NNEƐMA BO REYƐ DEN—DƐN NA WUBETUMI AYƐ?

Toto Wo Sikasɛm Yiye

Sɛ nneɛma bo kɔ soro a, ɛma abrabɔ mu yɛ den ma yɛn nyinaa. Nanso anidaso wɔ hɔ. Wubetumi ayɛ nneɛma bi de adi ho dwuma.

NEA ENTI A ƐHO HIA

Sɛ woammɔ mmɔden antoto wo sikasɛm yiye a, ebetumi ama wo sikasɛm ayɛ basaa. Ɛba saa a, ebetumi akɔfa adwinnwen ne kɔdaanna abɛto wo so. Sɛ wo sikasɛm wɔ fam mpo a, wubetumi ayɛ nneɛma ahorow bi a ɛbɛboa wo ama woatoto wo sikasɛm yiye.

NEA WUBETUMI AYƐ

Nni mmoro nea wunya. Ɛba saa a, ɛremma wo ho nkyere wo, na sɛ asɛm bi si mpofirim nso a, wubenya nea wode bedi ho dwuma.

Nea ɛbɛboa na woanni ammoro nea wunya no, taa hwɛ sika a wunya no bosome biara na sẽsẽ hwɛ nea wubetumi atɔ ne nea worentumi ntɔ, na kyerɛw to hɔ. Afei, hwɛ nneɛma a ɛho hia a sɛ woantɔ a, ɛrenyɛ yiye no. Nea ɛnka wo nhyehyɛe ho sɛ wobɛtɔ no, bɔ mmɔden ara sɛ worentɔ. Mmom sɛ w’akatua anaa nneɛma bo sesa a, wubetumi asesa nhyehyɛe a woayɛ no mu. Sɛ woyɛ ɔwarefo nso deɛ a, woreyɛ sikasɛm ho ntotoe a, ma wo kunu anaa wo yere mmra mu bi.

Sɔ wei hwɛ: Sɛ worekɔtɔ ade a, sɛ́ anka wubefiri no, sɛ wowɔ sika nko ara de a, tua ka. Ebinom ahu sɛ, sɛ wɔamfiri ade a, ɛma wɔn sikasɛm kɔ yiye, na ɛnkɔfa ɛka mmɛto wɔn so. To wo bo ase hwehwɛ wo sikasɛm ho nkrataa mu hwɛ sika a woayi, ne nea aka da sikakorabea. Woyɛ saa a, wubehu nea wo ho bɛsõ ne nea wo ho rensõ.

Ɛnna fam sɛ obi bɛhwɛ ne sikasɛm yiye sɛnea ɛbɛyɛ a ɔrenni mmoro nea ɔwɔ. Nanso sɛ yɛtena ase sese yɛn ho na yɛyɛ yɛn sikasɛm ho nhyehyɛe a, ɛbɛboa yɛn paa. Ɛba saa a, ɛbɛma yɛn adwinnwen so atew.

‘Sese hwɛ sɛ wowɔ nea wode bewie.’—Luka 14:28.

Yere wo ho na w’adwuma amfi wo nsa. Nneɛma bɛn na wubetumi ayɛ na w’adwuma amfi wo nsa? Emu kakra ni: Ɛyɛ a duru adwuma mu ntɛm. Adwuma a woyɛ biara, ma w’ani nnye ho. Mma w’ani nnhaw adwuma, na sɛ obi hia mmoa nso a, yɛ no mmoa. Bu ade. Di adwumam mmara so, na bɔ mmɔden hu adwuma no ani so yiye.

Nsɛe sika. Bisa wo ho sɛ, ‘Nneɛma bi wɔ hɔ a meyɛ a ɛma mesɛe sika anaa?’ Sika ho a ayɛ den nyinaa akyi no, ebinom nya sika a, wɔsɛe no wɔ nnubɔne, nsa, ne sigaret ho. Ebi nso de kogu kyakya so. Suban wei nyinaa tumi ka wɔn apɔwmuden na etumi mpo ma wɔn adwuma fi wɔn nsa.

“Anigye ne onipa a ohu nyansa, ne onipa a onya nhumu.”—Mmebusɛm 3:13, 14.

Daakye asɛm nti wudi bi a, fa bi sie. Wubetumi asie sika kakra na sɛ asɛm ba a, wode atwitwa wo ho. Sɛ wo anaa wo busuani bi yare mpofirim, w’adwuma fi wo nsa, anaa biribi foforo a wonhwɛ kwan bɛbom a, saa sika no betumi aboa wo.

“Asiane to wɔn nyinaa bere a wɔnhwɛ kwan.”—Ɔsɛnkafo 9:11.

Nea Ɛbɛboa Wo Ma Woatumi Asie Sika

Ɛyɛ a taa noa aduan wɔ fie.

Sɛ wotaa totɔ abɔnten aduan a, wobɔ ka. Ɛwom, sɛ wonoa aduan wɔ fie a, egye bere, na adwuma nso wɔ ho, nanso ɛremma wonsɛe sika pii. Afei nso esiane sɛ wo ara na woyɛ w’aduan nti, wubedi nnuan a ahoɔden wom.

Ntɔ nneɛma aboɔden.

Sɛ worekodi gua abɛyɛ aduan a, ɛyɛ a kyerɛkyerɛw nea worekɔtotɔ no, na bɔ mmɔden totɔ nea woakyerɛkyerɛw no nko ara. Sɛ sika no bi ka, na w’ani kɔbɔ biribi a wonkyerɛwee so a, hyɛ wo ho so na woantɔ.
Nneɛma bi wɔ hɔ a, sɛ wotɔ no dodow a ɛyɛ fow, enti sɛ wo ho bɛso a, tɔ no pii. Hwɛ hu sɛ wubenya baabi papa de nnuan a ɛsɛe no agu, na ansɛe.
Sɛ worekɔtɔ adeɛ a, ɛyɛ a tɔ nea ɛyɛ papa, nanso ne bo nyɛ den pii.
Nneɛma bi wɔ hɔ a, sɛ wubenya no yiye a, gye sɛ wokɔ wɛbsaet anaa app a wɔtontɔn ade wɔ so no bi so. Ɛno nso remma wontɔ biribi a wonyɛɛ w’adwene sɛ wobɛtɔ. Baabi a wote no, sɛ biribi saa wɔ hɔ a, wubetumi asɔ ahwɛ.
Edu mmere bi a, wɔtumi tetew nneɛma so, enti sɛ yɛtɔ nneɛma saa bere no a, ɛbɛboa paa. Sɛ yɛwɔ kupɔn anaa kaad a yɛde tɔ ade nso a, yebetumi de atotɔ nneɛma. Nsu ne kanea, ne nneɛma foforo bi wɔ hɔ a, sɛ wotɔ no wɔ baabi a, wubenya no yiye asen baabi foforo.

Sɛ wowɔ biribi na sɛ foforo ba so a, mpere wo ho nkɔtɔ foforo no.

Wɔn a wɔyɛ fon ne nneɛma afoforo no, nea esi wɔn ani so ara ne sɛ wɔbenya mfaso, enti da biara wɔde foforo ba. Enti sɛ wowɔ biribi, na woredwen ho sɛ wobɛtɔ nea ɛkɔ anim kyɛn ɛno a, bisa wo ho sɛ: ‘Sɛ metɔ nea aba so foforo no a, ɛbɛboa me anaa? Nea mewɔ no ayɛ dedaw saa? Na sɛ ɛho hia mpo sɛ menya nea ɛkɔ anim kyɛn ɛno a, ehia sɛ metɔ nea aba so foforo paa no anaa?’

Sɛ biribi sɛe na wubetumi ayɛ no yiye a, nto nkyene; yɛ no yiye.

Sɛ wowɔ nneɛma bi te sɛ TV ne frigye a, hwɛ so yiye na akyɛ ama wo. Afei nso sɛ biribi sɛe wɔ ho na sɛ ɛho ka no mmoro so a, siesie. Nneɛma a ɛnyɛ mono pii a nkurɔfo retɔn nso, sɛ wotɔ bi a, ɛremma wonsɛe sika.

Pɛ baabi kakra duadua nnuan wɔ hɔ.

Wubetumi apɛ baabi kakra a wubeduadua nnuan wɔ hɔ anaa? Woyɛ saa a, ɛbɛma nneɛma a wototɔ wɔ guam no so atew, na nneɛma a wubedua no mpo, wubenya bi atɔn anaa wubenya bi de akyɛ.

“Nsiyɛfo nhyehyɛe bewie yiye.”—Mmebusɛm 21:5.

“Nneɛma a yehia a yɛtaa totɔ no, da biara yɛhwɛ sɛnea ne bo rekɔ. Ɛnyɛ ɛno nko ara; yɛmmfa yɛn credit card nntotɔ nneɛma basabasa.”—Miles a ɔwɔ England.

“Da biara, ansa na yɛbɛkɔ akodi gua no, me ne m’abusua di kan kyerɛkyerɛw nneɛma a yebehia.”—Jeremy a ɔwɔ U.S.A.

“Bagyɛt a abusua no ayɛ no, sɛ nneɛma sesa a, na yɛn nso yɛasesa mu.”—Yael a ɔwɔ Israel.

“Yɛakyerɛ yɛn mma no ama wɔahu sɛ, sɛ nneɛma sɛe wɔ fie a, sɛ anka wɔbɛtɔ foforo no, wɔbetumi asiesie. Saa nneɛma no bi ne yɛn kar ne fie nneɛma. Me ne me yere nso, yɛntotɔ nneɛma a aba so foforo.”—Jeffrey a ɔwɔ U.S.A.

“Maduadua nneɛma kakra, na mesan yɛn nkokɔ nso. Ɛno ama mensɛe sika pii. Nneɛma a maduadua no, mitumi ma afoforo mpo bi.”—Hono a ɔwɔ Myanmar.