sɛ wɔmma ne tirim asɛm mmra mu, na wɔnyɛ adwenkoro, na wɔmfa wɔn ahenni mma aboa no nkosi sɛ Onyankopɔn nsɛm no bɛba mu.”—Adiyisɛm 17:16, 17.

Enti nkɔmhyɛ no kyerɛ sɛ bere tiaa bi ansa na amammui aboa no bɛkɔ ɔsɛe mu no, ebefi ase atan nea ɔte ne so no na watow ahyɛ no so. Dɛn ntia? Ɛda adi sɛ atumfoɔ ne nniso ahorow no bɛte nka sɛ nyamesom a wɔahyehyɛ a ɛwɔ wɔn nsase so no bɛyɛ asiane ama wɔn tumidi ne ahoɔden. Mpofirim ara, bere a tumi bi kanyan wɔn no, wɔbɛma Onyankopɔn “tirim asɛm,” n’atirimpɔw, aba mu, denam wiase atoro som ahemman a abɔ aguaman a mogya ama ne ho agu fi no a ɛbɛsɛe wɔn no so.a—Fa toto Yeremia 7:8-11, 34 ho.

Saa wiase atoro som yi bɛba awiei bere a ɛte sɛ nea wɔda so ara agye ntini na wɔwɔ nkɛntɛnso no. Yiw, nkɔmhyɛ no da no adi sɛ aka kakraa bi ma wɔasɛe aguaman no, ɔbɛkɔ so aka wɔ ne komam sɛ: “Mete hɔ sɛ ɔhemmaa, na menyɛ okunafo, na merenni awerɛhow da.” (Adiyisɛm 18:7) Nanso, ne sɛe bɛma emufo ɔpepepem pii ho adwiriw wɔn. Ɛbɛyɛ asiane a wɔnhwɛ kwan koraa wɔ adesamma abakɔsɛm mu no mu biako.

Efi bere a wɔkyekyeree tete Babilon no, atoro som anya adesamma so nkɛntɛnso kɛse denam wɔn akannifo ne wɔn akyitaafo; wɔn nkyerɛkyerɛ, amanne, ne nneyeɛ ahorow so; wɔn asɔredan akɛse bebree a wɔsom wom no; ne wɔn ahonyade a ɛyɛ nwonwa no. Akyinnye biara nni ho sɛ obiara behu wɔn awiei. Enti ɔbɔfo a wɔde aguaman no atemmusɛm ahyɛ ne nsa no kasa penpen bere a ɔka sɛ: “Eyi nti na ne haw bɛba da koro pɛ, owu ne awerɛhow ne ɔkɔm, na wɔde gya bɛhyew no, efisɛ Awurade Nyankopɔn a obu no atɛn no yɛ ɔhoɔdenfo.” Enti Babilon Kɛse no awiei bɛyɛ sɛ anyinam, na ebetwam ntɛmso, te sɛ “da koro.”—Adiyisɛm 18:8; Yesaia 47:8, 9, 11.

Ɔbɔfo no nsɛm a emu yɛ den no ma asɛmmisa yi sɔre, So ɔsom bi bɛka koraa, na sɛ ɛte saa a, nea ɛwɔ he, na dɛn ntia? Dɛn na nkɔmhyɛ no da no adi? Yebesusuw eyi ho wɔ asɛm a edi hɔ no mu.

[Ase hɔ asɛm]

[Kratafa 6 mfonini]

Mogya Ho Fɔ a Kristoman Adi Wɔ Afrika

Wɔ Adiyisɛm 18:24 no, Bible ka sɛ wohu “wɔn a wɔakum wɔn wɔ asase so no nyinaa mogya” wɔ Babilon kɛse no nsam. Susuw akodi ahorow a akɔ so esiane ɔsom mu akameakame ne esiane sɛ nyamesom mu akannifo antumi ansiw ano nti. Nnansa yi ara, eyi ho nhwɛso daa adi wɔ Rwanda okunkɛse a wokumkum nnipa bɛyɛ 500,000—a emu nkyem abiɛsa yɛ mmofra no mu.

Canadani sɛnkyerɛwfo Hugh McCullum bɔ amanneɛ fi Rwanda sɛ: “Hutu sɔfo bi a ɔwɔ Kigali [Rwanda] ka sɛ abrabɔ fam akwankyerɛ a asɔre no antumi amfa ama no, yɛ nea wontumi nkyerɛkyerɛ mu. Ɛsɛ sɛ anka asɔfo mpanyin gyinabea a wɔwɔ wɔ Rwandafo mu no so ba mfaso kɛse. Ná wofi bere tenten nim asiane a ɛreba no ansa na nnipakum no refi ase. Ná anka wobetumi afa asɛnka agua so ama ɔman mũ no nyinaa ate nsɛm a emu yɛ den a anka ebesiw okunkɛse no ano. Nanso akannifo no kaa wɔn ano toom.”

Bere a okunkɛse a ɛsen biara no baa awiei wɔ 1994 mu no, Justin Hakizimana a ɔyɛ asɔre panyin no kae wɔ nhyiam ketewaa bi a wɔyɛɛ wɔ Presby asɔre bi mu wɔ Kigali no ase sɛ: “Asɔre no ne Habyarimana [Rwanda ɔmampanyin] amammui nyaa abusuabɔ. Esiane sɛ na yɛnnka nokware nti, yɛankasa antia nea na ɛrekɔ so no. Yɛn asɔre horow no mu biara, titiriw Katolekfo, ankasa antia nnipakum no.”

Okunkɛse no akyi no, Aaron Mugemera a ɔyɛ ɔsɔfo no kae wɔ nhyiam foforo bi ase wɔ Rwanda sɛ: “Asɔre no ani awu. . . . Wɔakunkum nnipa wɔ ha fi 1959 mu. Obiara ankasa antia. . . . Yɛantumi anka ho asɛm, esiane sɛ na yesuro na yɛn ho tɔ yɛn nti.”

[Kratafa 7 mfonini]

Saa “aguaman” yi wɔ wiase nyinaa so nkɛntɛnso

[Asɛm Fibea]

Globe: Mountain High Maps® Copyright © 1995 Digital Wisdom, Inc.