Nkɔmmɔbɔ Kwan So

NKURƆFO ntaa nnwen nsɛm a wɔbɛka ho pii bere a wɔne wɔn nnamfo redi nkɔmmɔ no. Nsɛm a wɔka no ankasa na ɛba. Nnipa binom kasa anigye so; na afoforo hwɛ wɔn kasa yiye. Nanso obi nne ankasa a ɔde bɛkasa saa kwan no so no yɛ dɛ.

Nanso sɛ worehyia ɔhɔho bi a, ɛmfata sɛ wo ne no bɛkasa te sɛ nea wo ne obi a wunim no dedaw kasa. Nokwarem no, wɔ aman bi so no, wɔwɔ ɔkwan pɔtee a wɔfa so ne ahɔho fi nkɔmmɔbɔ ase. Bere a wɔada obu a ɛfata adi awie no, afei ebetumi ayɛ papa sɛ wɔde nhumu di dwuma ne no kasa wɔ ɔkwan a ɛnyɛ katee pii na ɛda nkɔmmɔbɔ su adi so.

Sɛ wokasa fi asɛnka agua so a, ɛsɛ sɛ wode ahwɛyiye di dwuma nso. Sɛ wode wo kasa di agoru pii a, ɛma nidi a ɛfata Kristofo nhyiam no ne aniberesɛm a asɛm a woka no yɛ no yera. Wɔ kasa ahorow bi mu no, wɔhwɛ kwan sɛ wɔde nsɛm bi bedi dwuma bere a obi ne obi a wanyin, ɔkyerɛkyerɛfo, aban panyin, anaa ɔwofo bi kasa no. (Hyɛ nsɛm a wɔde dii dwuma wɔ Asomafo no Nnwuma 7:2 ne 13:16 no nsow.) Wɔde nsɛm afoforo di dwuma bere a obi ne n’aware mu hokafo anaa ne yɔnko paa kasa no. Bere a ɛnsɛ sɛ yɛma ɔkwan a yɛfa so kasa wɔ asɛnka agua so no yɛ katee dodo no, ɛsɛ sɛ ɛda obu adi.

Nanso nneɛma bi wɔ hɔ a ebetumi ama obi kasa ayɛ katee anaa ne tie ayɛ den. Emu biako ne sɛnea wɔhyehyɛ kasamu anaa kasasin no. Sɛ ɔkasafo bi bɔ mmɔden sɛ ɔbɛkenkan asɛm bi sɛnea wɔakyerɛw no pɛpɛɛpɛ a, ɛde ɔhaw ba. Ɛsono sɛnea wɔkyerɛw asɛm bi ne sɛnea wɔka no no koraa. Ɛyɛ nokware sɛ nsɛm a wɔatintim na yɛtaa de yɛ nhwehwɛmu. Kratasin a wɔahyehyɛ nsɛm ntiantiaa wɔ so na yɛtaa gyina so ma ɔkasa no. Nanso sɛ woka nsɛm sɛnea wɔakyerɛw wɔ kratasin a wɔhwɛ so ma ɔkasa no so bere a woma ɔkasa no a, ɛda adi sɛ wo kasa no renyɛ te sɛ nkɔmmɔbɔ. Nea ɛbɛma woatumi akasa wɔ nkɔmmɔbɔ kwan so no, fa w’ankasa wo nsɛm kasa, na kwati sɛ wubedi sɛnea wɔahyehyɛ kasamu no akyi.

Ade foforo nso ne sɛnea yɛbɛma kasa akɔ ntɛm anaa brɛoo. Kasa a ɛyɛ katee na ne tie nyɛ dɛ no taa yɛ nea wɔatetew nsɛmfua no ntam pɛpɛɛpɛ na ɛnkɔ ntɛm anaa brɛoo. Wɔ nkɔmmɔ a yɛbɔ daa mu no, yɛsakra sɛnea kasa no kɔ mu na yɛtaa home sɛnea ɛsɛ.

Ɛwom, sɛ wokasa kyerɛ nnipadɔm a, ɛsɛ sɛ woma wo nne so, na wode ɔhyew ne anigye kasa wɔ nkɔmmɔbɔ kwan so sɛnea ɛbɛyɛ a atiefo no bɛyɛ aso ama wo.

Nea ɛbɛyɛ na wode nkɔmmɔbɔ kwan a ɛfata ma asɛnka adi dwuma no, ehia sɛ wode yɛ wo su sɛ wobɛkasa yiye daa. Eyi nkyerɛ sɛ ɛsɛ sɛ woyɛ obi a wasua nhoma akɔ akyiri. Nanso eye sɛ wubesua sɛnea wɔkasa yiye na ama afoforo afa wo kasa aniberesɛm. Bere a ɛno wɔ w’adwenem no, susuw ho sɛ ebia ebehia sɛ woyɛ nsɛm a edidi so yi ho biribi wɔ wo daa nkɔmmɔbɔ mu:

1. Kwati nsɛm a ɛne kasa ho mmara nhyia anaa ɛma wobu wo fra nnipa a wɔn asetra kwan ne Nyankopɔn gyinapɛn nhyia no. Nea ɛne afotu a ɛwɔ Kolosefo 3:8 hyia no, kwati aniwusɛm anaa kasafĩ. Ɔkwan foforo so no, wubetumi de nsɛm a wɔka nanso wɔnkyerɛw adi dwuma. Nsɛm a wɔka nanso wɔnkyerɛw nni kasa ho mmara pɔtẽẽ biara de nanso wogye tom.

2. Kwati sɛ wubetĩ nsɛm ne kasasin koro no ara mu de ada adwene foforo biara a ebia wobɛka adi. Sua sɛ wode nsɛmfua a ɛkyerɛkyerɛ wo nsɛm mu yiye bedi dwuma.

3. Kwati sɛ wobɛsan w’akyi aka nsɛm a woaka awie denam hu a wubehu nsɛm a woabɔ wo tirim sɛ wobɛka no yiye so; ansa na woafi ase akasa.

4. Kwati sɛ wobɛka nsɛm pii de akata nsɛm bi a etu mpɔn so. Fa yɛ wo su sɛ wode nsɛm ntiantiaa bɛka nsɛm a wopɛ sɛ wɔkae no yiye.

5. Kasa wɔ ɔkwan a ɛkyerɛ obu ma afoforo so.