Nyamesom ne Nasi Nniso

“Ná Hitler . . . wɔ Katolekni bi a ɔyɛ ne mampanyin abadiakyiri, na fi da a edi kan pɛɛ a wɔde nniso no sii hɔ no. Franz von Papen dan ɔkyerɛma a na ɔbɛtwetwe Katolek akuw horow ma wɔagyina Reich foforo no akyi. Wɔtee wɔ Reich no baabiara sɛ na von Papen retu anokwafo fo sɛ wɔnyɛ osetie mma Adolf Hitler wɔ biribiara mu.”

Wɔ 1933 mfiase pɛɛ no, Germany Katolekfo adeyɛ ne nsusuwii ahyehyɛde a na [Franz] von Papen tua ano saa bere no hyɛɛ da de amanneɛbɔ a edi so yi mae sɛ: ‘Yɛn Katolekfo a yɛyɛ Germanfo de yɛn kra ne yɛn gyidi ahorow nyinaa begyina Adolf Hitler ne n’Aban no akyi. Ɔdɔ a ɔwɔ ma ɔman no, n’ahoɔden ne ne nyansa a ɔwɔ sɛ ɔmanyɛfo no yɛ yɛn nwonwa . . . Ɛsɛ sɛ . . . Germany Katolek Asɔre no de nnamyɛ nya Third Reich no kyekye mu kyɛfa.’”

Franz von Papen titiriw na ɔmaa Nasi aban a ɔsomee wɔ Germany ne Vatican wɔ Rome no yɛɛ apam. Wɔde wɔn nsa hyɛɛ apam no ase July 20, 1933. Amanneɛbɔ titiriw bi kae sɛ: “Ɔsɔfo Panyin ne Ɔman Kyerɛwfo Pacelli [akyiri yi Paapa Pius XII] de abasobɔde Grand Cross of the Order of Pius maa Ɔmampanyin Abadiakyiri von Papen nnɛ . . . Ɔmampanyin Abadiakyiri von Papen de Maria honi a wɔde White Meissen Porcelain ayɛ maa Ɔsɔfo Panyin ne Ɔman Kyerɛwfo no sɛ akyɛde a Reich Aban no de ma. . . . Na wɔakyerɛw akyɛde no nyinaa so sɛ: ‘1933 Reich Apam no nkaede.’”​—Nsɛm a wɔafa aka no nyinaa yɛ nea woyi fii Franz von Papen​—His Life and Times a H. W. Blood-Ryan kyerɛwee no mu.