Bɔhyɛ Asase No So Mmeae Ahorow

Genesaret​—‘Ɛhɔ Yɛ Nwonwa Na Ɛyɛ Fɛ’

“Asase bi da Ɔtare Genesaret ho a ekura din koro no ara, na ɛso nneɛma ne ne fɛ yɛ nwonwa yiye. Esiane asase pa a ɛwɔ hɔ nti, afifide biara yɛ yiye wɔ hɔ, na ɛhɔfo dua biribiara: mframa no anohyew yɛ hɔ ne hɔ ma enti afifide ne mmoa a wogu ahorow tumi tra hɔ. . . . Ɛnyɛ sɛ wonya nnuaba a egu ahorow ma ɛyɛ nwonwa wɔ hɔ nko; ɛsow bere biara mu nso. . . . Asuten bi a etumi yɛ asase yiye gugu so nsu.”

Saa kwan yi so na abakɔsɛm kyerɛwfo Josephus kaa asasetaw ahinasa bi a ɛda nea nnipa pii frɛ no Galilea Po no ano wɔ apuei fam atɔe no ho asɛm. Atifi hɔ mfonini ahorow no betumi ama woanya sɛnea na saa asasetaw yi ma nnɔbae no ho adwene bi, nsase a ɛbɔ nnuan sen biara wɔ Galilea no mu biako.a Na saa beae yi ho hia wɔ tete mmere mu araa ma asɛmpa kyerɛwfo Luka frɛɛ nsu a nkyene nnim a ɛda ne nkyɛnmu no sɛ “Genesaret tare.”​—Luka 5:1.

Ɔde saa din no dii dwuma bere a na ɔreka sɛnea Yesu baa saa mpɔtam hɔ ma obehuu mmarima baanan a wɔbɛyɛɛ asomafo ho asɛm no. So na wɔyɛ akuafo a wɔyɛ asasebere no so adwuma, dua bobe, apopo, ngodua, anaa borɔdɔma? Dabi. Na nnɔbae yi wɔ Genesaret Asasetaw no so pii, nanso na mmarima yi yɛ apofofo, na nea nti a na ɛte saa no asete nyɛ den.

Ebia na nsuten a ɛnam asasetaw no so no de afifide a ebetumi ayɛ aduan pii ama mpataa no kogu po no mu. Enti na mpataa a wogu ahorow ayɛ asu no mu ma, na ɛmaa mpataayi dwumadi a ɛso ara yiye kɔɔ so wɔ hɔ. Na Petro ne Andrea yɛ apofofo wɔ hɔ, te sɛ Yakobo ne Yohane, a wɔyɛ ɔpofoni Sebedeo mma no ara pɛ.​—Mateo 4:18-22; Luka 5:2-11.

Mpɛn pii no, na woyi mpataa denam asawu a wofi ahyɛmma mu trɛw mu gu nsu no mu so. Ɛne nea na Petro ne Andrea reyɛ bere a Yesu baa wɔn nkyɛn no. Wɔtrɛw asawu tenten bi mu de twa puruw fã. Nnua a ɛtentɛn nsu no ani so asawu no mu wɔ atifi, na nneɛma a emu yɛ duru a ɛwɔ ase hɔ no twe kɔ nsu no ase. Asawu a ɛte sɛɛ no tumi yi mpataa pii. Afei wɔtwe kɔ ahyɛmma no mu anaa nsu no fã baabi a emu nnɔ pii, koyi mu nam gu nsu no ano. Woyiyi mpataa a wobetumi adi no fi nea ennye no mu. Hyɛ sɛnea wɔakyerɛkyerɛ eyi mu pɛpɛɛpɛ wɔ Luka 5:4-7 ne Yohane 21:6-11 no nsow. Wokae sɛ Yesu kaa saa kwan a wɔfa so yi mpatae yi ho asɛm wɔ ne mfatoho a ɛfa asawu ho no mu? (Mateo 13:47, 48) Bio nso, Mateo 4:21 kyerɛkyerɛ mu sɛ mpɛn pii no na ɛsɛ sɛ apofofo no gye bere tuatua wɔn asawu a abo anaa mpataa no tetew no no mu.

Sɛ wonam Genesaret po yi ano a, ebia wubehu mmeae kakraa bi a wɔka sɛ Yesu som adwuma mu nsɛm bi sisii wɔ hɔ no. Biako yɛ bepɔw a ahabammono wɔ so bi a sɛnea atetesɛm kyerɛ no, ɛhɔ na Yesu maa ne Bepɔw so Asɛnka no. Beae yi ne Asɛmpa ho kyerɛwtohɔ ahorow no mmɔ abira, efisɛ na Yesu bɛn Genesaret Asasetaw no bere a ɔmaa saa ɔkasa no.​—Mateo 5:1-7:29; Luka 6:17-7:1.

Beae foforo bi a wose biribi sii wɔ hɔ ampa no ne Bible mu nokwasɛm ahorow nhyia. Wubehu sɛ asɔredan bi a wose wosi sii beae a Yesu de abodoo ason ne mpataa kakraa bi maa nnipa 4,000 ma wodii no. (Mateo 15:32-38; Marko 8:1-9) Marko kyerɛwtohɔ no nka sɛ eyi sii wɔ Genesaret Asasetaw no so, na mmom ese esii wɔ “Dekapoli ahye so,” wɔ po no agya bɛboro kilomita 11 kwan no.​—Marko 7:31.

Mateo ne Marko se Yesu yɛɛ anwonwade yi wiei no, ɔde ahyɛmma kɔɔ Magadan anaa Dalmanuta. (Mateo 15:39; Marko 8:10) Nhomanimfo se saa beae yi wɔ Magdala (Migdal), a ɛwɔ Genesaret Asasetaw kesee fam de rekɔ Tiberia no. The Macmillan Bible Atlas no kyerɛ sɛ na Magdala “agye din yiye esiane ɛhɔnom mpataa asiesie adwuma no nti.” Mpataa a na woyi no pii wɔ ɔtare no fã a ɛwɔ ha yi no betumi ama dwumadi a ɛte sɛɛ ayɛ papa ne nea mfaso wɔ so ampa.

Nea ɛyɛ anigye no, ɔpɛ bi a esii wɔ 1985/86 mu no maa Galilea Po no mu nsu twee, na ɛmaa wohuu ɔtare no mmeae bi ase. Mmarima baanu bi kohuu tete ahyɛmma bi a asɛe wɔ beae bi a ɛbɛn Genesaret Asasetaw no. Wɔn a wotutu fam hwehwɛ tetefo nneɛma tumi koyii dua ahyɛmma a wɔde yi mpataa a wɔyɛe bɛyɛ bere a Yesu kɔɔ Genesaret Ɔtare ne Asasetaw no ho no.

[Ase hɔ asɛm]

[Mfonini Fibea wɔ kratafa 24]

Pictorial Archive (Near Eastern History) Est.

[Mfonini Fibea wɔ kratafa 24]

Pictorial Archive (Near Eastern History) Est.

[Mfonini Fibea wɔ kratafa 25]

Garo Nalbandian

[Mfonini Fibea wɔ kratafa 25]

Pictorial Archive (Near Eastern History) Est.