Amanaman Ntam Ahenni Asa Adansi Wɔ Europa Aman Bi So
1 Wɔ mfe dudu a abɛsen mu no, wosiw Yehowa Adansefo adwuma no ano wɔ Europa aman pii so a Europa Apuei fam ka ho. Wɔ mmeae pii no na anohyeto ahorow no mu yɛ den. Na ɛyɛ den sɛ wɔbɛyɛ nhyiam wɔ baguam, na ɛkame ayɛ sɛ na hokwan biara nni hɔ sɛ wobetumi ahyiam wɔ Ahenni Asa so. Nanso, wɔ nnansa yi mfe mu no, ‘Yehowa ayɛ ade kɛse ama yɛn. Yɛn ani agye.’—Dw. 126:3.
2 Efi 1983 mu no, atirimɔden nhyɛso a na wɔde ba Yehowa Adansefo so no mu fii ase gowee. Eduu 1989 no, na Poland ne Hungary agye Yehowa Adansefo atom wɔ mmara mu. Wɔ 1991 mu no, wogyee Yehowa Adansefo toom wɔ mmara mu wɔ Russia. Efi saa bere no reba no, adwuma no anya nkɔso wɔ Russia ne kan Soviet Union adehyeman ahorow no mu. Wɔ March 1996 ne October 1998 ntam no, Sodikuw no penee bosea a wɔde besisi Ahenni Asa 359 a baa dwumadibea ahorow a ɛhwɛ Europa aman 11 bisae no so.
3 Bere a wohwɛ mfonini ahorow a ɛwɔ krataa a ɛhyɛ Ahenni Som yi mu no, susuw anwonwade akɛse a Yehowa ayɛ ama ne nkurɔfo no ho hwɛ. (Dw. 136:4) Ma w’ani nnye sɛ wuhu sɛ wɔde ntoboa horow a anuanom a wɔwɔ wiase nyinaa yi no redi dwuma wɔ ɔkwan a eye sen biara so, ma ɛne asɛm a Yesu kae a wayɛ ho kyerɛwtohɔ wɔ Yohane 13:35 no hyia: “Sɛ mododɔ mo ho a, nnipa nyinaa behu sɛ moyɛ m’asuafo.”
4 Europa aman a wɔrenya nhyehyɛe a wɔayɛ de reboa ma wɔasisi Ahenni Asa horow wɔ aman a wɔn ho nso mu so mfaso no bi ne Romania, a efi July 2000 no wɔasisi Ahenni Asa 36 wɔ hɔ no. Esiane sɛ wɔnam ɔdan nsusuwso koro a wɔagye atom so resi Ahenni Asa dodow no ara a ɛwɔ Ukraine nti, wotumi sisii Ahenni Asa 61 wɔ afe 2001 mu, na wosisii 76 nso kaa ho wɔ 2002 mu. Ɛdenam ntoboa a woyi koguu Ahenni Asa Foto mu so no, wɔatumi asisi Ahenni Asa ɔhaha pii wɔ Bulgaria, Croatia, Macedonia, Moldova, Russia, ne Serbia ne Montenegro.
5 Ahenni Asa si wɔ aman bi so no nyɛ mmerɛw, ma enti ɛsɛ sɛ wɔbɔ mmɔden pii ansa na wɔatumi afi ɔdan no ankasa si ase. Mpɛn pii no ɛho nhyehyɛe no gye bere pii. Afei nso, ɛka a wɔbɔ wɔ Ahenni Asa ho wɔ saa beae no wɔ Europa no sõ kyɛn nea wɔbɔ wɔ Afrika ne South America mmeae pii no koraa. Nanso, esiane sɛ wɔn a wɔsom Yehowa dodow rekɔ anim kɛse nti, ɛho da so ara hia sɛ wosisi Ahenni Asa ɔhaha pii wɔ Europa aman a wɔn ho nso mu!
6 Hwɛ anigye ara a ɛyɛ sɛ yehu sɛ ɛho abehia sɛ wosisi Ahenni Asa horow pii ntɛmntɛm saa! Sɛnea osuahu ahorow pii kyerɛ no, ɛde adanse a ɛkyɛn so ama wɔ mpɔtam a wɔasisi Ahenni Asa a ɛtete saa no. Wɔ mmeae bi no, aban mpanyimfo a wɔwɔ mpɔtam hɔ ani agye biakoyɛ su a wɔda no adi wɔ akwankyerɛ ahorow a ɛfa ɔdansi ho a wodi akyi no ho.
7 Yesaia hyɛɛ nkɔanim a na ɛbɛba nokware som mu wɔ saa bere yi mu no ho nkɔm. Onyankopɔn nam odiyifo no so ka siei sɛ: ‘Me, Yehowa, mɛyɛ no ntɛm ne bere mu.’ (Yes. 60:22) Akyinnye biara nni ho sɛ ada adi sɛ mfe du a atwam no yɛ Yehowa bere ma nkɔanim wɔ Europa Apuei fam. Ɛmmra sɛ Yehowa bɛkɔ so ahyira mmɔden a yɛbɔ sɛ yɛbɛboa ma wɔasisi Ahenni Asa ahorow pii wɔ aman ahorow so no so, denam ntoboa a yɛbɛkɔ so ayi agu Ahenni Asa Foto no mu so! Eyi bɛma wɔatumi asisi Ahenni Asa pii aka nea ɛwɔ aman a wɔn ho nso so no ho. Ɛbɛboa ma ɔsom kronn anya nkɔanim wɔ Europa mmeae pii na ayɛ adansedi de “akodu asase ano.”—Aso. 13:47.
[Kratafa 3 mfonini]
Ahenni Asa Kɛse Moscow, Russia
[Mfonini ahorow wɔ kratafa 4-6]
Ahenni Asa Foforo a Wɔasisi Wɔ Europa Apuei Fam
Strumica, Macedonia
Daruvar, Croatia
Sokal, Lviv Mantam mu, Ukraine
Bitola, Macedonia
Sofia, Bulgaria
Plovdiv, Bulgaria
Krasnooktyabriskiy, Maykop Mpɔtam, Russia
Bački Petrovac, Serbia ne Montenegro
Tlumach, Ivano-Frankivsk Mantam mu, Ukraine
Rava-Ruska, Lviv Mantam mu, Ukraine
Stara Pazova, Serbia ne Montenegro
Zenica, Bosnia ne Herzegovina
Sokal Lviv Mantam mu, Ukraine
Zhydachivl Lviv Mantam mu, Ukraine