Sɛnea Yehowa Adansefo Bu Nhomasua

SƐNEA asɛm a wɔafa aka a efi The World Book Encyclopedia mu yi kyerɛ no, sukuu atirimpɔw titiriw biako ne sɛ ɛbɛtete mmofra ama da biara da asetra, a nea ɛka eyi ho ne boa a ɛbɛboa wɔn ma wɔadi wɔn abusua ahiade ho dwuma da bi. Yehowa Adansefo gye di sɛ eyi yɛ ɔsom mu asɛyɛde. Bible no ankasa ka sɛ: “Na sɛ obi nhwɛ n’ankasa ne nnipa ne, ne titiriw no, ne fifo a, wapa gyidi, na ɔyɛ onipa bɔne sen nea onnye nni.” (1 Timoteo 5:8) Mfe a mmofra di wɔ sukuu no siesie wɔn ma asɛyɛde a wobeso mu wɔ asetra mu. Ne saa nti, Adansefo te nka sɛ ɛsɛ sɛ wobu nhomasua aniberesɛm kɛse.

Adansefo bɔ mmɔden sɛ wɔbɛtra ase ma ɛne Bible ahyɛde yi ahyia: “Biribiara a woyɛ no, fa wo koma nyinaa yɛ, sɛnea woreyɛ ama Awurade na ɛnyɛ nnipa.” (Kolosefo 3:23, Today’s English Version) Saa nnyinasosɛm yi fa asetram biribiara ho, a sukuu nso ka ho. Enti Adansefo hyɛ wɔn mmofra nkuran sɛ wɔnyere wɔn ho na wɔmfa dwumadi ahorow a wɔde ma wɔn wɔ sukuu no aniberesɛm.

Bible no kyerɛ nso sɛ ɛsɛ sɛ obi brɛ ne ho ase hyɛ ɔman a ɔte mu no mmara horow ase. Enti sɛ ɛyɛ mmara sɛ ɛsɛ sɛ obi de mfe dodow bi kɔ sukuu a, Yehowa Adansefo di saa mmara yi so.—Romafo 13:1-7.

Ɛwom sɛ Bible no mmu ntetee a wɔde ma wɔ da biara da asetra ho no adewa de, nanso ɛkyerɛ sɛ ɛnyɛ ɛno titiriw ne nhomasua atirimpɔw anaa nea ɛwɔ hɔ ara ne no. Afei nso ɛsɛ sɛ nhomasua a ɛfata ma mmofra nya asetra mu anigye na ɛboa wɔn ma wɔbɛyɛ ɔmanfo a wɔkari pɛ. Enti, Yehowa Adansefo te nka sɛ nneɛma a ɛnka sukuu adesua ho a wɔpaw no yɛ asɛnhia kɛse. Wogye di sɛ ahomegye, nnwom, ne nneɛma a wɔyɛ de gye ani a ɛfata, apɔw-mu-teɛteɛ, nhomakorabea ne tete nneɛma akorae ahorow a wɔkɔhwɛ hɔ, ne nea ɛkeka ho, ho hia kɛse wɔ nhomasua a ɛkari pɛ mu. Nea ɛka ho no, wɔkyerɛkyerɛ wɔn mma sɛ wɔnkyerɛ obu mma mpanyimfo, nhwehwɛ hokwan mfa nyɛ wɔn mmoa.

Nhomasua Ntoaso Nso Ɛ?

Esiane mfiridwuma mu nneɛma foforo nti, adwumayɛ hokwan kɔ so sakra. Ɛno nti, ɛho behia sɛ mmofra pii yɛ nnwuma bi a wɔnhyɛɛ da nnyaa ho ntetee. Eyi nti, esu a wɔda no adi wɔ adwumayɛ ho ne wɔn ankasa ntetee, titiriw sɛnea wotumi yɛ fakaa bere a nneɛma sakra no, so bɛba wɔn mfaso kɛse mpo. Ne saa nti, ɛyɛ papa sɛ sukuufo bɛyɛ mpanyimfo a sɛnea Nimdeɛ Foforo Mmere mu anwensɛm kyerɛwfo Montaigne kae no, wɔwɔ ‘ti a wɔasiesie no yiye, na ɛnyɛ ti a nneɛma ayɛ no ma.’

Adwuma a wonnya nyɛ a ɛrekɔ so wɔ aman a wodi yiye ne aman a ahia wɔn nyinaa mu taa ma mmofra a wonnyaa ntetee a ɛfata no ho kam. Enti, sɛ adwumayɛ hokwan no hwehwɛ sɛ wonya ntetee no bi ka nea mmara hwehwɛ no ho a, ɛyɛ awofo no asɛyɛde sɛ wɔboa wɔn mma no ma wosi nhomasua ntoaso ho gyinae, bere a wosusuw mfaso a wobenya afi adesua ntoaso no mu ne nneɛma a ɛbɛhwehwɛ sɛ wɔde bɔ afɔre ho no.

Nanso, ebia wubegye atom sɛ asetra mu nkɔso hwehwɛ pii sen honam fam yiyedi ara kwa. Nnansa yi, mmarima ne mmea a wɔde wɔn asetra nyinaa hyɛɛ wɔn adesua mu denneennen hweree biribiara, bere a wɔn nnwuma fii wɔn nsa no. Awofo binom de wɔn abusua asetra ne bere a anka wobetumi anya ama wɔn mma abɔ afɔre, ma wɔahwere hokwan a anka wobenya de atete wɔn no esiane sɛ wɔde wɔn ho hyɛɛ adwuma mu fee nti.

Ɛda adi pefee sɛ, ɛsɛ sɛ nhomasua a ɛkari pɛ ma yehu sɛ yehia pii sen honam fam yiyedi na ama yɛn ani agye ankasa. Yesu Kristo kae sɛ: “Wɔakyerɛw sɛ: Ɛnyɛ abodoo nko so na onipa nam bɛtra ase, na asɛm biara a efi Onyankopɔn anom so.” (Mateo 4:4) Sɛ́ Kristofo no, Yehowa Adansefo hu hia a ɛho hia sɛ wonya abrabɔ ne honhom fam su horow, na wosiesie wɔn ho sɛ wobedi wɔn honam fam ahiade ahorow nso ho dwuma.