Sɛn Na Ɛlɛtrɔnik Mfiri Betumi Asɛe Wo Ne Wo Nnamfo Ntam?

Nanso ebinom wɔ hɔ a, ɛlɛtrɔnik mfiri nko ara na wɔfa so ne wɔn nnamfo di nkitaho. Wɔn a wɔte saa no, nea ɛtaa ba ne sɛ, ɛyɛ a . . .

• ɛyɛ den sɛ wobenya tema ama wɔn nnamfo.

• wɔte nka sɛ wɔayɛ ankonam, na wɔn ani nnye.

• wodwen wɔn ho sen afoforo.

NEA ƐSƐ SƐ WUHU

TEMA

Sɛ obi wɔ tema a, ɛkyerɛ sɛ odwen afoforo ho, na ɔwɔ wɔn ho adagyew. Nanso sɛ ɛkɔba sɛ, da biara w’ani abere rekenkan text message anaa worehwɛ nneɛma wɔ sohyial media so a, ɛbɛyɛ den sɛ wubenya nkurɔfo ho adagyew na kampɛsɛ woanya tema ama wɔn.

Sɛ ɛlɛtrɔnik mfiri de wo yɛ akoa, na sɛ da biara wowɔ intanɛt so a, ebedu baabi no, message bebrebe a wunya no, ɛbɛyɛ den sɛ wubenya bere akenkan ne nyinaa. Nea wobɛyɛ ara ne sɛ, wode w’ani bɛfa mu kɛkɛ. Enti sɛ w’adamfo bi hia mmoa mpo a, ebia ɛbɛyɛ den sɛ wubehu, na woaboa no.

SUSUW WEI HO HWƐ: Sɛ wo ne wo nnamfo rebɔ nkɔmmɔ wɔ fon anaa intanɛt so a, wobɛyɛ dɛn akyerɛ sɛ wowɔ “tema” ma wɔn, na wudwen wɔn ho?​—1 PETRO 3:8.

ANKONAMYƐ

Nhwehwɛmu bi a wɔyɛe kyerɛ sɛ, wɔn a wɔde bere pii kyinkyin sohyial media so no, wɔn mu pii wɔ hɔ a wobewie no, na wɔayɛ basaa. Wɔn a wɔyɛɛ nhwehwɛmu no hyɛɛ no nsow sɛ, sɛ obi gye bere kokyinkyin sohyial media so hwɛ mfoni a nkurɔfo de agu hɔ no a, etumi ma ɔte nka sɛ, “wasɛe bere anaa wamfa ne bere anyɛ biribiara a mfaso wɔ so.”

Ebinom nso wɔ hɔ a, sɛ wɔhwɛ mfoni a nkurɔfo de agu sohyial media so, na wɔde toto wɔn asetena ho a, na wɔayɛ mmɔbɔ. Ade yi, wokɔ sohyial media so a, nneɛma a ɛkɔ yiye wɔ nkurɔfo asetena mu no, ɛho mfoni na wɔtaa de gu hɔ. Enti anhwɛ yiye a, wubenya adwene sɛ asi wɔn yiye, na wo de, woammɛbɔ bra.

SUSUW WEI HO HWƐ: Sɛ wokɔ sohyial media so a, dɛn na wubetumi ayɛ na woamfa wo ho antoto afoforo ho?​—GALATIFO 6:4.

PƐSƐMENKOMINYA

Ɔkyerɛkyerɛfo bi kaa sɛ, ɔde n’ani ato fam ahu sɛ, wɔn a ɔkyerɛ wɔn ade no bi wɔ hɔ a, sɛ wɔrepɛ adamfo a, ɛyɛ a wɔpɛ wɔn a wobetumi aboa wɔn nko ara. Sɛ obi te saa a, nea obenya afi ne nnamfo hɔ nko ara na ehia no. Enti sɛ biribi hia no a, ɛnna ɔkɔ ne nnamfo nkyɛn, nanso sɛ hwee nhia no a, ɔnhwehwɛ wɔn akyiri akwan.

SUSUW WEI HO HWƐ: Bisa wo ho sɛ, ‘Nneɛma a mede gu sohyial media so no, ɛkyerɛ sɛ mibu me ho sen afoforo anaa mepɛ sɛ afoforo adwene ba me so?’​—GALATIFO 5:26.

NEA WUBETUMI AYƐ

HWƐ SƐNEA WODE ƐLƐTRƆNIK MFIRI YƐ ADWUMA NO YIYE

Sɛ wode ɛlɛtrɔnik mfiri yɛ adwuma yiye, na woamma amfa wo anyɛ akoa a, ɛbɛma woatumi ne wo nnamfo adi nkitaho, na ɛbɛma woabɛn wɔn paa.

Nea edidi so yi mu nea ɛwɔ he na wopɛ sɛ wosɔ hwɛ? Sɛ biribi foforo nso wɔ hɔ a wohwɛ a ɛbɛboa wo a, wubetumi akyerɛw wɔ ase hɔ.

• Mɛtaa akɔ me nnamfo nkyɛn ne wɔn akɔbɔ nkɔmmɔ (sen sɛ mɛfa text message anaa email nko ara so ne wɔn adi nkitaho)

• Sɛ me ne nkurɔfo rebɔ nkɔmmɔ a, mede me fon bɛto baabi anaa mede bɛto silence

• Bere dodow a mede kyinkyin sohyial media so no, mɛtew so

• Sɛ obi ne me rekasa a, mɛyɛ aso atie no

• Mɛfrɛ m’adamfo bi a nneɛma nkɔ yiye mma no