ADESUA 4

Worebɛkenkan Kyerɛwsɛm a, Kanyan Ho Anigye

Mateo 22:41-45

NSƐNTITIRIW: Di kan siesie w’atiefo adwene ansa na woakenkan kyerɛwsɛm bi.

Hu nea enti a worekenkan kyerɛwsɛm no. Ansa na wobɛkenkan kyerɛwsɛm biara no, ka biribi ma w’atiefo no adwene nkɔ asɛntitiriw a wopɛ sɛ wusi so dua no so.

Kyerɛwsɛm a wobɛkenkan no, ɛsɛ sɛ wuhu nea enti a wɔkyerɛw saa asɛm no ne nsɛm foforo a ɛfa ho. Sɛ wopɛ sɛ wokyerɛ onipa a ɔkyerɛw Bible mu nhoma bi anaa obi a ɔkaa asɛm bi wɔ Kyerɛwnsɛm no mu a, yɛ nhwehwɛmu hu onii pɔtee no.
Ma atiefo no nhu sɛ Bible no yɛ Onyankopɔn Asɛm. Sɛ worekasa akyerɛ nnipa a wogye Onyankopɔn di a, twe adwene si Bible no so sɛ ɛyɛ Onyankopɔn Asɛm. Wei bɛma ada adi sɛ ɛno mu na yebenya afotusɛm a eye sen biara.
Kanyan atiefo no anigye wɔ kyerɛwsɛm a worebɛkenkan no ho. Bisa asɛm bi a kyerɛwsɛm no bɛma ho mmuae, ka ɔhaw bi a kyerɛwsɛm no bɛboa ma moadi ho dwuma, anaa ka nnyinasosɛm bi a kyerɛwsɛm no bɛma moate ase.

Asɛm a worebɛka ne kyerɛwsɛm a worebɛkenkan no, dwen ho na hu nea w’atiefo nim wɔ ho dedaw. Kyerɛwsɛm a w’atiefo nim no yiye mpo, sɛ worebɛkenkan a kanyan ho anigye, na aboa wɔn ma wɔate ase wɔ ɔkwan bi so a wonnwen ho da.