Monhyɛ Ahobrɛase
1 Oguanhwɛfo abarimaa bi de ne ho to Yehowa so di ɔkofoni kɛse bi so nkonim. (1 Sam. 17:45-47) Ɔdefo bi de boasetɔ gyina amanehunu ano. (Hiob 1:20-22; 2:9, 10) Onyankopɔn Ba no de ne nkyerɛkyerɛ ho anuonyam nyinaa ma N’agya. (Yoh. 7:15-18; 8:28) Wɔ nhwɛso yi biara mu no, ahobrɛase dii dwuma titiriw bi. Saa ara na nnɛ nso, ahobrɛase ho hia na yɛagyina nsɛm tebea ahorow a yehyia no ano.—Kol. 3:12.
2 Bere a Yɛreka Asɛm No: Sɛ Kristofo asomfo no, yefi ahobrɛase mu ne nnipa ahorow nyinaa kyɛ asɛmpa no, a yenni kan nnyina wɔn man a wofi mu, amammerɛ anaa abusua so mmu wɔn ntɛn. (1 Kor. 9:22, 23) Sɛ ebinom yɛ aniammɔnho anaa wofi ahantan mu po Ahenni nkrasɛm no a, yɛnnyɛ bi ntua ka, mmom no yɛde boasetɔ kɔ so hwehwɛ wɔn a wɔfata no. (Mat. 10:11, 14) Sɛ anka yɛde yɛn nimdeɛ anaa yɛn nhomasua bɛma afoforo ani agye yɛn ho no, yɛtwe wɔn adwene kɔ Onyankopɔn Asɛm so, a yenim sɛ ɛdan ti sen biribiara a ebia yɛn ankasa bɛka no. (1 Kor. 2:1-5; Heb. 4:12) Yɛde ayeyi nyinaa ma Yehowa de suasua Yesu.—Marko 10:17, 18.
3 Wɔ Asafo no Mu: Ɛsɛ sɛ Kristofo ‘fura ahobrɛase na wɔsom wɔn ho wɔn ho’ nso. (1 Pet. 5:5) Sɛ yebu afoforo kyɛn yɛn ho a, yɛbɛhwehwɛ akwan a yɛbɛfa so asom yɛn nuanom sen sɛ yɛbɛhwɛ kwan sɛ wɔnsom yɛn. (Yoh. 13:12-17; Fil. 2:3, 4) Yɛrente nka sɛ nnwuma te sɛ Ahenni Asa so asiesie no ba fam ma yɛn.
4 Ahobrɛase boa yɛn ma ‘yekurakura yɛn ho mu ɔdɔ mu’ na ɛno ma asomdwoe ne biakoyɛ tra asafo no mu. (Efe. 4:1-3) Ɛboa yɛn ma yɛbrɛ yɛn ho ase hyɛ wɔn a wɔapaw wɔn sɛ wonni anim no ase. (Heb. 13:17) Ɛkanyan yɛn ma yegye afotu anaa nteɛso biara a wɔde ma yɛn no tom. (Dw. 141:5) Na ahobrɛase ka yɛn ma yɛde yɛn ho to Yehowa so bere a yedi asɛyɛde biara a ebia wɔde bɛhyɛ yɛn nsa wɔ asafo no mu ho dwuma no. (1 Pet. 4:11) Te sɛ Dawid no, yehu sɛ nkonimdi nnyina nnipa mmɔdemmɔ so, na mmom, Onyankopɔn nhyira so.—1 Sam. 17:37.
5 Wɔ Yɛn Nyankopɔn Anim: Nea ɛkyɛn ne nyinaa no, ɛsɛ sɛ ‘yɛbrɛ yɛn ho ase hyɛ Onyankopɔn tumi nsa no ase.’ (1 Pet. 5:6) Sɛ yɛreko atia tebea ahorow a emu yɛ den a, ebia yɛn kɔn bɛdɔ ahotɔ a Ahenni no de bɛba no. Nanso yefi ahobrɛase mu da boasetɔ adi de twɛn Yehowa ma ɔma ne bɔhyɛ ahorow bam wɔ bere a wahyɛ mu. (Yak. 5:7-11) Sɛnea na ɛte wɔ mũdi mu kurafo Hiob fam no, nea ehia yɛn titiriw ne sɛ ‘nhyira bɛka Yehowa din.’—Hiob 1:21.
6 Odiyifo Daniel ‘brɛɛ ne ho ase ne Nyankopɔn anim’ na onyaa Yehowa anim dom ne ɔsom hokwan pii. (Dan. 10:11, 12) Ɛmmra sɛ, yɛn nso bɛhyɛ ahobrɛase saa ara, a yenim sɛ “nea edi ahobrɛase ne [Yehowa, NW] suro akyi ne ahonyade ne anuonyam ne nkwa.”—Mmeb. 22:4.