So Otwa Afahyɛ Ahorow Sɔ Onyankopɔn Ani?

NNUABA a ɛyɛ akɔnnɔ, atosode a ɛyɛ fɛ, ne aburow akɛse a wɔaboa ano asum hɔ tenteenten yɛ ade a ɛyɛ fɛ. Edu otwa bere a, nneɛma a wɔahyehyɛ no saa no ma asɔre dan ahorow afɔremuka ne afɔrepon so yɛ fɛ wɔ England baabiara. Sɛnea ɛte wɔ baabiara no, wɔhyɛ fa horow wɔ Europa de kae otwa bere mfiase ne n’awiei.

Wɔn a wɔhwehwɛ wɔn asetrade fi asase mu no titiriw na wɔkyerɛ asase nnɔbae ho anisɔ. Nokwarem no, Onyankopɔn ka kyerɛɛ tete Israelfo sɛ wonni afirihyia afahyɛ horow abiɛsa a na ɛfa bere a wotwa wɔn nnɔbae no ho. Fefɛw bere mfiase, wɔ Apiti Afahyɛ ase no, na Israelfo no de atoko aba a edi kan a wɔakyekyere no afiafi brɛ Onyankopɔn. Wɔ Adapɛn Nnapɔnna (anaa Pentekoste) ase wɔ fefɛw bere awiei no, na wɔde abodoo a wɔde awi aba a edi kan a wotwae ayɛ no bɔ afɔre. Anoboaboa Afahyɛ no ba so wɔ otwa bere mu, ɛno ne Israelfo kuayɛ afe no awiei. (Exodus 23:14-17) Ná afahyɛ ahorow yi yɛ “nhyia kronkron” ne ahurusidi mmere.—Leviticus 23:2; Deuteronomium 16:16.

Ɛnde, nnɛyi otwa afahyɛ ahorow no nso ɛ? So ɛsɔ Onyankopɔn ani?

Abusuabɔ a Ɛne Abosonsom Wɔ

Esiane sɛ na wiasefo nneyɛe a ɛwɔ otwa bere mu apontow ase ne asabow a na ɛbata afahyɛ no ho haw England Anglikan sɔfo a na ɔwɔ Cornwall no nti, osii gyinae 1843 sɛ ɔbɛsan de Mfinimfini Mmere mu afahyɛ amanne no asi hɔ bio. Ɔfaa awi a wodii kan twae no bi yɛɛ paanoo de yɛɛ Awurade adidi wɔ n’asɔre mu. Ɛdenam saayɛ so no, ɔde Lammas afahyɛ—“Kristofo” afahyɛ a ebinom kyerɛ sɛ efi Celticfo nyame Lugh som mu no, sii hɔ.a Enti, nnɛyi Anglikanfo otwa afahyɛ no fi abosonsom mu.

Na afahyɛ ahorow a ɛkɔ so wɔ otwa bere awiei no nso ɛ? Sɛnea Encyclopædia Britannica kyerɛ no, amammerɛ a ɛbata afahyɛ horow yi ho no dodow no ara fi “abosonsom gyidi a wɔwɔ wɔ aburow [awi] honhom anaa, aburow maame, no mu.” Wɔ mmeae bi no, na akuafo no gye di sɛ honhom bi te aburow a etwa to a wotwa no mu. Nea ɛbɛyɛ na wɔapam honhom no, wɔboro aburow no gu fam. Wɔ mmeae bi no, na wɔde aburowhono no nwene “aburow abaduaba” a wɔde sie ma “akraye,” kosi bere a wobedua aburow, afe a edi hɔ no. Afei wofuntum fra dɔte no, bere a wɔhwɛ kwan sɛ eyi de nhyira bɛbrɛ aburow foforo a wobedua no.

Anansesɛm bi de twa bere bata Babilonfo nyame Tamus, abawo nyamewa Ishtar, hokafo no ho. Awi a ahoa a wotwa no gyina hɔ ma Tamus patuwu no. Anansesɛm afoforo mpo de nnipa afɔrebɔ bata twabere ho—adeyɛ a Yehowa Nyankopɔn kyi.—Leviticus 20:2; Yeremia 7:30, 31.

Dɛn Ne Onyankopɔn Adwene?

Sɛnea Onyankopɔn ne tete Israelfo dii no ma ɛda adi pefee sɛ Yehowa, Ɔbɔadeɛ ne Nkwamafo no, hwehwɛ sɛ n’asomfo de ɔsom a edi mũ ma no. (Dwom 36:9; Nahum 1:2) Wɔ odiyifo Hesekiel bere so no, na su a wosu onyame Tamus no yɛ ‘akyide kɛse’ wɔ Yehowa ani so. Eyi ne atoro som amanne horow amma Onyankopɔn antie saa atoro asomfo no mpaebɔ.—Hesekiel 8:6, 13, 14, 18.

Fa eyi toto nea Yehowa Nyankopɔn hyɛɛ Israelfo sɛ wonni no twa bere mu no ho. Wɔ Anoboaboa Afahyɛ ase no, Israelfo no yɛɛ nhyiam kronkron a mmofra ne mpanyin, asikafo ne ahiafo, nyinaa tratraa asese a wɔde nnua a ɛyɛ fɛ nhaban akuru so mu. Ná eyi yɛ ahurusidi bere kɛse ma wɔn, nanso na ɛyɛ bere a na wɔde kae gye a Onyankopɔn gyee wɔn nananom bere a wofii Misraim no.—Leviticus 23:40-43.

Wɔ Israelfo afahyɛ horow ase no, na wɔde ayɛyɛde ma Yehowa, nokware Nyankopɔn koro no. (Deuteronomium 8:10-20) Baabiara nni hɔ a Bible no ka aba te sɛ awi afiafi, ho asɛm sɛ ɛwɔ ɔkra te sɛ abosonsom gyidi a yɛaka ho asɛm no.b Na Kyerɛwnsɛm no ma ɛda adi pefee sɛ nkwa nni ahoni mu, wontumi nkasa, nhu ade, nte asɛm, nte ade hua, nte nka, anaa wontumi mfa mmoa biara mma wɔn asomfo.—Dwom 115:5-8; Romafo 1:23-25.

Ɛnnɛ, Kristofo nni Mmara apam a Onyankopɔn ne tete Israel man no yɛe no ase. Nokwarem no, Onyankopɔn ‘yi fii kwan mu denam Yesu asɛndua ho a ɔde kɔbɔe no so.’ (Kolosefo 2:13, 14) Yehowa asomfo a wɔwɔ hɔ nnɛ no wɔ “Kristo mmara” ase, na wɔkyerɛ nea Onyankopɔn de ma biara ho anisɔ.—Galatifo 6:2.

Ɔsomafo Paulo kaa no pen sɛ na Yudafo afahyɛ horow no yɛ “nneɛma a ɛbɛba no sunsuma nko,” na ɔde kaa ho sɛ “nipadua no ne Kristo de no.” (Kolosefo 2:16, 17) Ne saa nti, nokware Kristofo gye Kyerɛwnsɛm mu afotu yi tom: “Afɔre a wɔbɔ no, wɔbɔ ma ahonhommɔne, na ɛnyɛ Onyankopɔn . . . Muntumi nnom [Yehowa, NW] kuruwa ano ne ahonhommɔne kuruwa ano.” (1 Korintofo 10:20, 21) Bio nso, Kristofo tie ahyɛde a ɛne sɛ ‘wɔnnka nea ɛyɛ fi’ no. So abosonsom anaa atoro som fra otwa afahyɛ ahorow a ɛwɔ mo mpɔtam no mu? Sɛ ɛte saa a, nokware Kristofo betumi apo sɛ wɔbɛyɛ ade a ɛnsɔ Yehowa ani denam wɔn ho a wɔmfa nhyɛ ɔsom a ɛho agu fĩ mu no so.—2 Korintofo 6:17.

Sɛ abofra a n’ani sɔ ade nya akyɛde bi fi n’agya hɔ a, hena na ɔda no ase? Ɔhɔho koraa, anaa ne wofo? Ɛdenam mpae a efi komam a Onyankopɔn asomfo bɔ so no, wɔda wɔn soro Agya, Yehowa, ase daa wɔ n’ayamye a ɛdɔɔso no ho.—2 Korintofo 6:18; 1 Tesalonikafo 5:17, 18.

[Ase hɔ nsɛm]