“Nnipa pii a woyɛɛ wɔn nkwa ho adwuma no mu biako pɛ”
WƆ JANUARY 1996 mu no, ade honoo Carol amemene mu. Ná ɔwɔ ne mfe 60 mu, na ebesi saa bere no na ɔyɛ ɔbea kokodurufo a ɔwɔ anigye a ɔka nkuranhyɛsɛm kyerɛ obiara bere nyinaa. Nanso afei de na nnuruyɛfo no rebɔ mmɔden sɛ wɔbɛsa yare a ɛyɛ hu a ɛreyɛ kɛse no. Wɔ Carol akodi mu no, ne nsa kaa krataa a edi so yi:
“Me Dɔfo Pa Carol:
“Midi yaw wɔ wo yare no ho. Anigyesɛm ne sɛ, yɛwɔ nokware anidaso a Bible boa yɛn ma yehu na yɛn ani gye ho. Saa anidaso yi ne sɛ Yehowa Ahenni bedi asase so sɛnea ɛbɛyɛ a yebetumi atra paradise tebea mu, bere a yɛn nyinaa hwɛ kwan no.
“Mepɛ sɛ wuhu sɛ asɛnka adwuma a woyɛe no agye nnipa pii afi daa owu mu. Meyɛ saa nkurɔfo yi mu biako. Mintumi nhu sɛ wokae bere a edi kan a yehyiae no anaa. Saa bere no, na madi mfe 20. Ná meyɛ ti fuwii, na metɔn nnubɔne, na na meka basabasayɛfo kuw bi ho. Ná yɛn nyinaa kurakura tuo, na na yenni ɔdɔ ma obiara gye sɛ yɛn ankasa yɛn ho.
“Wo ne Ɔdansefo foforo bɛbɔɔ me pon mu de Ɔwɛn-Aban ne Nyan! maa me. Mebɔɔ mmɔden sɛ anka mɛma wo dɔla biako, na mekae sɛ mempɛ nsɛmma nhoma no. Womaa mihui sɛ ɛnyɛ ntoboa kɛkɛ nti na monam. Woka kyerɛɛ me sɛ moreyɛ adwuma aboa nkurɔfo ma wɔakenkan Bible no. Menkae sɛ ebia migyee nsɛmma nhoma no anaa mekenkanee. Nanso wuguu nokware ho aba wɔ m’asetram.
“Mfe bi akyi no, Ɔdansefo foforo, Gary, baa me maame fie bere a na mewɔ hɔ. Mekaa sɛnea wobɛsraa me mfe bi a atwam no ho asɛm kyerɛɛ no. Gary ne me suaa Bible no bere tenten kosii sɛ wɔbɔɔ me asu wɔ 1984 mu. Seesei mede Onyankopɔn Ahenni ho nokware no rekyerɛkyerɛ me mma.
“Migye di sɛ meyɛ nnipa pii a woyɛɛ wɔn nkwa ho adwuma wɔ mfe a wode somee nokware mu no biako pɛ. Nanso, ɛdenam saa adɔe yi so no, woama me ne m’abusua abehu Onyankopɔn Kɛse no, Yehowa, ne ne Ba, Kristo Yesu. Mehwɛ da a metumi ahu wo wɔ nneɛma nhyehyɛe foforo no mu bere a Yehowa bɛpopa yɛn aniwam nusu nyinaa, na owu nni hɔ bio no kwan.—Adiyisɛm 21:4.
“Me ne m’abusua de, yɛn ani agye sɛ yenyaa hokwan huu wo na yɛreyɛ w’adansedi adwuma no bi. Meda wo ase.
“Mede me nuadɔ nkyia ma wo,
Peter”
Carol yaree akyi asram asia no, owui wɔ March 1996 mu, bere a na wagu nokware ho aba no wɔ ne mfe 35 a ɔde yɛɛ ɔsɛmpakafo a ɔyɛ nnam no mu no. Osuae sɛ obi nnim da ko a aba bi bɛsow, sɛ mpo mfe bi akyi a.—Mateo 13:23.