So Woresɔ W’ankasa W’adwuma Ahwɛ?
1 Wɔahyehyɛ ɔdesani nipadua no ‘wɔ anwonwa kwan so ma adi dwuma. Na hwɛ nnwuma pii a etumi yɛ! So sɛnea aniwa, nsa, ntini ahorow, nnompe ne nam no nyinaa ka bom yɛ adwuma pɛpɛɛpɛ bere a wode asaa bɔ dadewa so na wode paane ne asaawa pam ade anaa wode kyerɛwdua kyerɛw adu nyɛ wo nwonwa anaa? Nipadua mu akwaa horow no bom di dwuma fɛfɛɛfɛ na etumi di ahyɛde biara a yɛn adwene a ɛyɛ nwonwa no de ma no ho dwuma!—Dwom 139:14.
2 Paulo de nipadua no yɛ mfatoho de kyerɛ sɛnea ɛsɛ sɛ Kristofo asafo no yɛ adwuma a Onyankopɔn de ahyɛ wɔn nsa no. Wɔ 1 Korintofo, ti 12 no, Paulo de obiara a ɔwɔ asafo no mu too Kristo nipadua mu akwaa bi ho. Ɔka ɔdɔ, biakoyɛ ne nkabom a ɛwɔ wɔn mu bere a wɔyɛ adwuma de kã asɛmpa no na wɔma nnipa bɛyɛ Yesu Kristo, a ɔne asafo no ti asuafo no ho asɛm. (1 Kor. 12:12) Ɛwom sɛ ebia nipadua mu akwaa biako bɛyɛ adwuma soronko bi de, nanso wɔn mu biara de mmoa bi ma wɔ nea nipadua mũ no nyinaa reyɛ no mu. (Rom. 12:4-8) Yebetumi afa Kristo honhom nipadua no sɛ nhwɛso a ɛsɛ sɛ yedi akyi nnɛ.
BU WO SOM ADWUMA HOKWAN NO
3 Adwuma bɛn na woyɛ wɔ Kristofo asafo no mu? Sɛnea ɛte biara no, so wubu sɛ ɛsom bo? Yehowa bu no saa! Ɛtɔ bere bi a ebia wobɛte nka sɛ woyɛ “mmerɛw” anaasɛ dwuma a wudi wɔ asafo no mu no yɛ nea ‘ɛnsom bo’ titiriw biara. Ebia ahoɔden a wunni, onyin anaa nsɛm afoforo bi bɛma woate nka saa. Nanso sɛnea asɛm no te biara no, eye sɛ wususuw nneɛma ho sɛnea Yehowa yɛ no. N’asɛm ka kyerɛ yɛn sɛ: “Na mmom nipadua ho akwaa a ɛyɛ yɛn sɛ ɛyɛ mmerɛw bebrebe no, ɛno na ɛho hia, . . . na nipadua ho ade a ɛyɛ sɛ enni nidi koraa no, ɛno na yɛhyehyɛ di no ni bebrebe . . . ’ Na Onyankopɔn de nipadua no atoatoa mu, na akwaa a wommu no no, wama no nidi bebrebe.”—1 Kor. 12:22-24.
4 Sɛ yesusuw nsɛm ho saa a, ɛmfa ho sɛ yɛwɔ mmerɛwyɛ ahorow, yɛn nyinaa fi ɔkra nyinaa mu bɛsom, efisɛ yenim sɛ Yehowa bɛtoa nea ebia yentumi nyɛ no so. Asɛm no ne sɛ, so nea yɛyɛ no reboa asɛnka ne ɔkyerɛkyerɛ adwuma kɛse a Onyankopɔn asafo no reyɛ no anaa? Yɛpɛ sɛ yɛn adwuma no yɛ nea “ɛso wɔ mfaso,” a ɛnsɛe nea “nipadua” a ɛyɛ asafo no, rebɔ mmɔden ayɛ no.—Fa toto 1 Korintofo 12:7 ho.
NEA ƐMA YƐN ANI GYE
5 Enti Onyankopɔn ani gye sɛ ɔde yɛn bedi dwuma sɛ ne mfɛfo adwumayɛfo, na ɔmfa yɛn ntoto afoforo ho wɔ nea yɛyɛ mu. Mmom no ɔma obiara “sɔ n’ankasa n’adwuma hwɛ, ɛno na obenya n’ankasa ne ho biribi ahoahoa ne ho, na ɛnyɛ obi ho.” (Gal. 6:4) Yɛn nipadua akwaa horow no bom yɛ adwuma. Obiako betumi ayɛ adwuma bi a ɔfoforo ntumi nyɛ. Nanso wɔn mu biara de ne ho to ɔfoforo so. Obi nko ntia ɔfoforo. Hwɛ sɛnea mfatoho yi fata Kristofo asafo no yiye bere a wɔn mu biara yɛ n’adwuma wɔ honhom kronkron no akwankyerɛ ase.
6 So worehwɛ sɛ w’adwuma ne asafo no mufo afoforo de bom hyɛ Yehowa din anuonyam anaa? Sɛ saa a, ɛnde na wowɔ ‘nea enti a ɛsɛ sɛ woma w’ani gye.’ Afei, hwehwɛ hokwan ahorow fa di dwuma ka asɛm kyerɛ mfɛfo adwumayɛfo, sukuufo, nnamfo, adetɔnfo ne afoforo denam bɔnnɔ so. Ebia wubenya hokwan aka wɔn a wɔde nnɔnhwerew 90 anaa nea ɛboro saa ka asɛmpa no wɔ akwampae adwuma mu no ho. Wɔn a ebia wɔyɛ ayarefo anaa wɔanyinyin no nso betumi de nnɔnhwerew kakraa adi adanse mmɔnten so anaa wɔde ayɛ nsɛmma nhoma kyekyɛ adwuma. Sɛ woreyɛ sankɔhwɛ a ntwentwɛn wo nan ase sɛ wode nhoma bɛma. Kae sɛ, nea wutumi yɛ biara no, Yehowa hwehwɛ ɔsom a efi ɔkra nyinaa mu, a ɛkyerɛ sɛ wode wo ho bɛma bere biara a wubetumi, sɛnea w’ankasa wo nsɛm tebea te.
7 Yiw, wɔyɛɛ nipadua no anwonwa kwan so ma ayɛ adwuma. Saa ara na ɛte wɔ Kristofo asafo a ɛwɔ wiase nyinaa no ho. Bere a obiara a ɔwɔ mu—te sɛ nsa, amemene, nnompe ne nam—sɔ n’ankasa n’adwuma hwɛ no, asafo a ɛbom di dwuma fɛfɛ yi de adansedi kɛse pa ara bɛma wɔ Kristo tiyɛ ase.